ބާލިން، ޖަރުމަނު ވިލާތް (ޖުލައި 22) - ޔޫރަޕްގެ އުމުރުން 18 އަހަރުން މަތީގެ 50 ޕަސެންޓަށް ވުރެ ގިނަ މީހުން ކޮވިޑް ވެކްސިން ފުރިހަމަކޮށްފި އެވެ.
ބުރާސްފަތި ދުވަހު ޔޫރަޕިއަން ޔޫނިއަން (އީޔޫ) އިން ބުނީ 200 މިލިއަން މީހުން ވެކްސިން ފުރިހަމަކޮށްފައިވާ ކަމަށެވެ. އަމާޒަކީ 70 ޕަސެންޓު މީހުންނަށް ވެކްސިން ދިނުމެވެ.
އެކަމަކު ޖަރުމަނު ޗާންސެލަރު އެންޖެލާ މާކަލް ވިދާޅުވީ އެ ގައުމުގެ ކޭސްތައް ހިފެހެއްޓުމެއް ނެތި އިތުރުވަމުންދާ ކަމަށެވެ.
ޖަރުމަނުން ބުރާސްފަތި ދުވަހު 1،890 ކޭސް ފެނުނުއިރު، ކޮންމެ 100،000 މީހެއްގެ ތެރެއިން 12.2 މީހުން މިދިޔަ ހަފްތާ ތެރޭ ޕޮޒިޓިވްވި އެވެ. މިއީ މި މަސް ފެށުނު އިރާ އަޅާ ބަލާއިރު ދެ ގުނަ އިތުރެވެ.
އެހެންވެ، ޗާންސެލާ މާކަލް ވަނީ ޖަރުމަނު ރައްޔިތުން ލަސްނުކޮށް ވެކްސިން ފުރިހަމަ ކުރުމަށް ގޮވާލައްވާފަ އެވެ. އޭގެ އިތުރުން ފްރާންސްގައި ވެސް ކޭސްތައް ވަނީ އިތުރުވާން ފަށާފަ އެވެ.
މި ހަފްތާގައި ބޮޑެތި ލުއިތަކެއް ދިން އިނގިރޭސި ވިލާތުގައި ވެސް ކޭސްތައް އިތުރުވަމުން ދާއިރު، ސުޕަމާކެޓުތަކުގެ ގިނަ ސްޓާފުން އައިސޮލޭޝަނުގައި ތިބުމުން ކާތަކެތި ލިބުމުގައި ދަތިވެދާނެކަމުގެ އިންޒާރު ވަނީ ދީފަ އެވެ.
ވެކްސިން ޖެހުން އިތުރުވި ނަމަވެސް ބަލި ފެތުރުން ކޮންޓްރޯލް ކުރެވެމުން ނުދާއިރު، ވައިރަސް އުފެދުނު ގޮތް ހޯދުމުގެ ބަހުސް އަނެއްކާވެސް ވަނީ ހޫނުވެފަ އެވެ.
ޑިސެމްބަރު 2019 ގައި ޗައިނާގެ ވޫހާން ސިޓީން ފެނުނު މި ވައިރަސް މުޅި ދުނިޔެއަށް ފެތުރި މަރުވި މީހުންގެ އަދަދު މިހާރު ވަނީ ހަތަރު މިލިއަނަށް ވުރެ އިތުރުވެފަ އެވެ.
ވެކްސިން ޖަހާ ރޭޓު އިތުރުވަމުން ދާއިރު، އިންޑިއާއިން ފެނުނު ޑެލްޓާ ވޭރިއެންޓުގެ ސަބަބުން ކޭސްތައް އިތުރުވެ، އަލުން ފިޔަވަޅުތައް ވަރުގަދަ ކުރަން ބައެއް ގައުމުތަކަށް ވަނީ މަޖުބޫރުވެފަ އެވެ.
