މާލެ ސަރަހައްދުގެ ކަރަންޓް ބިލް މި މަހު އާދަޔާ ހިލާފަށް ބޮޑުވެ ގިނަ ބަޔަކު ކަންބޮޑުވުންފާޅުކުރަމުންދާ މައްސަލަ ޔުޓިލިޓީ ރެގިއުލޭޓަރީ އޮތޯރިޓީން ބަލަން ފަށައިފި އެވެ.
އެތަނުން ނެރުނު އިއުލާނެއްގައި ބުނީ ސްޓެލްކޯގެ އިން ބައެއް މީހުންނަށް ފޮނުވި ޖުލައި މަހުގެ ކަރަންޓް ބިލް އާދަޔާ ހިލާފަށް ބޮޑުކަމުގެ ޝަކުވާ ސޯޝަލްމީޑިއާ އިން އެ އޮތޯރިޓީގެ ސަމާލުކަމަށް އައިސްފައިވާ ކަމަށެވެ. ރަސްމީކޮށް އެއްވެސް ފަރާތަކުން ހުށަހަޅާފައި ނުވިޔަސް ބަލަން ޖެހޭ ކަންކަން ބަލާނެ ކަމުގެ ޔަގީންކަން ވަނީ ދީފަ އެވެ.
މިދިޔަ އަހަރު އުފެއްދި ޔުޓިލިޓީ ރެގިއުލޭޓަރީ އޮތޯރިޓީ ހިނގަމުން އަންނަނީ އެންވާރަމެންޓް މިނިސްޓްރީގެ ދަށުންނެވެ.
މާލޭގެ ގެތަކުގެ ކަރަންޓް ބިލަކީ ދެއްކޭ ވަރަށް ވުރެން ބޮޑު ބިލެއް ކަމުގެ ޝަކުވާތައް ފެންމަތިކުރެއްވީ މާލޭގެ މޭޔަރު އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ. އޭނާ އަށް ލިބިވަޑައިގަތް ކަންބޮޑުވުންތަކަކާ ގުޅިގެން ކަމާބެހޭ އިދާރާތަކުގެ ސަމާލުކަމަށް ކަރަންޓް ބިލްގެ މައްސަލަ ގެންނަވައި އެ ބިލަކީ ގިނަ ބަޔަކަށް ދެއްކޭ ވަރަށް ވުރެން މާ ބޮޑު ބިލެއް ކަމަށް ވަނީ ވިދާޅުވެފަ އެވެ.
"ހާލުގައި އުޅެމުންދާ ރައްޔިތުން އިތުރަށް ހާލުގައި ޖެހޭގޮތް މިވަނީ ވެފައި. ރައްޔިތުން އަތުގައި ނެތް ފައިސާއަކުން ބިލް ދައްކަން މިވަނީ ޖެހިފައި," މުއިއްޒު ވިދާޅުވެފައިވެ އެވެ.
މި ފަހުން އެންމެ ބޮޑު ބިލެއް ޖުލައި މަހުގެ ތެރޭގައި ފޮނުވާފައިވާ ކަމަށް ގިނަ ބަޔަކު ބުންޏަސް ސްޓެލްކޯ އިން ބުނެފައި ވަނީ ބިލް ބޮޑުވާން ޖެހޭ ސަބަބެއް ނެތް ކަަމަށެވެ.
އެ ކުންފުނިން ބުނި ގޮތުގައި މިދިޔަ މަހުގެ ބިލް ބޮޑުކަމަށް ހީވީ, ކޮވިޑާ ގުޅިގެން ޖޫން މަހުގެ ތެރޭގައި ސަބްސިޑީއެއް ދިނުމަށް ފަހު, އެ ސަބްސިޑީ ކަނޑާލައި މި މަހުގެ ބިލް ފޮނުވުމުންނެވެ.
ސްޓެލްކޯ އިން ބުނެފައި ވަނީ ކޮންމެ މަހަކު ރީޑިން ނަގާއިރު ބިލް ބޮޑު ކަމަށް ފާހަގަ ކުރެވޭ ގެތަކުގެ ރީޑިން ދެވަނަ ފަހަރަށް ނަގައި މީޓަރު ވެސް ޓެސްޓް ކުރާ ކަމަށެވެ. ކުރިއާހިލާފަށް ގެތަކުގެ ބިލް ބޮޑުވިކަން ފާހަގަ ނުކުރެވޭ ކަމަށް ސްޓެލްކޯ އިން ވަނީ ބުނެފަ އެވެ.
"ސްޓެޓިސްކަލީ އަޅުގަނޑުމެން ބަލަން ވޭތުވެދިޔަ ދެ ތިން މަހަށް ކޮމްޕެއާ ކޮށްލާއިރު މިމަހުގެ ބިލަކީ ބޮޑު ބިލެއްތޯ. ސްޓެޓިސްކަލީ ބަލާލާއިރު އަޅުގަނޑުމެންނަކަށް އެހާ ބޮޑު އިމްޕެކްޓެއް ނުފެނޭ،" ސްޓެލްކޯގެ އޮފިޝަލަކު ވިދާޅުވެފައިވެ އެވެ.
މިފަދަ މައްސަލަތައް ކުރިން ބަލަނީ އެނާޖީ އޮތޯރިޓީންނެވެ. މި ސަރުކާރުގައި އެތަން އުވާލައި ފަހުން އުފެއްދީ ޔުޓިލިޓީ އޮތޯރިޓީގެ ޒިންމާގެ ތެރޭގައި، އާންމު ބޭނުންތަކުގެ ހިދުމަތްތަކަކީ ދިވެހިރާއްޖޭގައި ދިރިއުޅޭ އެންމެނަށް އެކަށީގެންވާ ހެޔޮ އަގެއްގައި، ހަރުދަނާ، އިތުބާރުހުރި އަދި ދެމެހެއްޓެނިވި ގޮތެއްގެމަތިން، ފޯރުކޮށްދެވޭ ހިދުމަތްތަކަކަށް ހެދުން ހިމެނެ އެވެ.
