ފްލޮރެންސް (ޖުލައި 29) - މި ފަހަރުގެ ޕްރީ ސީޒަން މެޗެއްގެ ތެރެއިން އެއް ހާފްގައި ހަތް ގޯލު ޖެހި ފިއޮރެންޓީނާގެ ފޯވާޑް ޑޫސާން ވްލާހޮވިޗްގެ ޑިމާންޑް ބޮޑުވެއްޖެ އެވެ.
އުމުރުން 21 އަހަރުގެ ވްލާހޮވިޗް ހަތް ގޯލު ޖެހީ ދާދި ފަހުން ޕްރީ ސީޒަން މެޗެއްގައި އިޓަލީގެ ހަތަރު ވަނަ ޑިވިޝަން ޓީމެއް ކަމަށްވާ ޕޮލިސްޕޯޓިވާ ސީފޯ ފޮލީނޯ ކޮޅަށެވެ. ޕޮލިސްޕޯޓިވާ އަތުން 11-0 އިން ފިއޮރެންޓީނާ މޮޅުވިއިރު، ވްލާހޮވިޗް ހަތް ގޯލު ވެސް ޖެހީ ދެ ވަނަ ހާފުގަ އެވެ. އެ ހުރިހާ ގޯލެއް ޖަހަން ހޭދަވީ 34 މިނިޓެވެ.
ސާބިއާގެ ޕާޓިޒާން ކްލަބަށް ކުރިން ކުޅުނު ވްލާހޮވިޗް، ފިއޮރެންޓީނާ އަށް ބަދަލުވީ 2018 ވަނަ އަހަރު އެވެ. މިދިޔަ ސީޒަނަކީ ވްލާހޮވިޗްގެ ކުރިއެރުންތައް އެންމެ ބޮޑަށް ފާހަގަވި އަހަރެވެ. އޭނާ ވަނީ އިޓާލިއަން ލީގުގައި 37 މެޗުން 21 ގޯލު ޖަހައިފަ އެވެ.
އިޓާލިއަން ލީގުގެ މެޗެއްގެ ތެރެއިން ލަނޑު ޖެހުމަށް ފަހު ވްލާހޮވިޗް އުފާފާޅުކުރަނީ.-- ފޮޓޯ: އޭއެފްޕީ
ރިޕޯޓްތައް ބުނާގޮތުން ވްލާހޮވިޗްގެ ސޮއި ހޯދަން މަސައްކަތް ކުރަމުން އަންނަ ކްލަބްތަކުގެ ތެރޭގައި ލިވަޕޫލާއި ޓޮޓެންހަމާއި މެންޗެސްޓާ ސިޓީ، ސެވިއްޔާ އަދި ބަޔާން މިއުނިކް ހިމެނެ އެވެ.
ފިއޮރެންޓީނާ އިން 2018 ވަނަ އަހަރު ވްލާހޮވިޗް ގަތީ ހަތަރު މިލިއަން ޑޮލަރު ދީފަ އެވެ. އެ ފަހަރު ވްލާހޮވިޗް ސޮއިކުރީ ފަސް އަހަރުގެ އެއްބަސްވުމެއްގަ އެވެ. އެ ކޮންޓްރެކްޓްގައި ބާކީ ދެ އަހަރު އެބައޮތެވެ. ފިއޮރެންޓީނާގެ ވިސްނުން މި ވަގުތު ހުރީ ވްލާހޮވިޗް ލައްވައި އާ އެއްބަސްވުމެއްގައި ސޮއިކޮށް، އޭނާ ކްލަބް ދޫކޮށްލާއިރު ބޮޑު އަގުގައި ވިއްކާލެވޭ ގޮތަށް ހެދުމަށެވެ.
ވްލާހޮވިޗް ވެސް ވަނީ އިތުރު އެއް އަހަރު ފިއޮރެންޓީނާ އަށް ކުޅެން ބޭނުންވާ ކަމަށް ދާދި ފަހުން ދިން އިންޓަވިއުއެއްގައި ބުނެފަ އެވެ.
މި ފަހަރުގެ ޓްރާންސްފާ މާކެޓްގައި ވްލާހޮވިޗް ވިއްކާލާނަމަ އޭނާގެ އަގު އުޅޭނީ 50 މިލިއަން ޑޮލަރުގައި ކަމަށް ރިޕޯޓްތައް ބުނެ އެވެ. އެއްބަސްވުން އާ ކޮށްގެން އަންނަ އަހަރު ވްލާހޮވިޗްގެ އަގު އެ އަށް ވުރެ ބޮޑު ކުރެވޭނެ އެވެ.
ވްލާހޮވިޗް ވަނީ މިހާތަނަށް ސާބިއާގެ ސީނިއާ ޓީމަށް ހަތް މެޗުން ދެ ގޯލު ޖަހައިފަ އެވެ. މީގެ ކުރިން ވްލާހޮވިޗް ވަނީ ސާބިއާގެ އުމުރުފުރާ ގައުމީ ޓީމުތަކަށް ކުޅެފަ އެވެ. އެ ގޮތުން އޭނާ ވަނީ ސާބިއާގެ 16، 18، 19 އަދި 21 އަހަރުން ދަށުގެ ގައުމީ ޓީމަށް ކުޅެފަ އެވެ.
