މެންޗެސްޓާ (ޖުލައި 18) - މި ފަހަރުގެ ޓްރާންސް މާކެޓްގެ ތެރޭގައި އެތުލެޓިކޯ މެޑްރިޑްގެ އިނގިރޭސި ފުލްބެކް ކިއެރަން ޓްރިޕިއާ އާއި ރެއާލް މެޑްރިޑްގެ ފްރާންސް ޑިފެންޑަރު ރަފައެލް ވަރާން ގަންނަން ކުރާ މަސައްކަތް މެންޗެސްޓާ ޔުނައިޓެޑުން ވަރުގަދަ ކޮށްފި އެވެ.
ޓްރިޕިއާ، 30، ގަންނަން ޔުނައިޓެޑުން ތައްޔާރުކުރަނީ 25 މިލިއަން ޑޮލަރުގެ ބިޑެކެވެ. އަދި ވަރާން، 28، ގެ ސޮއިހޯދަން ޔުނައިޓެޑުން އޮތީ 50 މިލިއަން ޑޮލަރު ހަރަދުކުރަން ތައްޔާރަށެވެ. މި ދެ ކުޅުންތެރިން ގަންނަން ޔުނައިޓެޑުން މި ވަގުތު ހޭދަކުރާނީ 75 މިލިއަން ޑޮލަރެވެ. އެކަމަކު، މި ޑީލްތައް ނިންމަން ބޮޑު ހަރަދެއް ކުރަން ޖެހުމުގެ ފުރުސަތު އެބައޮތެވެ.
އަންނަ އަހަރުގެ ޖޫން މަހުގެ ނިޔަލަށް ވަރާން ރެއާލާ އެކު ހަދާފައިވާ އެއްބަސްވުން ހަމަވާނެ އެވެ. އެހެންވެ، ރެއާލުން މި ފަހަރުގެ ޓްރާންސްފާ މާކެޓްގައި ވަރާން ވިއްކާލުމުގެ ފުރުސަތު ބޮޑެވެ. އަދި ވަރާންގެ އޭޖެންޓް މިހާތަނަށް ޔުނައިޓެޑާ އެކު ބޭއްވި މަޝްވަރާތައް ދިޔައީ ރަނގަޅަށް ކަމަށާއި ވަރާން ޔުނައިޓެޑަށް ބަދަލުވާން މިހާރު ކުރަން ޖެހިފައިވާ ހަމައެކަނި ކަމަކީ ޔުނައިޓެޑާއި ރެއާލުން މި ޑީލް ނިންމާނެ ވަކި އަގެއް ކަނޑައެޅުން ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
ފްރާންސްގެ ލެންސް ދޫކޮށް 2011 ވަނަ އަހަރު ރެއާލަށް ބަދަލުވި ވަރާން އަކީ ފާއިތުވި 10 އަހަރެއްހާ ދުވަހު ރެއާލްގައި ގިނަ ކާމިޔާބީތަކެއް ހޯދި ކުޅުންތެރިއެކެވެ.
އެތުލެޓިކޯއާ އެކު ޓްރިޕިއާ ހަދާފައިވާ އެއްބަސްވުން އަންނަ އަހަރު ޖޫން މަހު ހަމަވާނެ އެވެ. ދާދި ފަހުން ޓްރިޕިއާ ވަނީ އަލުން އިނގިރޭސި ކްލަބަކަށް ކުޅެން ބޭނުންވާ ކަމަށް ބުނެފަ އެވެ.
ސްޕެއިނުގެ ނޫސްތަކުން އެތުލެޓިކޯގެ އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި އެ ކްލަބުން މި ފަހަރުގެ ޓްރާންސްފާ މާކެޓްގައި ވިސްނާފައި އޮތީ ޓްރިޕިއާ ވިއްކާލާ ގޮތަކަށް ނޫނެވެ. އެކަމަކު އެ ޑީލް ކުރިއަށް ގެންދަން ޓްރިޕިއާގެ އޭޖެންޓް އަންނަނީ ޕްރެޝަރު ކުރަމުންނެވެ.
މެންޗެސްޓާ ސިޓީ ޔޫތު ޓީމުން ކެރިއަރު ފެށި ޓްރިޕިއާ ފުރަތަމަ ފާހަގަވާން ފެށީ 2012 އިން 2015 އަށް ބާންލީ އަށް ކުޅުނުއިރު އެވެ. އޭގެ ފަހުން ޓޮޓެންހަމް ހޮޓްސްޕާސްގައި ވެސް ރަނގަޅު ކުޅުމެއް ދައްކައި އޭނާ އެތުލެޓިކޯ އަށް ބަދަލުވީ 2019 ވަނަ އަހަރު އެވެ. އޭނާ ވަނީ އެތުލެޓިކޯއާ އެކު މިދިޔަ ފަހަރު ސްޕެނިޝް ލީގު ކާމިޔާބުކޮށްފަ އެވެ.
ޔުނައިޓެޑުން ބޭނުންވަނީ ލަސްވެގެން މި މަސް ނިމުމުގެ ކުރިން ޓްރިޕިއާ އާއި ވަރާންގެ ޑީލް ނިންމާލުމަށެވެ.
