އައްޑޫ އިކުއިޓޯރިއަލް ހޮސްޕިޓަލް ސަރަހައްދުން ދޫކޮށްފައި ހުރި ގޯތިތައް ނެގުމަށް ފަހު ބަދަލު ދޭން ހަމަޖެއްސީ ހިތަދޫގެ އެންމެ ރަނގަޅު ސަރަހައްދުން އަދުލުވެރި ބަދަލެއް ދީގެން ކަމަށް އައްޑޫ ސިޓީގެ މޭޔަރު އަލީ ނިޒާރު (ދެކުނު ނިޒާރު) ވިދާޅުވެއްޖެ އެވެ.
އައްޑޫ ސިޓީ ކައުންސިލުން ވަނީ އިކުއިޓޯރިއަލް ހޮސްޕިޓަލް ސަރަހައްދުގައި ހުރި 35 ގޯތީގެ ބަދަލުގައި، އެ ހޮސްޕިޓަލުގެ އިރުން ލިންކް ރޯޑާ ދިމާލަށްވާ ގޮތަށް އައްޑޫ ސިޓީ ޒޯން ސްޓޭޑިއަމް ކައިރިން ގޯތީ ދޭން ނިންމާފަ އެވެ. އަދި ބަދަލުގައި ލިބޭ ގޯތި ފާހަގަކޮށް ކައުންސިލުން ވަނީ ގެޒެޓުގައި އިއުލާންކޮށްފަ އެވެ.
މި މައްސަލައިގައި ގޯތި ލިބުން މީހުންގެ ހުރި ކަންބޮޑުވުންތަކާ ގުޅިގެން ނިޒާރު "އަދަދު" އަށް ވިދާޅުވީ، މިއީ އައްޑޫގެ ހުރިހާ ރައްޔިތުންގެ މަސްލަހަތު އިސްކޮށް ކައުންސިލުން ނިންމި ނިންމުމެއް ކަމަށެވެ. އެގޮތުން މިކަމުގައި ގޯތި ލިބުނު މީހުންގެ ކަންބޮޑުވުން ހުރި ނަމަވެސް، މިއީ އައްޑޫ ރައްޔިތުންގެ ތާއީދު އޮތް ކަމެއްގެ ގޮތުގައި އޭނާ ފާހަގަކުރެއްވި އެވެ.
"ގޯތީގެ މަސްލަހަތު ނުހިމެނޭ މީހެއް ނަމަ އައްޑޫގެ ރައްޔިތުން މިކަމަށް ތާއީދު. ޑައިރެކްޓްކޮށް ގޯއްޗާ ގުޅުން އޮތް ފަރާތްތަކުން މަސްލަހަތު ހިމެނޭތީ ދެކޮޅަށް ވާހަކަ ދައްކާނެ. އަޅުގަނޑާ ބައްދަލުވި ރައްޔިތުން ވަރަށް ތާއީދު ކަމެއް. އެ މީހުން ބޭނުންވަނީ މި ސަރަހައްދު ރަނގަޅަށް ތަރައްގީ ވާން" ނިޒާރު ވިދާޅުވި އެވެ.
ގޯތިތައް ބޮޑުވެފައި ރަނގަޅު ވާނެ، ބޭނުންވާ ވަސީލަތްތައް ވެސް ހުންނާނެ
އިކުއިޓޯރިއަލް ހޮސްޕިޓަލް ހުންނަ ސަރަހައްދުން ދިން ގޯތިތައް ބަދަލު ކުރަނީ އެ ސަރަހައްދު ކައިރީގައި އޮންނަ އެހެން ސަރަހައްދަކަށެވެ. މިއީ ކުރިން ހޮސްޕިޓަލް އަޅަން ވެގެން ކަނޑައަޅާފައި އޮތް ސަރަހައްދު ކަމަށް އައްޑޫ ސިޓީ ކައުންސިލުން ބުންޏެވެ.
އައްޑޫ އިކުއިޓޯރިއަލް ހޮސްޕިޓަލް ސަރަހައްދު: ރަތް ކުލައިން ފާހަގަކޮށްފައި ހުރި ސަރަހައްދުގައި ހުރި ގޯތިތައް ބަދަލުކުރަނީ ފެހި ކުލައިން ފާހަގަކޮށްފައިވާ ސަރަހައްދަށް --
އާ ގޯތިތައް ހުންނަ ސަރަހައްދާ ގުޅިގެން ނިޒާރު ވިދާޅުވީ، އާ ގޯތިތައް ހުންނާނީ ހޮސްޕިޓަލަށް ހިނގާލާފަ އާދެވޭހާ ކައިރީގައި ކަމަށެވެ. އަދި މި ސަރަހައްދުގައި ދިރިއުޅޭ ރައްޔިތުންނަށް ލުއިފަސޭހަ ވާނެ ގޮތަށް ޕާކިން އާއި ވިޔަފާރި އާއި އެހެނިހެން މުހިންމު ވަސީލަތްތައް ތަރައްގީ ކުރެވޭނެ ކަމަށް އޭނާ ވިދާޅުވި އެވެ.
އޭގެ އިތުރުން ހޮސްޕިޓަލާ ކައިރިން ދޫކޮށްފައި ހުރި ގޯތިތަކަކީ ޗަސް ބިން ބޮޑު ސަރަހައްދަކަށް ވާތީ އިމާރާތްކުރުމުގައި ހުރި ގޮންޖެހުންތައް ވެސް އަލަށް ދޫކުރާ ސަރަހައްދުގައި ކުރިމަތި ނުވާނެ ކަމަށް ނިޒާރު ވިދާޅުވި އެވެ.
