ޖެނީވާ، ސްވިޓްޒަލޭންޑް (ޖުލައި 20) - ކޮވިޑް ބަލީގެ މީހުންނަށް ފަރުވާ ކުރަން ސްވިޓްޒަލޭންޑުގެ ރޯޗޭ ކުންފުނީގެ "ރޮނަޕްރީވް" އެންޓިބޮޑީ ފަރުވާއަށް ހުއްދަ ދިން ފުރަތަމަ ގައުމަށް ޖަޕާން ވެއްޖެ އެވެ.
ޖަޕާނުގައި އެ ފަރުވާއަށް ހުއްދަ ދިނީ ތިން ވަނަ މަރުހަލާގެ ޓެސްޓުތަކުގެ ނަތީޖާއަށް ބަލައިގެންނެވެ. އެގޮތުން މި ފަރުވާ ކުރުމުން ބަލިވާ މީހުންގެ ހާލު ސީރިއަސްވުމާއި މަރުވުމުގެ ފުރުސަތު ކުޑަވެ އެވެ.
"ރޮނަޕްރީވް" އުފެއްދީ ބޭސް ކުންފުނި ރޯޗޭ އާއި އެމެރިކާގެ ބަޔޯޓެކް ކުންފުނި ރިޖެނެރޯން ގުޅިގެންނެވެ. މިހާތަނަށް ކުރި ޓެސްޓުތަކުން ދައްކާ ގޮތުގައި އިންޑިއާއިން ފެނުނު ޑެލްޓާ ވޭރިއެންޓް ފަދަ އަލަށް ފެންނަ ވޭރިއެންޓުތަކާ ދެކޮޅަށް ވެސް މި ފަރުވާއިން އެދެވޭ ނަތީޖާއެއް ލިބެ އެވެ.
ރޯޗޭ ކުންފުނިން ނެރުނު ބަޔާނެއްގައި ބުނީ ހޮސްޕިޓަލުގައި ފަރުވާ ދޭން ނުޖެހޭ ހައި ރިސްކު މީހުންނަށް "ރޮނަޕްރީވް" ބޭސް ދިނުމުން މަރުވުމާއި ހާލު ގޯސްވުމުގެ ފުރުސަތު 70 ޕަސެންޓު ކުޑަވާ ކަމަށެވެ.
އޭގެ އިތުރުން ބަލީގެ އަލާމާތް ފެންނަ މުއްދަތު ހަތަރު ދުވަހަށް ކުޑަވެގެން ދެ އެވެ. ޖަޕާނުގައި މި ބޭސް ބޭނުން ކުރަން ހުއްދަ ދީފައި ވާއިރު ބައެއް ގައުމުތަކުގައި އެމެޖެންސީ ހާލަތްތަކުގައި ބޭނުން ކުރުމުގެ ހުއްދަ ދީފައި ވެ އެވެ.
