ކޮވިޑް ވެކްސިން ޖެހުމަށް ކަނޑާއަޅާފައިވާ އާބާދީގެ 50 ޕަސެންޓު މީހުން ދެ ޑޯޒު ފުރިހަމަ ކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ން ބުނެފި އެވެ.
ރާއްޖޭގައި ވެކްސިންގެ ފުރަތަމަ ޑޯޒް ޖަހަން ފަށާފައިވަނީ މިދިޔަ ފެބްރުއަރީ މަހުގެ ފުރަތަމަ ދުވަހުން ފެށިގެންނެވެ. ދެވަނަ ޑޯޒު މިހާތަނަށް ދެ ލައްކައަށް ވުރެ ގިނަ މީހުން ޖަހާފައިވާއިރު، ފުރަތަމަ ޑޯޒު ވަނީ ތިން ލައްކައަށް ވުރެ ގިނަ މީހުން ޖަހާފަ އެވެ.
ޑރ. ފާތިމަތު ނަޒްލާ ރަފީގު ވިދާޅުވީ ވެކްސިން ޖަހަންޖެހޭ އުމުރުފުރާގެ ދެބައިކުޅައެއްބައި މީހުން ދެ ޑޯޒު ޖަހައި ވެކްސިން ފުރިހަމަކޮށްފައިވާ ކަމަށެވެ.
"މިހާރަށް ވެކްސިންގެ ދެވަނަ ޑޯޒް ދެވުނު މީހުންގެ ޖުމްލަ މިހާރު މި ވަނީ ވެކްޖަހަން ޖެހޭ އުމުރުފުރާގެ، އެއީ 18 އަހަރުން މަތީގެ 50 ޕަސެންޓް މީހުންނަށް މި ވަނީ ދެ ޑޯޒް ޖަހާ ފުރިހަމަ ކުރެވިފަ." ޑރ. ނަޒްލާ
އެޗްޕީއޭން ކަނޑައަޅާފައިވަނީ ރާއްޖޭގެ އާބާދީގެ 80 ޕަސެންޓަށް ކޮވިޑް ވެކްސިން ދޭ ގޮތަށެވެ.
ކޮވިޑުން ރައްކާތެރިވުމަށް ރާއްޖޭގައި ތިން ވައްތަރެއްގެ ވެކްސިން ޖަހަ އެވެ. އެއީ ކޮވިޝީލްޑް ވެކްސިނާއި ސިނޯފާމް ވެކްސިން އަދި ފައިޒާ ވެކްސިނެވެ.
ކޮވިޝީލްޑް ވެކްސިންގެ ސްޓޮކް ހުސްވެ އަލުން ވެކްސިން ލިބިގެން އެ ވެކްސިންގެ ދެވަނަ ޑޯޒް ޖަހަން ފަށާފައިވަނީ މީގެ ހަފްތާއެއްހާ ދުވަސް ކުރީންނެވެ.
