އަތޮޅުތަކަށް ކަރަންޓުގެ ހިދުމަތް ދޭ, ސަރުކާރުގެ ކުންފުނި ފެނަކަ ކޯޕަރޭޝަނުން ފައިސާ ނުދައްކާތީ، ރަށްރަށުގައި ކަރަންޓުގެ ހިދުމަތް މިހާރު ފޯރުކޮށްދެމުން އަންނަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އިން ގާތްގަނޑަކަށް ހިލޭ ކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު އަމްރު ވިދާޅުވެއްޖެ އެވެ.
ސަރުކާރުގެ މައި ކުންފުނި، އެސްޓީއޯ އިން ދައުލަތުގެ އެކި ފަރާތްތަކުގެ އިތުރުން އަމިއްލަ ފަރާތްތަކަށް ފޯރުކޮށްދީފައިވާ މުދަލާއި ހިދުމަތްތަކަށް ފައިސާ ނުލިބޭ ކަމުގެ ޝަކުވާތައް އެ ކުންފުނިން އަބަދުވެސް ކުރެ އެވެ.
އެކަމާ ގުޅިގެން "އަދަދު"އަށް ދެއްވި އިންޓަވިއުއެއްގެ ތެރެއިން އަމްރު ވަނީ އެކި ކުންފުނިތަކުން އެސްޓީއޯ ދައްކަން ޖެހޭ ފައިސާގެ ބޮޑެތި އަދަދުތަކެއް ހުރި ކަމަށް ވިދާޅުވެފަ އެވެ. މިހާތަނަށް ނުލިބިވާ އެ އަދަދު ގާތްގަނޑަކަށް ތިން ބިލިއަން ރުފިޔާއަށް އަރާފައިވާ ކަމަށް އޭނާ ވިދާޅުވި އެވެ.
އަމްރު ވިދާޅުވި ގޮތުގައި އޭގެތެރެއިން ބޮޑު ބައެއް ނިސްބަތްވަނީ ފެނައަކަށެވެ. އެ ކުންފުނިން އެ ފައިސާ ހޯދަން އެކި ގޮތްގޮތުން މަސައްކަތްކޮށްގެން ވެސް މިހާތަނަށް އެއްވެސް ފައިސާއެއް ނުލިބޭ ކަމަށް ވިދާޅުވި އެވެ.
އަޅުގަނޑުމެން މިދަނީ އަތޮޅު ތެރެއަށް ކަރަންޓު ދޭން ބޭނުންވާ މިންވަރަށް ހުއްޓުމެއް ނެތި ތެޔޮ ފޯރުކޮށްދެމުން. އެކަމަކު އެ ތެލަކަށް އެންމެ ރުފިޔާއެއް ވެސް ނުލިބޭ. އެހެންވީމާ އަތޮޅު ތެރެއަށް އަސްލު ކަރަންޓު މި ފޯރުކޮށްދެނީ އެސްޓީއޯއިން ހިލޭ، -- އަމްރު
އޭނާ ވިދާޅުވި ގޮތުގައި އެކަމަށް ހައްލެއް ނުލިބި، އެސްޓީއޯއަށް ގިނަ ގޮންޖެހުންތައް ކުރިމަތިވަމުންދެ އެވެ. އަދި އެ ކުންފުނީގެ އޮޕަރޭޝަންތަކަށް ވެސް ބުރޫއަރަމުންދާކަމަށް ވިދާޅުވި އެވެ.
"ދުވަހުގެ ބޮޑު ބައި މި ހޭދަކުރަންޖެހެނީ އެ ކަމެއްގައި. ދެން އެ މައްސަލަ ހައްލުކުރަން ވާހަކަތައް އެބަދެކެވޭ. އެކަމަކު ސްޓެލްކޯއިން ބަރާބަރަށް ފައިސާ ދައްކަމުންދާކަން އަޅުގަނޑު ފާހަގަކޮށްލަން ބޭނުން،" އަމްރު ވިދާޅުވި އެވެ.
ފެނަކައިގައި މި މައްސަލަތައް ހުއްޓަސް އެސްޓީއޯ އިން ކުރި މަސައްކަތުން, އަމިއްލަ އެހެން ކުންފުނިތަކުން ހޯދަން ޖެހޭ ފައިސާގެ ބޮޑު ބައެއް އަނބުރާ ލިބިފައިވާ ކަމަށް ވިދާޅުވި އެވެ.
އެގޮތުން، ޕޭމަންޓް ޕްލޭންތަކެއް ހަދައިގެން އެ ފައިސާ އަނބުރާ ލިބެމުންދާއިރު، އެ އުސޫލުގެ ދަށުން ވެސް ފައިސާ ނުދައްކާ ފަރާތްތަކުގެ މައްސަލަ ކޯޓަށް ހުށަހަޅައިގެން އެ ފައިސާ އަނބުރާ ހޯދުމުގެ މަރުހަލާތައް ކުރިއަށްދާ ކަމަށް އަމްރު ވިދާޅުވި އެވެ.
ފެނަކައިން ބުނަނީ ފައިސާ ދައްކަމުން އަންނަ ކަމަށް
ނަމަވެސް، އަމްރުގެ ތުހުމަތުތައް ފެނަކައިން ދޮގުކުރެ އެވެ.
އެ ކުންފުނީގެ އެމްޑީ އަހުމަދު ސައީދު މުހައްމަދު މިއަދު "އަދަދު"އަށް ވިދާޅުވި ގޮތުގައި ފެނަކައިން ދަނީ އެސްޓީއޯއަށް ފައިސާ ދައްކަމުންނެވެ.
ނަމަވެސް، މިފަހުން ފައިސާ ދެއްކުން ކުޑަކޮށް މަޑުޖެހުނީ ކޮވިޑާ ގުޅިގެން ދިމާވެފައިވާ ބައެއް ދަތިތަކުގެ ސަބަބުން ކަމަށް ސައީދު އެއްބަސްވެވަޑައިގެންނެވި އެވެ.
"އަޅުގަނޑުމެން ކުންފުންޏާ ހަވާލުވި ފަހުން ފައިސާ ދައްކަމުން މި އަންނަނީ. އެކަމަކު އޭގެ ކުރިން ނުދައްކާއޮތް އެއްޗެއް ވިއްޔާ އަދި އެބައޮތް،" އޭނާ ވިދާޅުވި އެވެ.
އެގޮތުން، މީގެ ކުރިން އެސްޓީއޯއަށް ނުދައްކާއޮތް ފައިސާގެ އަދަދު ގާތްގަނޑަކަށް 100 މިލިއަނެއްހާ ރުފިޔާއަށް އަރާނެކަމަށް ސައީދު ލަފާކުރެއްވި އެވެ.
