ރޯމް (ޖުލައި 9) - މިދިޔަ ހަތަރު ވަރަކަށް އަހަރު ތެރޭ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް އިން އޭނާ ވަކިކުރީ ކޯޗެއްގެ ގޮތުގައި ފެއިލްވެގެނެއް ނޫން ކަމަށް މަޝްހޫރު ކޯޗު ހޯސޭ މޮރީނިއޯ ބުނެފި އެވެ.
މެންޗެސްޓާ ޔުނައިޓެޑްގެ ކޯޗުކަމުން 2018 ވަނަ އަހަރު ވަކިކުރުމުން އަހަރެއްހާ ދުވަހު ޓީމަކާ ހަވާލުނުވެ، ހުރުމަށް ފަހު މޮރީނިއޯ ޓޮޓެންހަމާ ގުޅުނީ 2019 ވަނަ އަހަރު ފަހުކޮޅު އެވެ. އެ ޓީމަށް ކޯޗުކޮށްދިނީ 17 މަސް ދުވަހު އެވެ. މޮރީނިއޯ އެ ޓީމުން ވަކިވީ މިދިޔަ އޭޕްރީލް މަހު އެވެ. ޔުނައިޓެޑްގައި މޮރީނިއޯ ވަނީ ލީގު ކަޕާއި ޔޫރޮޕާ ލީގު ކާމިޔާބުކޮށްފަ އެވެ. ޓޮޓެންހަމް ކޯޗުކަމުން މޮރީނިއޯ ވަކިވިއިރު، އެ ޓީމު ލީގު ކަޕް ފައިނަލް ކުޅެން އޮތީ ހަފްތާ އަކަށް ވުރެ ކުޑަ ދުވަސްކޮޅަކަށް ވެފަ އެވެ.
"އަހަންނަށް ލިބޭ ވަރަށް ބޮޑު ނާކާމިޔާބީއެއްގެ ގޮތުގައި ސިފަކުރާ ބައެއް ކަންކަމަކީ އެހެން ކޯޗުންނަށް އަދި ކެރިއަރުގައި ވެސް ހާސިލްނުކުރެވޭ ކަންކަން. އެއީ އަހަންނަށް ވީމަ އޮންނަނީ ވަކި ގޮތެއް ކަމަށް ވެދާނެ. ނޫނީ ކުރިން ކާމިޔާބު ހޯދީމަ ވާ ކަމަކަށް ވެސް ވެދާނެ،" މޮރީނިއޯ ބުންޏެވެ.
މޮރީނިއޯ ބުނީ މީހުން ޝައުގުވެރިވަނީ ގޯސްކޮށް ދިޔަ ކަންތައްތަކުގެ ވާހަަކަ ދައްކަން ކަމަށާއި ރަނގަޅު މަސައްކަތެއް ފާހަގަކުރަން އަަބަދު ވެސް ތިބެނީ މަދު ބަޔަކު ކަމަށެެވެ.
"އަހަރެން އެންމެ ފަހުން ކޯޗު ކޮށްދިން ތިން ކްލަބަށް ބަލަމާ ހިނގާ. ޗެލްސީގައި އަހަރެން ޕްރިމިއާ ލީގު ހޯދިން. ޔުނައިޓެޑްގައި ތިން ޓްރޮފީ (ޔޫރޮޕާ ލިގާއި ލީގު ކަޕް އަދި ޗެރިޓީ ޝީލްޑް). ދެން ޓޮޓެންހަމް ގޮވައިގެން ލީގު ކަޕް ފައިނަލަކަށް ދިޔައިން. މިއީ އަހަރެންގެ ނަޒަރުގައި ފެއިލްވި މީހަކަށްވާނެ ކަމެއް ނޫން،" މޮރީނިއޯ ބުންޏެވެ.
ޖެހިލުންކުޑަ ކޯޗެއްގެ ގޮތުގައި ފާހަގަކުރެވޭ ޕޯޗުގަލްގެ މޮރީނިއޯ ވަނީ ކޯޗިން ކެރިއަރުގައި މިހާތަނަށް 25 ތަށި އުފުލާލައިފަ އެވެ. އޭނާ އެންމެ ފުރަތަމަ ފާހަަގަކުރެވުނީ ޕޯޗުގަލްގެ ޕޯޓޯގެ ކޯޗެއްގެ ގޮތުގަ އެވެ. އެ ޓީމަށް 2004 ގެ ޗެމްޕިއަންސް ލީގު ކާމިޔާބު ކޮށްދިނެވެ. ފަހުން މޮރީނިއޯ ވަނީ ތިން ގައުމެއްގައި ލީގު ޗެމްޕިއަންކަން ހޯދި މަދު ކޯޗުންގެ ތެރޭގައި ހިމެނިފަ އެވެ. އޭނާ ސްޕެނިޝް ލީގުގެ ތަށި އުފުލާލީ ރެއާލްގައި ހުރެ އެވެ.
އިންޓަ މިލާނަށް އިޓާލިއަން ލީގު ޗެމްޕިއަންކަން ހޯދައިދިން މޮރީނިއޯ ވަނީ މިިދިޔަ މެއި މަހު އިޓަލީގެ ރޯމާގެ ކޯޗުކަމާ ހަވާލުވެފަ އެވެ.
