މެނީލާ، ފިލިޕީންސް (ޖުލައި 30) - ފިލިޕީންސްގެ ވެރިރަށް ސަރަހައްދުގައި ދިރިއުޅޭ 13 މިލިއަން މީހުން މި ފެށޭ ހަފްތާގައި އަނެއްކާ ވެސް ލޮކްޑައުން ވާން ސަރުކާރުން އަންގައިފި އެވެ.
ތޮއްޖެހިފައިވާ ވެރިރަށުގައި ފިޔަވަޅުތައް ވަރުގަދަ ނުކޮށްފި ނަމަ ޑެލްޓާ ވޭރިއެންޓުގެ ސަބަބުން ކުއްލިއަކަށް ކޭސްތައް އިތުރުވެ ހޮސްޕިޓަލްތައް ފުރިދާނެ ކަމުގެ އިންޒާރު ތަޖުރިބާކާރުން ވަނީ ދީފަ އެވެ.
"މި އުނދަގޫ ނިންމުން ނިންމަން ޖެހުނީ އިތުރު ފުރާނަ ސަލާމަތް ކުރުމަށް،" ރައީސް ރޮޑްރިގޯ ޑުޓާޓޭގެ ތަރުަމާނު ހެރީ ރޯކް ގައުމީ ޓީވީގައި ވިދާޅުވި އެވެ.
މިއަދުން ފެށިގެން ރެސްޓޯރެންޓުތަކުގައި ކެއުމާއި ބޮޑެތި އެއްވުން ބޭއްވުން މަނާކޮށްފައި ވާއިރު، އޯގަސްޓް ހަ ވަނަ ދުވަހުން ފެށިގެން ދެ ހަފްތާ ވަންދެން ގެއިން ބޭރަށް ނިކުތުން މަނާ ވާނެ އެވެ.
ފިލިޕީންސްއިން މިހާތަނަށް 1.5 މިލިއަން ކޮވިޑް ކޭސް ފެނިފައި ވެ އެވެ. މިއީ ދެކުނު އިރުމަތީ އޭޝިއާގައި ދެ ވަނަ އަށް އެންމެ ކޭސް ގިނަ ގައުމެވެ. މި ބަލީގައި 28،000 މީހުން ފިލިޕީންސްއިން މަރުވެފައި ވެ އެވެ.
މިހާތަނަށް ޑެލްޓާ ވޭރިއެންޓާ ގުޅިފައިވާ 200 ކޭސް ފިލިޕީންސްއިން ފެނިފައި ވާއިރު، އަވައްޓެރި އެހެން ގައުމުތައް ފަދައިން މި ވޭރިއެންޓު ހަލުވިކަމާއެކު ފެތުރުމުގެ ބިރު އެބަ އޮތެވެ.
ބަލިމަޑުކަމާ ގުޅޭ ކަންކަމުގައި ސަރުކާރަށް ލަފާދޭ މިނިވަން ރިސާޗް ގްރޫޕް އޯސީޓީއޭއިން ވަނީ ވެރިރަށް ވަގުތުން ލޮކްޑައުން ކުރުމަށް ގޮވާލާފަ އެވެ. އެ ގްރޫޕުން އިންޒާރު ދިން ގޮތުގައި ފިޔަވަޅު ނާޅައިފި ނަމަ އޯގަސްޓު މަހުގެ މެދާ ހަމައަށް ދާއިރު ދުވާލަކު ފެންނަ ކޭސްތައް ތިން ގުނަ އިތުރުވެ 3،000 އެރުން އެކަށީގެންވެ އެވެ.
"އެ ރޭޓުގައި ކުރިއަށް ދާ ނަމަ މަދު ދުވަސްކޮޅެއްގެ ތެރޭގައި ސިއްހީ ނިޒާމަށް ނުކަތާވަރު ވާނެ،" އޯސީޓީއޭގެ ރަންޖީތު ރައި އޭއެފްޕީއަށް ވިދާޅުވި އެވެ.
ލޮކްޑައުނަށް ދިޔުމުގެ ނޭދެވޭ އަސަރު ބޮޑުވާނެ ކަމަށް ރައީސް ޑުޓާޓޭ ވިދާޅުވި ނަމަވެސް މިދިޔަ ހޯމަ ދުވަހު އެމަނިކުފާނު ވަނީ ލޮކްޑައުން ކުރަން ޖެހިދާނެ ކަމުގެ އިޝާރާތް ދެއްވާފަ އެވެ. މީގެ ކުރިން ލޮކްޑައުން ކުރުމުން އިގްތިސާދަށް ވަރަށް ބޮޑަށް ގެއްލުންވި އެވެ. އެތައް މިލިއަން ބަޔެއްގެ ވަޒީފާ ގެއްލި، ގިނަ އާއިލާތަކަށް ވަނީ ބަނޑުހައި ހޫނުކަމުގައި އުޅެން ޖެހިފަ އެވެ.
ފިލިޕީންސްގެ ވެރިރަށް ސަރަހައްދުގައި ހިމެނެނީ 16 ސިޓީ އާއި އެއް މުނިސިޕަލްޓީ އެވެ. އެ ތަންތަނުގެ މޭޔަރުން ވަނީ ސަރުކާރުން އާއްމުންނަށް އެހީވާ ނަމަ ލޮކްޑައުނަށް ތާއީދު ކުރާނެ ކަމަށް ވިދާޅުވެފަ އެވެ.
މެޓްރޯ މެނީލާގެ ގޮތުގައި މަޝްހޫރު ވެރިރަށް ސަރަހައްދު އެންމެ ފަހުން ލޮކްޑައުން ކުރީ މިދިޔަ މާޗް މަހު އެވެ. އޭރު ވެސް ލޮކްޑައުން ކުރަން މަޖުބޫރުވީ ރިކޯޑް އަދަދަށް ކޭސްތައް މަތިވުމުންނެވެ.
މި ޖުލައި މަހުގެ ކުރީކޮޅު ކޭސްތައް ކުޑަކޮށް ތިރިވުމާއެކު ސަރުކާރުން ވަނީ ބަލިމަޑުކަން ފެށުނު ފަހުން ފުރަތަމަ ފަހަރަށް އުމުރުން ފަސް އަހަރާއި 17 އަހަރާ ދެމެދުގެ ކުދިން ބޭރަށް ނިކުމެ އުޅުން މަނާކޮށްފައި އޮތް އޮތުން އުވާލާފަ އެވެ.
ނަމަވެސް ދެ ހަފްތާ ފަހުން ޑެލްޓާ ވޭރިއެންޓު ފެނި އަނެއްކާވެސް ކުޑަކުދިން ބޭރަށް ނިކުތުން މަނާ ކުރި އެވެ.
ފިޔަވަޅުތައް ހަރުކަށި ކުރަމުން ދާއިރު، ވެކްސިން ސަޕްލައި މަދުވުމާއި ލޮޖިސްޓިކަލް ކަންކަމާ ހެދި ކޮވިޑް ވެކްސިން ޕްރޮގްރާމް ހިންގުމަށް ފިލިޕީންސްއަށް ވަނީ ގޮންޖެހުންތަކާ ދިމާވެފަ އެވެ. މިހާތަނަށް އެ ގައުމުން ވެކްސިންގެ ދެ ޑޯޒް ޖަހާފައި ވަނީ އެންމެ 7.8 މިލިއަން މީހުންނެވެ. އެއީ އާބާދީގެ ހަތް ޕަސެންޓެވެ.
