ރިޔާދް، ސައުދީ އަރަބިއްޔާ (ޖުލައި 15) - ކޮވިޑުގެ ބަލިމަޑުކަމާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ދަށުން ސައުދީ އަރަބިއްޔާގައި ދިރިއުޅޭ ވެކްސިން ފުރިހަމަކޮށްފައިވާ މީހުންނާއެކު ހައްޖުގެ އަޅުކަން ފަށަން ތައްޔާރުވެއްޖެ އެވެ.
މިދިޔަ އަހަރު ވެސް ސައުދީ އަރަބިއްޔާގައި ހައްޖުގެ އަޅުކަން ކުރިއަށް ގެންދިޔެއީ ރައްކާތެރިކަމުގެ ފިޔަވަޅުތަކާ އެކު އެވެ. އަދި ފަސް ދުވަހަށް ދެމިގެންދާ ހައްޖުގެ އަޅުކަމުގެ ސަބަބުން ކޮވިޑުގެ އެއްވެސް ކޭސްއެއް ފެނިފައެއް ނުވެ އެވެ.
މި އަހަރު އަޅުކަމުގައި ބައިވެރިވުމުގެ ފުރުސަތު ލިބެނީ ސައުދީ އަރަބިއްޔާގައި ދިރިއުޅޭ ވެކްސިން ފުރިހަމަކޮށްފައިވާ 60،000 މީހުންނަށެވެ. މިއީ މިދިޔަ އަހަރަށް ވުރެ އިތުރު އަދަދެއް ނަމަވެސް ބަލިމަޑުކަމުގެ ކުރިއާ އަޅާ ބަލާއިރު މިއީ އެތައް ގުނައެއް ދަށް އަދަދެކެވެ. ހައްޖުގެ އަޅުކަމަށް މީހުން ޖަމާވާން ފަށަނީ އަންނަ ހޮނިހިރު ދުވަހު އެވެ.
ދެހާސް ނަވާރަ ވަނަ އަހަރު އެކި ގައުމުތަކުން ޖުމްލަ 2.5 މިލިއަން މުސްލިމުން ހައްޖުގެ އަޅުކަން އަދާކުރި އެވެ. މި މަހުގެ ކުރީކޮޅު ހައްޖު މިނިސްޓްރީން ބުނީ މިދިޔަ އަހަރެކޭ އެއް ގޮތަށް ރައްކާތެރިކަމުގެ ފިޔަވަޅުތަކަށް ބޮޑު ސަމާލުކަމެއް ދެމުންދާ ކަމަށެވެ.
މި އަހަރު ހައްޖުގެ އަޅުކަން އަދާކުރަން އެދި ސައުދީ އަރަބިއްޔާގައި ދިރިއުޅޭ ވެކްސިން ފުރިހަމަކޮށްފައިވާ 558،000 އަށް ވުރެ ގިނަ މީހުން އޮންލައިން ޕޯޓަލް މެދުވެރިކޮށް ފޯމު ހުށަހެޅި އެވެ. އޭގެ ތެރެއިން 60،000 މީހުން ގުރުއަތުން ހޮވީ އުމުރުން 18 އަހަރާއި 65 އަހަރާ ދެމެދުގެ އުމުރުފުރައިންނެވެ. އަދި ހޮވުނު މީހުންނަކީ އެއްވެސް ބޮޑު ބައްޔަކަށް ފަރުވާ ކުރަމުންދާ މީހަކަށް ވެގެން ނުވާނެ އެވެ.
ހައްޖު މިނިސްޓްރީން ބުނީ ގައިދުރުކަން ވަރަށް ހަރުކަށިކޮށް ބަލަހައްޓާނެ ކަމަށާއި "ސްމާޓް ހައްޖު ކާޑެއް" ތައާރަފު ކުރަން ނިންމާފައިވާ ކަމަށެވެ. އެ ކާޑު ބޭނުންކޮށްގެން އެއްވެސް މީހަކާ ކޮންޓެކްޓު ނުވެ ކޭމްޕުތަކާއި، ހޮޓެލްތަކާއި، ބަސްތައް ބޭނުން ކުރެވޭނެ އެވެ. އެ ކާޑު ސިސްޓަމްގެ ސަބަބުން އެއްވެސް ހައްޖުވެރިއަކު ގެއްލިއްޖެ ނަމަ ހޯދަން ފަސޭހަވާނެ ކަމަށް ހައްޖު މިނިސްޓްރީން ބުންޏެވެ.
އޭގެ އިތުރުން ހައްޖުވެރިންނަށް ޒަމްޒަމް ފެން ބެހުމަށް ކުދި ރޮބޮޓުތަކެއް އުޅޭނެ ކަމަށް ހައްޖު މިނިސްޓްރީން ބުންޏެވެ.
ހައްޖުގެ އަޅުކަން ފެށުމަށް ތައްޔާރުވަމުން ދާއިރު، ސައުދީ އަރަބިއްޔާގައި މިހާތަނަށް 503،000 ކޮވިޑް ކޭސް ފެނިފައި ވެ އެވެ. އެ ގައުމުން މަރުވީ 8،000 މީހުންނެވެ. ޖުމްލަ 34 މިލިއަން މީހުން އުޅޭ އެ ގައުމުގައި މިހާތަނަށް ކޮވިޑް ވެކްސިންގެ 20 މިލިއަން ޑޯޒް ދީފައި ވެ އެވެ.
