ނ. ވެލިދޫގައި މީހުން ދިރިއުޅޭ ކޮންމެ ގެއަކަށް ގިނަ ދުވަހު ބޭނުން ކުރެވޭ ޒާތުގެ ފޮތި ކޮތަޅު ހަދިޔާ ކޮށްފި އެވެ.
ކޮތަޅުތައް ހަދިޔާކުރީ ވެލިދޫގައި ޒުވާނުންތަކެއް ހިންގާ ކުޑަ ކަންމަތި ނިއު ޖެނެރޭޝަންގެ ފަރާތުންނެވެ.
އެ ޖަމިއްޔާގެ ފައުންޑާ އަހުމަދު އަމީލް ބުނި ގޮތުގައި އީދު ހަދިޔާއެއްގެ ގޮތުގައި ކޮންމެ ގެއަކަށް ފޮތި ކޮތަޅު ބެހީ ޕްލާސްޓިކް ކޮތަޅު ބޭނުން ކުުރުން މަދު ކުރުމަށް ބާރު އެޅުމުގެ ގޮތުންނެވެ.
"އަޅުގަނޑުމެން ބޭނުންވޭ 2023 ގައި އެއްފަހަރު ބޭނުން ކޮށްފައި އުކާލާ ޕްލާސްޓިކް ރާއްޖޭގައި މަނާ ކުރާތީ އެކަމަށް ވެސް އެއްބާރުލުން ދޭން. އެހެންވެއާވެސް އެކު ކުރި ކަމެއް މިއީ،" އަމީލް ބުންޏެވެ.
ވެލިދޫގައި މީހަކަށް ކޮތަޅެއް ހަވާލު ކުރަނީ: އެރަށު ކޮންމެ ގެއަކަށް ފޮތި ކޮތަޅެއް ވަނީ ދީފައި-- ފޮޓޯ: އަމީލް
ވެލިދޫގައި މީހުން ދިރިއުޅޭ 400 އެއްހާ ގެ ހުންނައިރު ކޮންމެ ގެއަކަށް ކޮތަޅެއް ވަނީ ދީފަ އެވެ. އެއީ އާއްމުކޮށް ބާޒާރު ކުރަން ގެންދާ ސައިޒްގެ ކޮތަޅެކެވެ. އަހަރަކަށް ވުރެ ގިނަ ދުވަހު އެ ކޮތަޅު ބޭނުން ކުރެވޭނެ ކަމަށް އަމީލް ބުންޏެވެ.
އިޖުތިމާއީ އެކިއެކި ހަރަކާތްތައް ހިންގާ ވެލިދޫ ކުޑަ ކަންމަތި ނިއު ޖެނެރޭޝަނުން ވެލިދޫގެ ތިމާވެށި ހިމާޔަތް ކުރުމަށް ދޭތެރެ ދޭތެރެއިން ހަރަކާތްތައް ހިންގަ އެވެ.
