ލަންޑަން (ޖުލައި 8) - ވިމްބަލްޑަން ޓެނިސް މުބާރާތުގެ ގަދަ 16 ކުޅުންތެރިންގެ ބުރުގެ ތެރެއިން އުމުރުން 18 އަހަރުގެ އެމާ ރަޑުކާނީ ނޭވާލާން އުނދަގޫ ވެގެން މެޗު ދޫކޮށްލަން ޖެހުނީ ރެލީތައް ދިޔަ ގޮތުން ކަމަށް އޭނާ ބުނެފި އެވެ.
ވިމްބަލްޑަންގެ ހަތަރު ވަނަ ބުރުގެ މެޗު ހުއްޓާލަން ޖެހުނުއިރު، އޮސްޓްރޭލިއާގެ އައިލާ ޓޮމިއާނޮވިޗާ ދެކޮޅަށް އެމާ އޮތީ 4-6 0-3 އިން ފަހަތުގަ އެވެ. ފުރަތަމަ ސެޓުގެ ތެރެއިން އެމާ އަށް ނޭވާލާން އުނދަގޫތަކެއް ދިމާވި އެވެ. ދެ ވަނަ ސެޓު ފެށިގެން އޭމާ އަށް ނޭވާލުމުގައި އިތުރަށް ދަތިތަކެއް ދިމާވެ، ޓްރެއިނަރަށް ގޮވާލި އެވެ. ކޯޓުގެ ބެންޗު އޭރިއާގެ ގޮނޑިމަތީގައި ބައިންދައިގެން އެމާ އަށް ފަރުވާދިނުމަށް ފަހު ބެލި ބެލުމުގައި ހާލަތު ރަނގަޅުނުވާތީ އެންމެ ފަހުން ނިންމީ މެޗު ދޫކޮށްލާށެވެ.
"މެޗު އެ ގޮތަށް ދޫކޮށްލާފައި ދާން ޖެހުމުން އެއީ ވަރަށް ހިތްދަތިކޮށް ދިމާވި ކަމެއް. ހަގީގަތުގައި އަހަންނަށް ނޭވާ ލުމުގައި އުނދަގޫތަކެއް ދިމާވަން ފެށީ ވަރަށް އިންޓެެންސްކޮށް ރެލީތަކެއް (ވާދަވެރިކޮށް ގާތްގާތުގައި ގިނަ ބޯޅަތަކެއް ކުޅެން ޖެހުން) ދިޔަ ހިސާބުން. ދެން އަހަންނަށް ބޭނުންވާ ވަރަށް ފޯކަސް ކުރަން ހަގީގަތުގައި އުނދަގޫ ވެގެން ހާސްވީ،" ދާދި ފަހުން އޭ ލެވެލް އިމްތިހާނު ނިންމުމަށް ފަހު މުޅިން އަލަށް މި ފަހަރުގެ ވިމްބަލްޑަންގައި ވާދަކުރި އެމާ ބުންޏެވެ.
ދުނިޔޭގެ ރޭންކިންގެ 338 ވަނައިގައި އޮތް އެމާ އަކީ އަލަތު މުބާރާތެއްގެ ގޮތުގައި ގްރޭންޑް ސްލޭމަކަށް (ޓެނިހުގެ ބޮޑު މުބާރާތަކަށް) ނުކުމެ ގަދަ 16 ކުޅުންތެރިންގެ ތެރެއިން ފުރުސަތު ހޯދި އިންގްލެންޑަށް އުފަން އެންމެ ހަގު އަންހެން ކުޅުންތެރިޔާ އެވެ. އަނެއް ކޮޅުން މިއީ 2002 ވަނަ އަހަރަށް ފަހު ވިމްބަލްޑަން ޓެނިސް މުބާރާތުގެ ހަތަރު ވަނަ ބުުރުން އުމުރުން 18 އަހަރުގެ ކުޅުންތެރިއަކަށް ފުރުސަތު ލިބުނު ފުރަތަމަ ފަހަރެވެ.
"މި މުބާރާތުގައި އެ ހުރިހާ ކަމެއް އެ ހިނގައިދިޔަ ހަފްތާއެއްހާ ދުވަސް ތެރޭގައި އަހަރެން ކުރި އުފާވެރި ތަޖުރިބާތައް ދުވަހަކު ވެސް ހަނދާނުން ނުފިލާނެ. މި ކޯޓަށް އެނބުރި އައިސް ރަނގަޅު ކުޅުމެއް ދައްކަން ބޭނުން. ކޮންމެ ކަމަކީ ވެސް ތަޖުރިބާއެއް،" ރޭންކިންގެ ކުރީގައި އޮތް ތިން ކުޅުންތެރިން އަތުން މި ފަހަރުގެ ވިމްބަލްޑަން މުބާރާތުގައި މޮޅުވި އެމާ ބުންޏެވެ.
އެމާ އަށް އެހެން ދިމާވީ ވިމްބަލްޑަން މުބާރާތް ޝެޑިއުލް ކޮށްފައި އޮތްގޮތުން ގާތްގާތުގައި ވާދަވެރި ގިނަ މެޗުތަކެއް ކުޅެން ޖެހުމުން ކަމަށް ބުނެ، މުބާރާތުގެ އިންތިޒާމްތަކަށް މީޑިއާގެ ފާޑުކިޔުން އަމާޒުވި އެވެ.
ވިމްބަލްޑަން އިން ނެރުނު ބަޔާނެއްގައި ބުނެފައިވަނީ މެޗުތައް ޝެޑިއުލް އޮންނަނީ އާންމުކޮށް ވެސް ޕްރޮފެޝަނަލް ޓެނިހުގައި ހުއްދަދޭ މިންގަނޑަށް ކަމަށާއި އެމާގެ ހާދިސާ އަކީ ކުއްލިއަކަށް ދިމާވި ކަމެއް ކަމަށެވެ.
އެމާ ބުނީ އޭނާ އަށް އެހެންދިމާވީ ޝެޑިއުލްގެ މައްސަލައަކުން ނޫން ކަމަށެވެ. އިތުރު މެޑިކަލް ޓެސްޓްތައް ހެދުމަށް ފަހު ވަރަށް އަވަހަށް ޓްރެއިނިން ފަށައި ކުރިއަށް އޮތް މުބާރާތްތަކުގައި ވާދަކުރާނެ ކަމަށް އެމާ ވަނީ ބުނެފަ އެވެ.
މި ފަހަރުގެ ވިމްބަލްޑަން އަށް ފަހު ދެން އިއުލާނުކުރާ ދުނިޔޭގެ ރޭންކިން އިން އެމާ އަށް ގަދަ 100 ކުޅުންތެރިންގެ ތެރެއިން ފުރުސަތު ލިބުމުގެ ފުރުސަތު ބޮޑެވެ. އަދި މި ފަހަރުގެ ވިމްބަލްޑަންގެ ތިން މެޗަކުން މޮޅުވެފައިވާތީ ފައިސާ އިނާމުގެ ގޮތުގައި އެމާ އަށް 250,000 ޑޮލަރު ލިބޭނެ އެވެ.
