ކާބުލް، އަފްގާނިސްތާން (ޖުލައި 11) - އަފްގާނިސްތާންގެ ކަންދަހާރްގައި ހަނގުރާމަ ވަރުގަދަ ކުރުމާއެކު އެ ތަނުގައި ހުންނަ އިންޑިއާ ކޮންޒިއުލޭޓްގެ 50 މުވައްޒަފުން ރައްކާތެރި ހިސާބަކަށް ގެންގޮސްފި އެވެ.
މިދިޔަ ހަފްތާގައި ތާލިބާނުން ބުނީ އަފްގާނިސްތާނުގެ 85 ޕަސެންޓު މިހާރު ކޮންޓްރޯލް ކުރަނީ އެ މީހުން ކަމަށެވެ. އަފްގާން ހަނގުރާމަ ވަރުގަދަވީ އެމެރިކާ ސިފައިން ފޭބުމުގެ މަސައްކަތާ ގުޅިގެންނެވެ.
އަފްގާނިސްތާނުގެ އެކި ހިސާބުތަކުގައި އަފްގާން ސިފައިންނާއި ތާލިބާނުންނާ ދެމެދު ވަރުގަދަ ހަމަލާތައް ބަދަލު ކުރަމުންދާއިރު، ތާލިބާނުން އެންމެ ފުރަތަމަ އުފެދުނު ކަންދަހާރް ސިޓީގައި ވެސް ހަމަނުޖެހުން ބޮޑެވެ.
"އިންޑިއާގެ ކޮންޒިއުލޭޓް ޖެނެރަލް ބަންދެއް ނުކުރޭ. އެކަމަކު ކަންދަހާރް ސިޓީ ކައިރީގައި ވަރުގަދަ ހަމަލާތައް ބަދަލު ކުރަމުން ދާތީ، އިންޑިއާ ރައްޔިތުން ވަނީ މި ވަގުތަށް ގެންގޮސްފައި،" އިންޑިއާގެ އެކްސްޓާނަލް އެފެއާޒް މިނިސްޓްރީގެ ބަޔާނެއްގައި ބުންޏެވެ.
"މިއީ މި ހާލަތު ހަމަޔަކަށް އެޅެން ދެން ވަގުތީ ގޮތުން އެޅި ފިޔަވަޅެއް. ކޮންޒިއުލޭޓުގައި މަސައްކަތް ކުރާ އަފްގާން ރައްޔިތުންނާއެކު އެ ތަނުގެ ހިދުމަތްތައް ކުރިއަށް ދާނެ".
ސަލާމަތީ މަސްދަރަކުން އޭއެފްޕީއަށް ބުނީ ހަ ޑިޕްލޮމެޓުން ހިމެނޭ ގޮތަށް އިންޑިއާގެ 50 ރައްޔިތުން ގެންދިޔަ ކަމަށެވެ. ނަމަވެސް އެމީހުން ގެންދިޔެއީ ކާބުލް ނުވަތަ ނިއު ދިއްލީއަށް ކަމެއް ސާފެއް ނޫނެވެ.
މިދިޔަ ހަފްތާގައި ރަޝިއާއިން ވަނީ މަޒަރީ ޝަރީފްގައި ހުންނަ އެ ގައުމުގެ ކޮންޒިއުލޭޓް ބަންދުކޮށްފަ އެވެ. އަދި ޗައިނާއިން ވަނީ އެ ގައުމުގެ 210 ރައްޔިތުން އަނބުރާ ގައުމަށް ގެންގޮސްފަ އެވެ.
ތާލިބާނުން އަންނަނީ ހަނގުރާމައިގައި ބޮޑެތި ކުރިއެރުންތަކެއް ހޯދައި، އަފްގާނިސްތާނުގެ މުހިއްމު ބޯޑަރު ސަރަހައްދުތައް ހިފަމުންނެވެ.
ވިހި އަހަރުގެ ދިގު ހަނގުރާމައަށް ފަހު ސެޕްޓެމްބަރު 11 ގެ ކުރިން އެމެރިކާ ސިފައިން އަފްގާނުން ފައިބަން މަސައްކަތް ކުރާއިރު، މިހާތަނަށް އެ މަސައްކަތުގެ 90 ޕަސެންޓު ވަނީ ނިމިފަ އެވެ.