"މިހާރު ގޯތި ހުރި ޗަސް ބިންތަކުގައި ގިނައިން ވެލި އަޅައިގެން ނޫން ގޮތަކަށް އަނެއްހެން ބަޔަކަށް ނޫޅެވޭނެ. އެހާ ބޮޑަށް ޗަސް ބިން އޮތް ސަރަހައްދެއް އެއީ. ބަދަލުގައި އައްޑޫ ސިޓީން އެންމެ ރަނގަޅު ސަރަހައްދުން ބިން މިދެނީ. ލޮކޭޝަނަށް ބަލާއިރު ވެސް ޕްރައިމް ރަނގަޅު ލޮކޭޝަނަކުން. އަދި ޕްލޭން ކުރެވިގެން ޕާކިންއާ ވިޔަފާރީގެ އެހެން ވަސީލަތްތަކާ ހިމެނޭ ގޮތަށް އެ ސަރަހައްދު އޮންނާނީ" ނިޒާރު ވިދާޅުވި އެވެ.
ނިޒާރު ވިދާޅުވި ގޮތުގައި، ގޯތިތައް ބަދަލުކުރަން ކައުންސިލުން ބޭނުންވާ އެންމެ ބޮޑު ސަބަބަކީ އިކުއިޓޯރިއަލް ހޮސްޕިޓަލް ސަރަހައްދު ތަރައްގިކުރަން ހޮސްޕިޓަލާ ގުޅުންހުރި ބޭނުންތަކަށާއި އާންމު އެހެން ބޭނުންތަކަށް މި ސަރަހައްދު ބޭނުންވާތީ އެވެ. އަދި މިއީ މުސްތަގުބަލަށް ބަލާފައި އައްޑޫ ސިޓީގެ ހުރިހާ ރައްޔިތުންނަށް އެންމެ ފައިދާ ހުރި ގޮތް ކަމުގައި ކައުންސިލުން ދެކޭތީ ކަމަށް އޭނާ ހާމަކުރެއްވި އެވެ.
އެގޮތުން މިހާރު މަސައްކަތް ކުރަމުންދާ އައްޑޫ ސިޓީގެ ލޭންޑް ޔޫސް ޕްލޭންގައި ވެސް މި ސަރަހައްދަކީ އައްޑޫގެ ތަރައްގީއަށް، ހާއްސަކޮށް ހޮސްޕިޓަލާ ގުޅޭ ކަންކަމަށް މުހިންމު ސަރަހައްދެއްގެ ގޮތުގައި ކަނޑައެޅިގެން ދާނެ ކަމަށް ނިޒާރު ވިދާޅުވި އެވެ.
ބަދަލު އަދުލުވެރި، މާލީ ބަދަލު ވެސް ދޭން ތައްޔާރު
މި ސަރަހައްދުން ދޫކޮށްފައި ހުރި ބިންތަކުގެ ތެރެއިން މަދު ތަނެއްގައި ނޫނީ އިމާރާތްކުރުމުގެ އެއްވެސް މަސައްކަތެއް ކޮށްފައެއް ނުވެ އެވެ. ކައުންސިލުން ވަނީ ގޯތިތަކުގައި އިމާރާތްކުރުމުގެ އެއްވެސް މަސައްކަތެއް ކޮށްފައިވާ މީހުންނާ އެކު ކުރިޔަށް ދާނެ ގޮތަކާ ގުޅޭ ގޮތުން މަޝްވަރާ ކުރަން ހުޅުވާލާފަ އެވެ.
މިކަމުގައި އެންމެނަށް ވެސް ބަދަލު ދޭނީ ގާނޫނީ ހަމަތަކުގެ ތެރެއިން އިންސާފުވެރި ކަމާއި އަދުލުވެރި ކަމާ އެކު ކަމަށް ކައުންސިލުން ބުނެ އެވެ.
ނިޒާރު ވިދާޅުވީ ގޯތީގެ އިތުރުން މާލީ ބަދަލު ދޭން ޖެހިއްޖެ ނަމަ އައްޑޫ ސިޓީ ކައުންސިލުން އޮތީ އެކަން ވެސް ކުރަން ތައްޔާރަށް ކަމަށެވެ. އެކަމަކު މާލީ ބަދަލު ދޭން ޖެހޭތޯ ނިންމަނީ ކޯޓުން ކަމަށް އޭނާ ވިދާޅުވި އެވެ. އަދި ގޯތި ލިބުނު މީހުން ހުށަނޭޅި ނަމަވެސް ކައުންސިލުގެ އަމިއްލަ އިސް ނެގުމުގައި އެ މަސައްކަތް ކުރާނެ ކަމަށް ވެސް ވިދާޅުވި އެވެ.
ނިޒާރު އިތުރަށް ވިދާޅުވީ، ކައުންސިލުން ނިންމާ ނިންމުންތަކާ ގުޅިގެން ކަންބޮޑުވުން ހުރި ނަމަވެސް ކައުންސިލުގެ އަބަދުގެވެސް ވިސްނުމަކީ އައްޑޫ ސިޓީގެ ހުރިހާ ރައްޔިތުންނަށް ބޭނުންވާ ތަރައްގީ އާއި ހިދުމަތްތައް ފޯރުކޮށްދޭން އިސްކަން ދިނުން ކަމަށެވެ. އަދި ކައުންސިލުން މަސައްކަތް ކުރަނީ އެ މަގުން ކަމުގެ ޔަގީންކަން ރައްޔިތުންނަށް އެރުވި އެވެ.
