ސްޓޭޓް އިލެކްޓްރިކް ކޮންޕެނީ ލިމިޓެޑް (ސްޓެލްކޯ) އިން މާލޭގެ މީހުން ދިރިއުޅޭ ސަރަހައްދާއި މާ ގާތުގައި އެ ކުންފުނީގެ ޖަނަރޭޓަރުތަކާއި، ދުންހޮޅިތަކާއި، ތެޔޮތާންގިތައް ބެހެއްޓުމުގެ ސަބަބުން އެކިއެކި ގެއްލުންތައް ލިބެމުންދާތީ، އެ ސަރަހައްދުގައި ދިރިއުޅޭ މީހުންގެ ފަރާތުން ބަދަލު ހޯދަން ސިވިލް ކޯޓަށް ހުށަހަޅައިފި އެވެ.
ގަލޮޅުގައި ސްޓެލްކޯގެ މައި އިމާރާތުގައި ހުންނަ ޖަނެރޭޓަރުތަކާއި ދުންހޮޅިތަކުގެ ސަބަބުން އުނދަގޫތަކާއި ގެއްލުންތައް ލިބެމުންދާކަމަށް ބުނެ އެ ސަރަހައްދުގައި ދިރިއުޅޭ ރައްޔިތުން ޝަކުވާ ކުރަމުން އަންނަތާ އެތައް ދުވަހެއް ވެއްޖެ އެވެ.
ސްޓެލްކޯއަށް ވެސް އެ މައްސަލަ ތަކުރާރުކޮށް ހުށަހަޅައިގެން ހައްލެއް ލިބިފައިނުވާއިރު، އެ ސަރަހައްދުގައި ދިރިއުޅޭ ރައްޔިތުންގެ ފަރާތުން ޕަބްލިކް އިންޓްރެސްޓް ލޯ ސެންޓަރު (ޕީއައިއެލްސީ)އިން ސިވިލް ކޯޓަށް ހުށަހެޅި މައްސަލާގައި ބުނެފައިވަނީ ސްޓެލްކޯއިން ގާނޫނާ ހިލާފަށް އެ ސަރަހައްދުގައި ޖަނަރޭޓަރުތައް ބެހެއްޓުމުގެ ސަބަބުން އެ ސަރަހައްދުގައި ދިރިއުޅޭ މީހުންގެ ސިއްހަތަށް ވެސް ބޮޑެތި ގެއްލުންތައް ވަމުންދާ ކަމަށެވެ.
އެހެންކަމުން، ސްޓެލްކޯއިން ބަހައްޓާފައިވާ ޖަނަރޭޓަރުތައް އެހެން ތަނަކަށް ބަދަލުކުރުން ނޫނީ އެމީހުން އެކަށީގެންވާ އެހެން ސަރަހައްދަކަށް ބަދަލުކޮށްދިނުމާއެކު، އެކި ގޮތްގޮތުން ލިބިފައިވާ އަދި ލިބެމުންދާ ގެއްލުމުގެ ބަދަލު ހޯދުމަށް ދައުވާކުރުމުގެ ހައްގު އޮތް ކަމަށް ކަނޑައަޅައި ދިނުމަށް ކޯޓުގައި އެދިފައި ވެ އެވެ.
ސްޓެލްކޯ ޖެނެރޭޓަރުތަކާގުޅޭ މައްސަލައެއް މީގެ ކުރިން ވެސް ސިވިލް ކޯޓަށް ވަނީ ހުށަހަޅައިފަ އެވެ. އެ މައްސަލަ ހުށަހަޅާފައިވަނީ ގ. ފެހިހިރިގެ ވެރިފަރާތުންނެވެ. އެ މައްސަލާގައި އެދިފައިވަނީ އެގޭގައި ދިރިއުޅޭ މީހުން އެހެން ތަނަކަށް ބަދަލުކޮށްދިނުން ނުވަތަ ސްޓެލްކޯގެ ޖަނަރޭޓަރުތައް އެހެން ތަނަކަށް ބަދަލުކޮށް ދިނުމަށެވެ.
