މާލެ-ހުޅުމާލެ އިންޓަކަނެކްޝަން ޕްރޮޖެކްޓްގެ ދަށުން ގާއިމުކޮށްފައިވާ ވިއުގަ ގުޅައި ނިންމައި، ކުރި ފުރަތަމަ ޓެސްޓު ކާމިޔާބުކަމަށް ސްޓޭޓް އިލެކްޓްރިކް ކޮންޕެނީ ލިމިޓެޑް (ސްޓެލްކޯ) އިން ބުނެފި އެވެ.
ހުޅުމާލޭގައި ބެހެއްޓި 50 މެގަވޮޓްގެ ކަރަންޓު ޖަނަރޭޓަރު ސެޓު މާލެއާ ގުޅާލެވިފައިވަނީ ސިނަމާލޭ ބްރިޖްގެ އަރިމަތިން ގެނެސްފައިވާ ކޭބަލަކުންނެވެ.
ސްޓެލްކޯއިން ބުނީ މާލެއާއި، ހުޅުމާލޭގެ އިންޖީނުގެ މިހާރު ވަނީ ގްރޭޓާ މާލެ ގްރިޑް މެދުވެރިކޮށް ކާމިޔާބު ކަމާއެކު ސިންކްރޮނައިޒް ކުރެވިފައި ކަމަށާއި، މިހާރު މާލެއިން ހުޅުމާލެއަށް އަދި ހުޅުމާލެއިން މާލެއަށް ކަރަންޓު ފޯރުކޮށްދެވޭނެ ކަމަށެވެ.
"ގްރޭޓާމާލެ ގްރިޑާއިއެކު އަޅުގަނޑުމެން މިވަނީ ހަކަތައިގެ ސިނާއަތުގެ މުޅިން އައު ހަރުފަތެއް ގިރާކޮށްފައި. އިރާދަކުރެއްވިއްޔާ މި ގްރިޑާއެކު އަޅުގަނޑުމެން ދެމުންގެންދާ ހިދުމަތުގެ ފެންވަރު އިތުރަށް ރަނގަޅުވެ، އެކަމުގެ ފައިދާތައް ރައްޔިތުންނަށް ލިބެމުންދާނެ،" ސްޓެލްކޯ އިން ބުންޏެވެ.
އެކަމާ ގުޅޭގޮތުން ސްޓެލްކޯގެ މީޑިޔާ އޮފިޝަލު "އަދަދު"އަށް ވިދާޅުވި ގޮތުގައި އެ ވިއުގައިގެ ފުރަތަމަ ސާކިޓު މިއަދު ޓެސްޓުކޮށްފި އެވެ.
އެ ޓެސްޓު ކާމިޔާބުވެފައިވާއިރު، ދެވަނަ ސާކިޓު ޓެސްޓުކުރާނީ މިމަހުގެ 21 ވަނަ ދުވަހު ކަމަށް ވެސް އޭނާ ވިދާޅުވި އެވެ.
"މިހާރު ހުޅުމާލެ އާއި މާލެއާ ދޭތެރޭ ކަރަންޓު ފޯރުކޮށްދެވޭނެ. އަދި އެމަޖެންސީ ހާލަތުގައި މި ވިއުގަ މެދުވެރިކޮށް ހުޅުލެއަށް ވެސް ކަރަންޓު ދެވޭނެ،" އޮފިޝަލު ވިދާޅުވި އެވެ.
އެ ވިއުގަ ބޭނުންކުރަން ފެށުމާއެކު މާލޭގައި ވަގުތީ ގޮތުން ބަހައްޓާފައިވާ ޖަނަރޭޓަރުތައް ނިއްވާލެވޭނެ ކަމަށް ސްޓެލްކޯއިން ވަނީ ބުނެފަ އެވެ.
މާލެއަށް ކަރަންޓު ފޯރުކޮށްދިނުމަށް ގަލޮޅުގައި ސްޓެލްކޯގެ މައި އިމާރާތުގައި ވަގުތީ ގޮތުން ބަހައްޓާފައި ހުންނަ ހަތަރު ޖަނަރޭޓަރުތަކުން އެކިއެކި އުނދަގޫތަކާއި ގެއްލުންތައް ލިބެމުންދާކަމަށް ބުނެ އެ ސަރަހައްދުގައި ދިރިއުޅޭ ރައްޔިތުން ދަނީ ޝަކުވާ ކުރަމުންނެވެ.
ނަމަވެސް، ސްޓެލްކޯއިން ތަކުރާރުކޮށް ބުނަމުން އައީ، އެއީ ވަގުތީ ޖަނަރޭޓަރުތަކެއް ކަމަށާއި އެ ޖަނަރޭޓަރުތައް ބެހެއްޓީ ހުޅުމާލެ އާއި މާލެ އިންޓަކަނެކްޝަން މަސައްކަތް ކުރިއަށް ގެންދާ އިރު މާލޭގައި ދޭ ކަރަންޓްގެ ހިދުމަތަށް ބުރޫ އެރިޔަ ނުދިނުމަށް ކަމަށެވެ.
ޝަކުވާ ބޮޑުވެފައިވާ ޖަނަރޭޓަރުތައް ނިއްވާލަން ތައްޔާރުވެފައިވާއިރު، އެ ޖަނަރޭޓަރުތަކުގެ ސަބަބުން ލިބެމުންދާ ގެއްލުމުގެ ބަދަލު ހޯދަން ދެ މައްސަލައެއް މިހާރު ވަނީ ސިވިލް ކޯޓަށް ވެސް ހުށަހަޅައިފަ އެވެ.
މިހާރު ހުޅުމާލޭގައި ބަހައްޓާފައި ހުރި 50 މެގަވޮޓްގެ ޖަނަރޭޓަރު ސެޓުގެ އިތުރުން ހަމަ އެ ސައިޒުގެ އިތުރު ޖަނަރޭޓަރު ސެޓެއް ހުޅުމާލޭގައި ބެހެއްޓުމަށް ސަރުކާރުން އަންނަނީ ރާވަމުންނެވެ.
އަދި މާލެއަށް ބޭނުންވާ ކަރަންޓު އުފެއްދުމަށް ތިލަފުށީގައި 150 މެގަވޮޓްގެ އިންޖީނުގެއެއް ބެހެއްޓުމަށް މަސައްކަތްތަކެއް ވެސް ދަނީ ކުރަމުންނެވެ.
