މައްކާ، ސައުދީ އަރަބިއްޔާ (ޖުލައި 17) - އިންޑިއާގެ ފަސް މެމްބަރުންގެ އާއިލާއަކަށް މި އަހަރުގެ ހައްޖުގެ އަޅުން އަދާ ކުރަން ފުރުސަތު ލިބުމުން އުފަލުން ގޮސް އެ މީހުންނަށް ރޮވުނެވެ. އޭގެ އަނެއް ކޮޅުން އެތައް ހާސް ބަޔަކު ތިބީ އެ މީހުންގެ ފޯމުތައް ރިޖެކްޓް ކުރުމުން މާޔޫސްވެފަ އެވެ.
ކޮވިޑު ބަލިމަޑުކަމާ ހެދި މި އަހަރު ހައްޖުގެ އަޅުކަން އަދާ ކުރުމުގެ ފުރުސަތު ލިބުނީ ސައުދީ އަރަބިއްޔާގައި ދިރިއުޅޭ އެންމެ 60،000 މީހުންނަށް އެކަންޏެވެ. ބަލިމަޑުކަމުގައި ދެ ވަނަ ހައްޖެއް ފެށިއިރު، މިއީ އޭގެ ކުރިން އަޅުކަން އަދާ ކުރާ އެތައް މިލިއަން މީހުންނާ އަޅާ ބަލާއިރު ވަރަށް މަދު އަދަދެކެވެ.
އޮންލައިން ޕޯޓަލް މެދުވެރިކޮށް ފޯމް ހުށަހަޅަން ޖެހުނު އިރު، 558،000 އަށް ވުރެ ގިނަ މީހުން އެކަމަށް އެދުނެވެ. ނަމަވެސް ހަރުކަށި ޝަރުތުތަކުގެ ތެރެއިން ސައްހަ ފޯމުތަކުގެ މެދުގައި ނެގި ގުރުއަތަށް ފަހު، ފުރުސަތު ނުލިބުނު މީހުން ތިބީ މާޔޫސްކަމުގަ އެވެ.
ފުރުސަތު ލިބުނު މީހުންގެ ތެރޭގައި ހިމެނޭ އުމުރުން 58 އަހަރުގެ އަމީނަކީ އިރުމަތީ ދައްމާމް ސިޓީގައި މަސައްކަތް ކުރާ އިންޑިއާ މީހެކެވެ. އޭނާ އާއެކު އޭނާގެ އަންހެނުން އަދި އުމުރުން 18 އަހަރުން މަތީގެ ތިން ދަރިން ވެސް ހޮވިފައި ވެ އެވެ.
"އަހަރުމެން މި ތިބީ އުފަލުން ގޮސް ފޮޅިފައި. އަހަރުމެންގެ އާއިލާ އާއި އެކުވެރިންގެ އެތައް ބަޔަކަށް މި ފުރުސަތު ނުލިބުނު،" އަމީން އޭއެފްޕީއަށް ބުންޏެވެ.
ފަސް ދުވަހަށް ދެމިގެންދާ ހައްޖުގެ އަޅުކަން ހޮނިހިރު ދުވަހު ފަށާފައި ވާއިރު، ގުރުއަތުން ހޮވުނު އެންމެންނަކީ ވެސް ސައުދީ އަރަބިއްޔާގައި ދިރިއުޅޭ ވެކްސިން ފުރިހަމަކޮށްފައިވާ އުމުރުން 18 އަހަރާއި 65 އަހަރާ ދެމެދުގެ މީހުންނެވެ. އަދި އެ މީހުންނަކީ ބޮޑު ބައްޔަކަށް ފަރުވާ ކުރާ މީހުންނަށް ވެގެން ނުވާނެ އެވެ.
ހައްޖު މިނިސްޓްރީން ބުނީ 150 ގައުމަކުން މީހުންނަށް ފުރުސަތު ދިން ކަމަށާއި އިސްކަން ދިނީ އަލަށް ހައްޖުގެ އަޅުކަން އަދާ ކުރާ މީހުންނަށް ކަމަށެވެ.
މިދިޔަ އަހަރު ބޭއްވި ހައްޖަކީ ފަހުގެ ތާރީހުގައި އެންމެ މަދުން މީހުންނަށް ފުރުސަތު ލިބުނު ހައްޖެވެ. އެގޮތުން ފުރުސަތު ދޭނީ އެންމެ 1،000 މީހުންނަށް ކަމަށް ހައްޖު މިނިސްޓްރީން ބުންޏެވެ. ނަމަވެސް ފަހުން ހާމަކުރި ގޮތުގައި 10،000 މީހުން ބައިވެރިވި އެވެ.
މި އަހަރު 60،000 މީހުން ފުރުސަތު ލިބުނު ނަމަވެސް، މިއީ 2019 ވަނަ އަހަރުގެ 2.5 މިލިއަން މީހުންނާ އަޅާ ބަލާއިރު އެތައް ގުނައެއް މަދު އަދަދެކެވެ. ފުރުސަތު ލިބުނު މީހުން ވަނީ މި އަހަރު ހައްޖު ޕެކޭޖުތަކުގެ އަގު ބޮޑުވުމުން ހިތްހަމަނުޖެހުން ފާޅުކޮށްފަ އެވެ.
އެގޮތުން ޓެކްސް ނުލައި، ޕެކޭޖެއްގެ އަގު ފެށެނީ 3،226 އެމެރިކާ ޑޮލަރުންނެވެ. އެއާ ހިލާފަށް މިދިޔަ އަހަރު ހުރިހާ ހަރަދެއް ބެލެހެއްޓީ ސައުދީ ސަރުކާރުން ކަމަށް ރިޕޯޓުތައް ބުނެ އެވެ. އޭގެ ތެރޭގައި ހައްޖުވެރިންގެ ކެއުމާއި، ހުންނާނެ ހޮޓަލާއި، ސިއްހީ ފަރުވާ ވެސް ހިމެނެ އެވެ.
އެކަމަކު އަގުބޮޑުވި ނަމަވެސް، ހައްޖުގެ މަތިވެރި އަޅުކަން އަދާ ކުރުމަށް އެތައް ހާސް ބަޔެއްގެ ތެރެއިން ފުރުސަތު ލިބުމުން، އެންމެން ވެސް ޝުކުރުވެރިވެ އެވެ.
