ސްރީލަންކާ އިން އިންތިޒާމުކޮށްގެން އަންނަ ނޮވެމްބަރު މަހު ބާއްވާ ބައިނަލްއަގުވާމީ މުބާރާތެއްގައި ވާދަކުރުމުގެ ފުރުސަތު ރާއްޖެ އަށް ލިބިއްޖެ އެވެ.
މި މުބާރާތުގައި ރާއްޖެ އާއި ލަންކާގެ އިތުރުން އަދި ދެ ގައުމެއް ބައިވެރިކުރަން އަންނަނީ މަސައްކަތް ކުރަމުންނެވެ. ބެލެވޭ ގޮތުގައި ދެކުނު އޭޝިއާ އަށް ނިސްބަތްވާ އިތުރު އެއް ޓީމު މި މުބާރާތުން ފެނުމުގެ ފުރުސަތު އެބައޮތެވެ.
އެފްއޭއެމްގެ ރައީސް ބައްސާމް އަދީލް ޖަލީލް، ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަ ދައްކަވަމުން ވިދާޅުވީ އަންނަ އަހަރުގެ ފެބްރުއަރީ މަހު އޮންނަ އޭޝިއަން ކަޕްގެ ކޮލިފައިން ގްރޫޕް ސްޓޭޖުގެ މެޗުތަކަށް ތައްޔާރުވުމުގެ ގޮތުން ބައިނަލް އަގުވާމީ ގޮތުން މެޗުތަކެއް ކުޅެލަން ލިބޭ މި ފަދަ ކޮންމެ ފުރުސަތެއްގެ ބޭނުން ހިފަން ވިސްނާނެ ކަމަށެވެ. އޭނާ ވިދާޅުވީ ލަންކާގެ މުބާރާތުގައި ވެސް ކުޅެން ނިންމީ އެ ސަބަބަށްޓަކައި ކަމަށެވެ.
"އަނެއް ހެން މާ ވަރުގަދަ މުބާރާތަކަށް ނުވާނެ. އެހެން ނަމަވެސް މި ކަހަލަ ގޮތަކަށް ލިބޭ ހުރިހާ ފުރުސަތެއްގެ ބޭނުންހިފަން އަޅުގަނޑު ބޭނުން،" ބައްސާމް ވިދާޅުވި އެވެ.
މީގެ ކުރިން ވެސް ރާއްޖޭން ވަނީ ލަންކާއިން އިންތިޒާމްކުރި މުބާރާތެއްގައި ވާދަކޮށްފަ އެވެ. އެ ގޮތުން 2012 ވަނަ އަހަރު 23 އަހަރުން ދަށުގެ ކުޅުންތެރިންނަށް ހާއްސަކޮށްގެން ބޭއްވި އެ މުބާރާތުގެ ޗެމްޕިއަންކަން ހޯދީ ރާއްޖޭންނެވެ. އެ މުބާރާތުގައި ރާއްޖެ އާއި ލަންކާގެ އިތުރުން ދެން ކުޅުނީ ޕާކިސްތާނާއި ބަންގްލަދޭޝް އެވެ. ރާއްޖޭން ފައިނަލުގައި މޮޅުވީ 2-1 އިން ޕާކިސްތާން އަތުންނެވެ.
ރާއްޖޭން މީގެ ކުރިން ވަނީ ސަރަހައްދީ ގައުމުތަކުން ބާއްވާ އެ ފަދަ އިންވިޓޭޝަނަލް މުބާރާތްތަކުގައި ވާދަކޮށްފަ އެވެ.
ފީފާ ކަލަންޑަރުގެ ދުވަސްތަކުގައި ގައުމީ ޓީމަށް އެކުވެރިކަމުގެ މެޗުތަކެއް ނުލިބޭތީ އެ ޝަކުވާ ގައުމީ ޓީމާ ހަވާލުވެ ހުންނަ ގިނަ ކޯޗުން ކުރެ އެވެ. ބައްސާމް ވިދާޅުވީ ކުރިއަށް އޮތްތަނުގައި ގައުމީ ޓީމަށް އިތުރު މެޗުތަކެއް ހޯދައިދޭން ގިނަ މަސައްކަތްތަކެއް ކުރާނެ ކަމަށެވެ.
އޭޝިއަން ކަޕްގެ ކޮލިފައިން ގްރޫޕް ސްޓޭޖުގެ ހުރިހާ މެޗެއް އަންނަ އަހަރު ކުޅޭނެ އެވެ. ކޮލިފައިން ގްރޫޕް ސްޓޭޖުގެ ގުރުއަތުލުން ކުރިއަށްދާނީ ޕްލޭއޮފް ބުރު ނިމުމުންނެވެ. ކޮލިފައިން ހަ ގްރޫޕުގެ އެއް ވަަނަ ޓީމާއި ހަ ގްރޫޕްގެ ދެ ވަނަ ޓީމުތަކުގެ ތެރެއިން ފަސް ޓީމަށް ޗައިނާގައި 2023 ވަނަ އަހަރު ބާއްވާ އޭޝިއަން ކަޕްގެ ޖާގަ ލިބޭނެ އެވެ.