އާންމު ބޭނުންތަކުގެ ހިދުމަތާބެހޭ ގާނޫނުގެ ދަށުން ހަދާފައިވާ މާލެ އާއި ރައްޖޭގައި އާންމުކޮށް އިލެކްޓްރިކް ކަރަންޓް ދިނުމާބެހޭ ގަވާއިދުގައި އިންޖީނުގެ ހުންނަންވާނީ އަރާ ދުމުން، އާންމުންނަށް އުނދަގޫ ނުވާނެ ގޮތަށް މީހުން ދިރިއުޅޭ ސަރަހައްދާ މަދުވެގެން 200 ފޫޓު ދުރުގާކަމަށް ކަމަށް ބަޔާންކޮށްފައި ވެ އެވެ.
ނަމަވެސް، ސްޓެލްކޯގެ ދުންހޮޅިތައް ތިރިކަމުން، އެ ސަރަހައްދުގައި ދިރިއުޅެމުންދާ ރައްޔިތުންނަށް ތާއަބަދު ޖައްވުގައި ހުންނަ ތެޔޮވަސް ދުވާ، ޑީސަލް ތެޔޮ އަންދައިގެން އުފެދޭ ކަޅު ދުމުގެ ސަބަބުން ވައި ތަޣައްޔަރުވެ، ތަފާތު ބަލިތަކަށް މަގުފަހިވެފައިވާ ކަމަށް އެ ސަރަހައްދުގައި ދިރިއުޅޭ މީހުން ބުނެ އެވެ.
އަދި ސްޓެލްކޯގެ ޖަނަރޭޓަރުތަކުގެ ވައިބްރޭޝަންތަކުގެ ސަބަބުން ގޭގާ ޖަހާފައި ހުންނަ މުއްޓައް ތަކުރާރުކޮށް ގެއްލުން ލިބި، ފާރުތަކުގައި ރެނދުލައި، ކުޑަކުދިންނަށް ރޭގަނޑު ނުނިދި، މުޅި ދުވަހު ކުޑަދޮރުތައް ލައްޕައިގެން އުޅެން މަޖުބޫރުވެފައިވާ ކަމަށް ބުނެފައިވެ އެވެ.
މީގެ އިތުރުން، އެ ސަރަހައްދުގައި ބަހައްޓާފައި ހުރި ސްޓެލްކޯގެ ތެޔޮތާންގިތަކުގެ ސަބަބުން އަލިފާނުގެ ނުރައްކާތެރި ހާދިސާއެއް މެދުވެރިވެ ވަރަށް ގިނަ ބަޔަކަށް ގެއްލުންތަކެއް ވެދާނެކަމުގެ ބިރުހީވެފައި ކަމަށް ވެސް ބުންޏެވެ.
އެ މައްސަލަ މިހާރު ރައްޔިތުންގެ މަޖިލީހުގެ ސަމާލުކަމަށް ވެސް ގެނެސްފައިވާއިރު، އެ ކަން ހައްލުކުރުމަށް ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް މަޖިލީހަށް ހުށަހެޅުއްވި ގަރާރު ވަނީ ބަލައިގެންފަ އެވެ.
ޖެނެރޭޓަރުތަކުގެ އިތުރު މައްސަލައެއް ކޯޓަށް ވައްދާފައިވާއިރު، މާލެ-ހުޅުމާލެ ކަރަންޓު ވިއުގަ ގުޅާލުމުން އާންމުންނަށް އުނދަގޫތައް ކުރިމަތިވެފައިވާ ޖަނަރޭޓަރުތައް ނިއްވާލެވޭނެ ކަމަށެވެ.
އެގޮތުން، މި ހަފްތާގެ ނިޔަލަށް އެ ވިއުގަ ގުޅާލުމުގެ މަސައްކަތް ނިންމާލެވޭނެ ކަމަށް ސްޓެލްކޯ އިން މައުލޫމާތު ދީފައި ވެ އެވެ.
