ޓޯކިޔޯ (ޖުލައި 31) - އޮލިމްޕިކްސްގެ ފިރިހެން ފުޓްބޯޅަ އިވެންޓްގެ ސެމީ ފައިނަލުން ބްރެޒިލާއި ސްޕެއިން، ޖަޕާން އަދި މެކްސިކޯ ފުރުސަތު ހޯދައިފި އެވެ.
މިއަދު ކުޅުނު ކުއާޓާ ފައިނަލް މެޗުތަކުގެ ނަތީޖާ އަށް ބަލާއިރު، ސްޕެއިން ވަނީ އިތުރު ވަގުތުގެ ދެ ހާފް ކުޅެގެން އައިވަރީ ކޯސްޓް އަތުން 5-2 އިން މޮޅުވެފަ އެވެ. ނިއު ޒީލެންޑް އަތުން ޖަޕާން މޮޅުވީ ޕެނަލްޓީ ޖަހައިގެން 4-2 އިންނެވެ. އެންމެ ފަހުން ރަން މެޑަލް ހާސިލްކުރި ބްރެޒިލުން ވަނީ 1-0 އިން މިސްރު ބަލިކޮށްފަ އެވެ. އަދި މި ފަހަރުގެ އޮލިމްޕިކްގައި މޮޅު ކުޅުމެއް ދައްކަމުން އަންނަ މެކްސިކޯ އިން ވަނީ 6-3 އިން ދެކުނު ކޮރެއާ ބަލިކޮށްފަ އެވެ.
ތޭވީސް އަހަރުން ދަށުގެ ކުޅުންތެރިންނަށް ހާއްސަ އޮލިމްޕިކްސްގެ ފުޓްބޯޅަ އިވެންޓްގައި އުމުރުން ދޮށީގެ ތިން ކުޅުންތެރިން ކޮންމެ ޓީމެއްގައި ހިމެނޭނެ އެވެ. ސްޕެއިން ކޮޅަށް ކުޅުނު ކުއާޓާ ފައިނަލް މެޗުގެ 10 ވަނަ މިނިޓްގައި އައިވަރީ ކޯސްޓަށް ލީޑުނަގައިދިން ގޯލު ޖެހީ އެރިކް ބާއީ އަކީ އުމުރުން ދޮށީ ކުޅުންތެރިއެއްގެ ގޮތުގައި އައިވަރީ ކޯސްޓް ޓީމުގައި ހިމެނި ކުޅުންތެރިއެކެވެ. ފުރަތަމަ ހާފު ނިމުމުގެ ކުރިން ސްޕެއިނަށް އެއްވަރުކޮށްދިނީ 30 ވަނަ މިނިޓްގައި ޑެނީ އޮލްމޯ ޖެހި ގޯލުންނެވެ.
މެޗުގެ އިތުރު ވަގުތުގެ ފުރަތަމަ މިނިޓްގައި އައިވަރީ ކޯސްޓްގެ މެކްސް-އެލައިން ގްރަޑެލް ވަނީ އަލުން އެ ޓީމަށް ލީޑުނަގައިދީފަ އެވެ. އެކަމަކު ބަދަލު ކުޅުންތެރިއެއްގެ ގޮތުގައި ކުޅެން އެރި ސްޕެއިންގެ ފޯވާޑް ރަފާ މީރް ވަނީ ގޯލެއް ޖަހައި ސްޕެއިން ސަލާމަތްކޮށްދީފަ އެވެ. އިތުރު ވަގުތުގައި ސްޕެއިނުން ޖެހި ތިން ގޯލުގެ ތެރެއިން ދެ ގޯލު ޖަހައި ރަފާ މީރް ވަނީ ހެޓްރިކެއް ހަދައިފަ އެވެ. ސްޕެއިންގެ އަނެއް ގޯލު ޖެހީ މިކޭލް އޮޔާޒަބާލް އެވެ.
