އަންނަ މަހު ފަށަން ތާވަލުކޮށްފައިވާ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ފަށަން ވާއިރަށް ޓީމުތަކުން އާ ކުޅުންތެރިން ގެނެސް އެ ކްލަބްތަކުގައި ތިބި ބައެއް ކުޅުންތެރިންގެ ކޮންޓްރެކްޓް އާކޮށް ޓީމު ވަރުގަދަކުރުމުގެ މަސައްކަތް ފަށައިފި އެވެ.
އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގައި މި ވަގުތު އޮތީ މާޒިޔާ އާއި އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރާ ކިންގްސް އެވެ. އެ ގްރޫޕްގެ ފަހު ޖާގަ ލިބޭނީ ޕްލޭއޮފްބުރުގައި އޮތް އީގަލްސް ނޫނީ އިންޑިއާގެ ބެންގަލޫރަށެވެ.
މިދިޔަ މެއި މަހު ރާއްޖޭގައި ބާއްވަން ނިންމައި އެންމެ ފަހު ވަގުތު ފަސްކުރަން ޖެހުނު އޭއެފްސީ ކަޕް މިހާރު ބާއްވަން ނިންމާފައި އޮތީ އަންނަ މަހު އެވެ. އެ މުބާރާތް ބާއްވަން މި ފަހަރު ބިޑްކުރި ދެ ގައުމަކީ ރާއްޖޭގެ އިތުރުން ބަންގްލަދޭޝް އެވެ. މެޗުތައް ހޯސްޓްކުރާނެ ގައުމެއް ވަރަށް އަވަހަށް އޭއެފްސީން ނިންމާނެ އެވެ. ބަންގްލަދޭޝްގެ ކޮވިޑް-19ގެ ހާލަތު ގޯސްވަމުންދާތީ މި ފަހަރު ވެސް ރާއްޖެ އަށް އޭއެފްސީ ކަޕް ހޯސްޓްކުރުމުގެ ފުރުސަތު ލިބޭނެ ކަމަށް ބެލެވެ އެވެ.
އޭއެފްސީ ކަޕަށް އެންމެ ފުރަތަމަ ގެނައި ކުޅުންތެރިންގެ ކޮންޓްރެކްޓް ހަމަވެ، ބައެއް ކުޅުންތެރިންގެ ކޮންޓްރެކްޓްތައް މިހާރު ވަނީ އާ ކޮށްފަ އެވެ.
"އަދަދު" އަށް މައުލޫމާތު ލިބިފައިވާ ގޮތުގައި އޭއެފްސީ ކަޕްގެ މެޗުތައް ބާއްވާނެ ހޯސްޓެއް ކަނޑައެޅުނުހާ އަވަހަށް ކޮންމެ ޓީމަކަށް ވެސް ޓީމު ލިސްޓަށް ބަދަލު ގެންނަން ފުރުސަތު ދޭން އޮތީ މަޝްވަރާކުރެވިފަ އެވެ. އޭއެފްސީގެ ވިސްނުމަކީ ފަހެއް ނޫނީ އަށް ބަދަލު ޓީމު ލިސްޓަށް ގެންނަން ފުރުސަތު ދޭށެެވެ.
އީގަލްސް އިން ވަނީ އެ ޓީމަށް ގެނައި ލެބަނަންގެ ކީޕަރު މުހައްމަދު ތޯހާގެ ކޮންޓްރެކްޓް އާ ކޮށްފަ އެވެ. އަދި އެ ޓީމުން އިތުރު ކުޅުންތެރިންނަށް ވެސް ފާރަލަމުން އަންނަކަމަށް މައުލޫމާތު ލިބެ އެވެ.
ރާއްޖޭގެ ޗެމްޕިއަން މާޒިޔާ އިން އޭއެފްސީ ކަޕްގެ މެޗުތަކަށް ޕްރެކްޓިސް ފަށާފައިވާއިރު، އެ ޓީމުން ވެސް ކޮންމެވެސް ވަރެއްގެ ބަދަލެއް ފެނުމުގެ ފުރުސަތު އެބައޮތެވެ.
އެންމެ ރަނގަޅު ޓްރާންސްފާތަކެއް މިހާތަނަށް ކުރީ އިންޑިއާގެ މޯހަން ބަގާން އިންނެވެ. އެ ޓީމުން ވަނީ މުމްބާއީ ސިޓީ އަށް ކުޅުނު އިންޑިއާ ގައުމީ ޓީމުގެ ކީޕަރު އަމްރިންދަރު ސިންގާއި ހަމަ އެ ޓީމަށް ކުޅުނު ފްރާންސްގެ މިޑްފީލްޑަރު ހޫގޯ ބޯމަސްގެ ސޮއި ހޯދައިފަ އެވެ. އެ ޓީމުން ގެނައި އެންމެ ފާހަގަކޮށްލެވޭ ކުޅުންތެރިއަކީ މި ފަހަރުގެ ޔޫރޯގައި ފިންލެންޑަށް ކުޅުނު ޖޯނީ ކައުކޯ އެވެ. އުމުރުން 30 އަހަރުގެ ކައުކޯ ވަނީ ބަދަލު ކުޅުންތެރިއެއްގެ ގޮތުގައި ޔޫރޯގައި ކުޅެފަ އެވެ. ބޯމަސް އަކީ އިންޑިއަން ސުޕަ ލީގުގައި މުމްބާއީ ޓީމުގައި މޮޅު ކުޅުމެއް ދައްކައި ގިނަ ލަނޑުތަކެއް ޖަހަން ފުރުސަތު ތަނަވަސްކޮށްދީފަ އެވެ.
ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އިން ވަނީ އެ ޓީމަށް ކުޅެމުން އައި ބްރެޒިލްގެ ފޯވާޑް ރޮބީނިއޯގެ ކޮންޓްރެކްޓް އިތުރު ތިން މަހަށް އާ ކޮށްފަ އެވެ.
މިހާރު އޭއެފްސީން ނިންމާފައިވާ ތާރީހުތަކަކީ އަންނަ މަހުގެ 15 ވަނަ ދުވަހު އީގަލްސް އާއި ބެންގަލޫރު ބައްދަލުކުރާ ޕްލޭއޮފް މެޗު ކުޅޭށެވެ. އަދި ގްރޫޕް ސްޓޭޖުގެ މެޗުތައް އަންނަ މަހު 18 އިން 24 އަށް ކުރިއަށް ގެންދާށެވެ.
