ކޮވިޑް-19 އިން ދިފާއުވާން ޖަހަމުން އަންނަ ވެކްސިން ޕްރޮގްރާމް މެދުކަނޑާލުމަށް ނިންމާފައިވާ ކަމަށް ހެލްތް އިމާޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.
ރާއްޖޭގެ ވެކްސިން ޕްރޮގްރާމް ފެށީ އިންޑިއާ އިން ހަދިޔާކުރީ 200،000 ޑޯޒުންނެވެ. ގިނަ ބަޔަކު ކޮވީޝީލްޑްގެ ފުރަތަމަ ޑޯޒު ޖަހައި، ދެވަނަ ޑޯޒުގެ އިންތިޒާރުގައި ތިއްބައި ވެކްސިން ނެތިގެން ދެވަނަ ޑޯޒު ޖެހުން މެދުކަނޑާލި އެވެ. އޭރު ގިނަ ބަޔަކު ފުރަތަމަ ޑޯޒު ޖެހިތާ އަށް ހަފުތާ އޮތީ ވެފަ އެވެ.
ނަމަވެސް އަމިއްލަ ފަރާތަކުން ދިން ކޮވިޝީލްޑްގެ އާ ޝިޕްމެންޓަކާއެކު އަނެއްކާވެސް ވެކްސިން ޕްރޮގްރާމް ފަށައިފައި ވަނީ މި މަހު އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ ތަރުޖަމާން ޑރ. ފާތިމަތު ނަޒްލާ މުސްތަފާ ވިދާޅުވީ ކޮވިޑް ވެކްސިން ޕްރަގްރާމް މި މަހުގެ 17 ވަނަ ދުވަހު މާލެ ސަރަހައްދުގައި މެދުކަނޑާލާނެ ކަމަށެވެ.
ވެކްސިން ޕްރަގްރާމް މެދުކަނޑާލުމަށް ފަހު ދެން ވެކްސިން ޖަހަން ފަށާނެ ވަކި ތާރީހެއް ނިންމާފައި ނުވާ ކަމަށާއި ތާރީހެއް ކަނޑައެޅުމުން އެކަން އާންމު ކުރާނެ ކަމަށްވެސް ނަޒްލާ ވިދާޅުވިއެވެ.
ވެކްސިން ޕްރޮގްރާމް ހުއްޓަލަން ނިންމާފައި މި ވަނީ އީދު ބަންދާ ދިމާކޮށެވެ. މި އަހަރުގެ ޖުލައި 19 ވަނަ ދުވަހަކީ ހައްޖު ދުވަހެވެ. އަދި 20 ވަނަ ދުވަހަކީ އަލްހާ އީދު ދުވަހެވެ.