މިސްރު ކުޅުންތެރިއަކު ކައިރިން ބްރެޒިލްގެ ރިޗާލިސަން (ކ) ބޯޅަ ހިފައިގެންދަނީ.-- ފޮޓޯ: އޭއެފްޕީ
މިސްރުން ބްރެޒިލް ކައިރީގައި ރަނގަޅު ކުުޅުމެއް ދައްކައި ލަނޑު ޖަހާނެ ފުރުސަތުތަކެއް ވެސް ތަނަވަސްކުރި އެވެ. އެކަމަކު އޭގެއިން އެއްވެސް ފުރުސަތެއް ގޯލަކަށް ހަދައިނުލެވުނެވެ. މެޗުގެ 37 ވަނަ މިނިޓްގައި ބްރެޒިލްގެ ހަމައެކަނި ގޯލު ޖެހީ ރިޗާލިސަން ދިން ބޯޅައަކުން މަތިއަސް ކޫނިއާ އެވެ.
ޖަޕާނުން ވަނީ ނިއު ޒީލެންޑް ކޮޅަށް ފޮނުވާލި ހަތަރު ޕެނަލްޓީ ވެސް ކާމިޔާބުކޮށްފަ އެވެ. އެ ޓީމުގެ ޕެނަލްޓީތައް ޖެހީ އަޔާސޭ އުއޭޑާ، ކޯ އިޓަކޫރާ، ޔޫޓާ ނަކަޔާމާ އަދި މާޔާ ޔޮޝީޑާ އެވެ. ނިއު ޒީލެންޑުން ހަތަރު ޕެނަލްޓީގެ ތެރެއިން ދެ ޕެނަލްޓީ ކާމިޔާބުކުރިއިރު، ނާކާމިޔާބުވީ ލިބެރާޓޯ ކަކާޝޭ އާއި ކްލޭޓަން ލެވިސް ޖެހި ޕެނަލްޓީތަކެވެ. ނިއު ޒީލެންޑްގެ ކްރިސް ވުޑް އާއި ކަލުމް މެކްކޯވާޓް ވަނީ ޕެނަލްޓީ ކާމިޔާބުކޮށްފަ އެވެ.
ފޯރިގަދަ ކުޅުމެއް ފެނުނު މެޗުގައި މެކްސިކޯ އިން ލީޑުނެގީ ލުއިސް ރޯމޯ ދިން ބޯޅައަކުން އޮންރީ މާޓިން ޖެހި ގޯލުންނެެވެ. ދެކުނު ކޮރެއާ އަށް އެއްވަރުކޮށްދިނީ ޑޮން ކެއޮން ލީ އެވެ. އޭގެ ފަހުން ރޯމޯ އާއި ފްރަންސިސްކޯ ކޯޑޯވާގެ ގޯލުތަކުން މެކްސިކޯ ދެ ލަނޑުގެ ލީޑެއް ނެގި އެވެ. އެކަމަކު، ޑޮން ކެއޮން ލީ އިތުރު ގޯލެއް ޖަހައި ދެކުނު ކޮރެއާ އަށް އަނެއްކާ ވެސް އުއްމީދެއް ހޯދައިދިނެވެ.
ދެކުނު ކޮރެއާ އިން ދެ ވަނަ ގޯލެއް ޖެހި ފަހުން މެކްސިކޯ އިން ވަނީ އިތުރު ތިން ގޯލު ޖަހައިފަ އެވެ. މި ލަނޑުތައް ޖެހީ މާޓިން އާއި ކޯޑޯވާ އަދި އެޑުއާޑޯ އަގީރޭ އެވެ. ދެކުނު ކޮރެއާގެ ތިން ވަނަ ގޯލު ޖެހީ އީ ޖޯ ހްވާން އެވެ.
ސެމީ ފައިނަލް މެޗުތައް އޮންނާނީ އަންނަ އަންގާރަ ދުވަހު އެވެ. ފުރަތަމަ ސެމީގައި މެކްސިކޯ ބައްދަލުކުރާނީ ބްރެޒިލާ އެވެ. އަދި ދެ ވަނަ ސެމީ ފައިނަލް މެޗުގައި ސްޕެއިން ކުޅޭނީ ޖަޕާންއާ އެެވެ.
