ތެހްރާން، އިރާން (ޖުލައި 24) - އިރާނުގެ ހުޅަނގު ދެކުނަށް ހަނަފަސްކަމާ ދިމާވެ، ފެން ނުލިބުމުގެ ސަބަބުން ކުރަމުންދާ މުޒާހަރާތަކުގައި ހަތަރު މީހަކު މަރުވެފައި ވަނިކޮށް ރޫހާނީ ލީޑަރުގެ މެސެޖެއް ދެއްވައިފި އެވެ.
އާޔަތުﷲ އަލީ ހާމަނާއީ މުޒާހަރާ ކުރަމުންދާ މީހުންނަށް ގޮވާލީ "ދުޝްމަނުންނަށް" ހަތިޔާރު ނުދިނުމަށެެވެ. ފެނުގެ މައްސަލަ އޮތީ ސީރިއަސް ހާލަތެއްގައިކަން ފާހަގަކުރައްވަމުން ހާމަނާއީ ވިދާޅުވީ ޝުއޫރުތައް ފާޅުކުރުމުގައި ވެސް ދުޝްމަނުންނާ މެދު ސަމާލުވާން ޖެހޭ ކަމަށެވެ.
"އިންގިލާބާއި، ގައުމާއި، ރައްޔިތުންނާ ދެކޮޅަށް ލިބެން އޮތް ކޮންމެ ހަތިޔާރެއްގެ ބޭނުން ދުޝްމަނުން ކުރާނެ. އެހެންވީމާ ދުޝްމަނުންނަށް އެހީ ލިބޭނެ ކަމެއް ނުކުރަން ސަމާލުވާން ޖެހޭ،" ހާމަނާއީގެ ރަސްމީ ވެބްސައިޓް މެދުވެރިކޮށް ފޮނުވި މެސެޖުގައި ވިދާޅުވި އެވެ.
އިރާނުގައި ތެޔޮ އުފައްދާ މައި ސަރަހައްދު، ކުޒެސްތާނަށް މިދިޔަ މާޗް މަހުން ފެށިގެން ވަނީ ހަނަފަސްކަމާ ކުރިމަތިވެފަ އެވެ. މިއީ އިރާނުގެ އެންމެ މުއްސަނދި ޕްރޮވިންސް ނަމަވެސް ވާރޭ ނުވެހި ގިނަ ދުވަސްވުމުގެ ސަބަބުން ފެނަށް ޖެހި، ޖުލައި 15 ވަނަ ދުވަހުން ފެށިގެން އާއްމުން ދަނީ މުޒާހަރާ ކުރަމުންނެވެ.
މުޒާހަރާތަކުގައި މިހާތަނަށް ހަތަރު މީހަކު މަރުވެފައި ވާއިރު، އޭގެ ތެރޭގައި ފުލުހަކު ވެސް ހިމެނެ އެވެ. އެ ޕްރޮވިންސްގެ ގިނަ ސިޓީތަކުގައި އެއް ފަހަރާ މީހުން މަގުތަކަށް ނުކުމެ އަޑު އުފުލަމުން ދާއިރު، ދައުލަތުގެ މީޑިއާއިން ދައްކާ މަންޒަރުތަކުން ފެންނަނީ އެ މީހުންނަށް އަމާޒުކޮށް ފުލުހުން ބަޑި ޖަހާ ތަނެވެ.
އދ. ގެ އިންސާނީ ހައްގުތަކާ ބެހޭ ވެރިޔާ މިޝޭލް ބެޝެލެޓް މިދިޔަ ހުކުރު ދުވަހު އިރާނަށް ގޮވާލެއްވީ މުޒާހަރާ ކުރާ މީހުން ހުއްޓުވަން އުޅުމުގެ ބަދަލުގައި ފެނުގެ މައްސަލައަށް އަވަސް ހައްލެއް ގެނައުމަށް މަސައްކަތް ކުރުމަށެވެ.
