ލަންޑަން (ޖުލައި 19) - ކޮވިޑް-19ގެ ފޭކް ޕީސީއާރް ޓެސްޓްތަކެއް ބޭނުން ކޮށްގެން މުބާރާތެއްގައި ވާދަކުރި ކަމަށް ބުނެ ވާހަކަ ދެއްކި އިނގިރޭސި އެތުލީޓް އެންޑްރޫ ބަޓްޗާޓަށް މި ފަހަރުގެ އޮލިމްޕިކްސް އިން ފުރުސަތު ދޭން ނިންމައިފި އެވެ.
ސްކޮޓްލެންޑަށް އުފަން އުމުރުން 29 އަހަރުގެ ބަޓްޗާޓަކީ 5000 މީޓަރުގެ އިވެންޓްތަކަށް ހާއްސަ ދުވުންތެރިއެކެވެ.
ބަޓްޗާޓްގެ މައްސަލަ ފެންމަތިވީ ޕޮޑްކާސްޓް ޝޯއެއްގައި ވާހަކަ ދައްކަމުން އޭނާ ކޮވިޑް-19ގެ ޓެސްޓެއްގެ ތާރީހު ބަދަލުކުރި ކަމަށް ބުނުމުންނެވެ. މިހާރު ޑިލީޓްކޮށްލާފައިވާ އެ ޝޯގައި ވާހަކަ ދައްކަމުން ބަޓްޗާޓް ބުނީ އޭނާ ކޮވިޑް ޓެސްޓް ހެދުމަށް ފަހު ނަތީޖާ ލިބުން ލަސްވާތީ ކުރިން ހެދި ޓެސްޓެއްގެ ތާރީހު ބަދަލުކޮށްލައިގެން ތަނަކަށް ހުށަހެޅި ކަމަށެވެ.
މި މައްސަލަ ބެލުމަށް ފަހު ބަޓްޗާޓް ވަނީ އެއް އަހަރަށް ސަސްޕެންޑްކޮށް ޖޫރިމަނާކޮށްފަ އެވެ. ޖޫރިމަނާ އަށް ވާ 6800 ޑޮލަރު ވަގުތުން ދައްކަން ޖެހުނު ނަމަވެސް އޭނާ އަށް ދީފައިވާ ސަސްޕެންޝަނަށް އަމަލުކުރަން ޖެހޭނީ ދެ އަހަރު ފަހުން ކަމަށް ވަނީ ކަނޑައަޅައިފަ އެވެ.
އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ އެކްރެޑިޝަން މެންޑޭޓްގެ ތެރެއިން ކަންތައްތައް ބެލުމަށް ފަހު ބަޓްޗާޓަށް މިހާރު ވަނީ އަންނަ ހުކުރު ދުވަހު ފަށާ އޮލިމްޕިކްސްގައި ވާދަކުރުމުގެ ފުރުސަތު ދީފަ އެވެ.
އޭގެ ފަހުން ދި ޓައިމްސް އަށް ދިން އިންޓަވިއުއެއްގައި ބަޓްޗާޓް ބުނީ އަސްލު އޭނާ ދައްކަން ބޭނުންވީ ބައެއް އެތުލީޓުން ކޮވިޑްގެ ޕީސީއާރް ޓެސްޓަށް މަކަރު ހަދައިގެން ކަންކަން ކުރާ ވާހަކަ ކަމަށާއި އެކަމަކު ދެކެވުނު ވާހަކަތަކުގެ މާނަ ދިޔައީ މުޅިން ގޯސްކޮށް ކަމަށެވެ.
މީގެ ފަސް އަހަރު ކުރިން ބޭއްވި ރިއޯ އޮލިމްޕިކްސްގެ 5000 މީޓަރުގެ ދުވުމުން ބަޓްޗާޓް ދިޔައި ހަ ވަނަ އެވެ. އޭގެ އެއް އަހަރު ފަހުން ޔޫރަޕިއަން ކްރޮސް ކަންޓްރީ ޗެމްޕިއަންޝިޕުން ބަޓްޗާޓް ވަނީ ލޯ މެޑަލް ހާސިލްކޮށްފަ އެވެ.
