ބެއިޖިން، ޗައިނާ (ޖުލައި 21) - ޗައިނާގެ މެދުތެރޭގައި އޮންނަ ޝެންގްޝައު ސިޓީއަށް ބޯކޮށް ވާރޭވެހި، ސަބްވޭގައި ފެންބޮޑުވުމުން 12 މީހުން މަރުވެއްޖެ އެވެ.
ސޯޝަލް މީޑިއާގައި އާއްމުވެފައިވާ ބައެއް ފޮޓޯތަކުން ފެންނަނީ ރޭލެއްގެ ތެރޭގައި ފެންބޮޑުވެ، ކަރާ ހަމައަށް ފެން ފޯރުމުން ޕަސެންޖަރުން ސަލާމަތް ވާން މަސައްކަތް ކުރާ މަންޒަރެވެ.
ހިނާން ޕްރޮވިންސްގައި ހުންނަ 10 މިލިއަން މީހުންގެ އެ ސިޓީއަށް ވަނީ "ވާރޭގެ ތޫފާނަކާ" ކުރިމަތިވެފަ އެވެ. އާދަޔާ ހިލާފަށް ބޯކޮށް ވާރޭ ވެހި، ސިޓީގެ އެންމެ ކާރޫބާރޫ ބޮޑު ހިސާބުގައި ވަނީ ފެންބޮޑުވެފަ އެވެ.
ޗައިނާގެ ސޯޝަލް މީޑިއާ ވެއިބޯގައި ކުރި ޕޯސްޓެއްގައި ސިޓީގެ އޮފިޝަލުން ބުނީ 12 މީހުން މަރުވެ ފަސް މީހަކަށް އަނިޔާވެފައިވާ ކަމަށެވެ.
ކަމާ ބެހޭ ފަރާތްތަކުން ވަނީ ހިނާން ޕްރޮވިންސްގައި ފެންބޮޑުވެދާނެ ކަމަށް ރަތް އެލާޓް ނެރިފަ އެވެ. މޫސުމީ ފެންބޮޑުވުމަކީ ޗައިނާގައި އާއްމު ކަމެކެވެ. ނަމަވެސް ސައިންޓިސްޓުން ބުނީ މޫސުމަށް އަންނަ ބަދަލުގެ ސަބަބުން ފެންބޮޑުވުމުގެ ސީރިއަސްކަން އިތުރުވަމުންދާ ކަމަށެވެ.
މިހާރު ވެސް ފެންބޮޑުވެފައި ވާއިރު، ޗައިނާގެ މެދުތެރޭގެ ކޯރެއްގައި އޮންނަ ޑޭމެއް ކޮންމެ ވަގުތެއްގައި ވެސް ހަލާކުވެދާނެ ކަމުގެ އިންޒާރު ސިފައިން ވަނީ ދީފަ އެވެ.
ސިފައިން ބުނީ ލުއޮޔެންގްގައި ހުންނަ ޔިހެޓަން ޑޭމް ސަރަހައްދަށް ބޯކޮށް ވާރޭ ވެހި، އެ ޑޭމްގައި 20 މީޓަރުގެ ރެނދެއް އަޅާފައިވާ ކަމަށެވެ. ޑޭމް ހުންނަ ލުއޮޔެންގް ސިޓީގައި ހަތް މިލިއަން މީހުން ދިރިއުޅެ އެވެ.
ސިފައިން މިހާރު މަސައްކަތް ކުރަމުން ދަނީ ޑޭމް ފަޅައިގެންދާނެ ވަގުތަކަށް ތައްޔާރުވެ، ސިޓީއާ ދުރަށް ފެންގަނޑު ގެންދެވޭނެ ގޮތްތައް ހަމަޖެއްސުމަށެވެ.
