ރައްޔިތުންގެ މަޖިލީހުގެ ދަގެނތީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު މުހައްމަދު ނާޒިމް އުފައްދަވަން އުޅޭ ޕާޓީއަކީ ރައީސް އިބްރާހިމް މުހައްމަދު ސޯލިހަށް އެމްޑީޕީގެ ރިޔާސީ ޓިކެޓް ނުލިބޭނެތީ އެ ފުރުސަތު ދިނުމަށް އުފައްދާ ޕާޓީއެއް ކަމަށް އިދިކޮޅު ކޯލިޝަނުން މިއަދު ބުނެފި އެވެ.
ނާޒިމާއި ތިމަރަފުށީ ދާއިރާގެ މެމްބަރު އަބްދުﷲ ރިޔާޒް އާ ސިޔާސީ ޕާޓީއެއް އުފެއްދެވުމަށް ޖުމްހޫރީ ޕާޓީ (ޖޭޕީ) އިން ވަނީ ވަކިވެވަޑައިގެންފަ އެވެ.
ޕީޕީއެމް/ޕީއެންސީ ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވީ ނާޒިމާ ސަރުކާރާ އޮންނަ ގުޅުން ރަނގަޅު ކަމަށެވެ. އޭނާ ޖޭޕީން ވަކިވި ނަމަވެސް އޭނާގެ "ޕެކޭޖު"ގައި ސަރުކާރުގެ މަގާމުތަކުގައި ތިއްބެވި ބޭފުޅުން ވަކި ނުކުރާ ކަން ވެސް ޝިޔާމް ފާހަގަކުރެއްވި އެވެ.
ނޫސްވެރިންގެ ބައްދަލުވުމުގައި އަހުމަދު ޝިޔާމް ވާހަކަ ދައްކަވަނީ: އޭނާ ވަނީ އަލަށް އުފައްދާ ޕާޓީއަށް ގިނަ ތުހުމަތުތަކެއް ކޮށްފައި-- ފޮޓޯ: ހުސައިން ޝަޔާހު/ އަދަދު
އޭގެ ތެރެއިން އެމްޓީސީސީގެ މެނޭޖިން ޑިރެކްޓާ އަދި ނާޒިމްގެ ކޮއްކޮ އާދަމް އާޒިމްގެ ނަން ޝިޔާމް ފާހަގަ ކުރެއްވި އެވެ.
"ތިބޭފުޅުން މިހާރު ވެސް ބައްލަވާ ގައުމުގައި ޑޮމެސްޓިކް ކުންފުންޏަކަށް އެންމެ ގިނަ ޕްރޮޖެކްޓްތަކެއް މިސަރުކާރުން ދެމުން އެގެންދަނީ އެބޭފުޅުންނަށް،" ނާޒިމްގެ އާއިލީ މަސްލަހަތު އޮންނަ އާރުސީސީ ކުންފުންޏަށް އިޝާރާތްކުރައްވައި ޝިޔާމް ވިދާޅުވި އެވެ.
ޝިޔާމް ވިދާޅުވީ އާ ސިޔާސީ ޕާޓީ އުފެއްދުމުގެ މަސައްކަތް ނާޒިމް އިސްވެ ކުރެއްވީ މަޖިލީހުގައި ޖޭޕީއަށް ކަނޑައަޅާފައިވާ ރޫމްގައި ތިއްބަވައިގެން ކަމަށެވެ. އެހެންކަމުން އަމިއްލަ ޕާޓީއަށް އިހުލާސްތެރި ނުވި ބަޔަކު ރައްޔިތުންނަށް އިހުލާސްތެރި ވާނެތޯ ޝިޔާމް ސުވާލު އުފެއްދެވި އެވެ.
އިދިކޮޅު ކޯލިޝަންގެ އެއްވެސް މަޖިލިސް މެމްބަރަކު އަލަށް އުފައްދާ ޕާޓީއާ ނުގުޅޭނެ ކަމަށް ވެސް ޝިޔާމް ވިދާޅުވި އެވެ.
ރާއްޖޭގައި 10 ޕާޓީއެއް މިހާރު ވެސް ރަޖިސްޓްރީކޮށްފައި އެބައޮތެވެ. އޭގެތެރެއިން ގާނޫނުގައި ޕާޓީއެއް އުފައްދަން ބޭނުންވާ 3،000 މެމްބަރުން ހަމަވަނީ މަދު ޕާޓީއެއްގަ އެވެ.
