ބޭރުގެ ސަފީރުންނާއި ޑިޕްލޮމެޓުންގެ ހަބަރުތައް ގެނެސްދޭއިރު ގާނޫނާއި ގަވައިދުތަކާ އެއްގޮތަށް އަމަލު ކުރުމަށް، މޯލްޑިވްސް މީޑިއާ ކައުންސިލް (އެމްއެމްސީ)ން މިއަދު އަންގައިފި އެވެ.
އިންޑިއާ ހައިކޮމިޝަންގެ ޑެޕިއުޓީ ހައިކޮމިޝަނަރާ ރޯހިތުއާ ގުޅޭ ގޮތުން "ދިޔަރެސް" ނޫޙުގައި ލިޔުނު ރިޕޯޓެއްގެ މައްސަލަ ބަލަން، އެމްއެމްސީއަށް މަޖިލީހުން ވަނީ އަންގައިފަ އެވެ. އިންޑިއާ ހައިކޮމިޝަނުން ވެސް ވަނީ ދިޔަރެސް ނޫހުގެ މައްސަލަ ބަލައިދިނުމަށް ފޮރިން މިނިސްޓްރީގައި އެދިފަ އެވެ.
އެމްއެމްސީން މިއަދު ނެރުނު ބަޔާނެއްގައި ބުނީ ސަފީރުންނާއި، ޑިޕްލޮމެޓިކް މިޝަންތަކުގައި މަސައްކަތްކުރައްވާ ޑިޕްލޮމޭޓުންގެ ކަރާމާތާއި އަބުރަށް ނޭދެވޭ އަސަރުކުރާ ގޮތަށް ރާއްޖޭގެ ބައެއް ނޫސްތަކުގައި ލިޔުންތައް ޝާއިއު ކުރާ ކަމުގެ ޝަކުވާ ކަމާ ބެހޭ އެކި ފަރާތްތަކުން އެ ކައުންސިލަށް ހުށަހަޅައިފައިވާ ކަމަށެވެ.
ބަޔާނުގައި ބުނެފައިވަނީ ބޭރު ގައުމުތަކުގެ ޑިޕްލޮމެޓިކް މިޝަންތަކާއި ޑިޕްލޮމޭޓުންގެ ސަލާމަތާއި ރައްކާތެރިކަމަށް ބުރޫއަރާ ފަދަ ހަބަރުތައް ފެތުރުމަކީ ބަލައިގަނެވޭނެކަމެއް ނޫން ކަމަށެވެ. އެފަދަ ކަންކަމުގެ ސަބަބުން ރާއްޖެއާއި ދޭދޭ ގައުމުތަކާއެކު އޮތް ގުޅުމަށް ބުރޫއަރައި، ވަކި ގައުމަކާމެދު އާންމު ރައްޔިތުން ދެކޭ ގޮތް ބަދަލު ލުވުމުގެ ސަބަބުން މުޅި ގައުމަށް އޭގެ ނޭދެވޭ އަސަރުތައް ކުރުން އެކަށީގެންވާ ކަމަށް ވެސް ބަޔާނުގައިވެ އެވެ.
"މި ކައުންސިލުން ދެކޭ ގޮތުގައި އެއްވެސް ގައުމަކާމެދު އޮންނަ ހާރިޖީ ގުޅުންތަކާ ބެހޭގޮތުން ހަގީގަތެއް ނެތް ވާހަކަތަކާއި، ކަނޑައެޅިގެން ދޮގު ހަބަރު ފެތުރުމަކީ، އެއްވެސް މީޑިއާއަކުން ކޮށްގެންވާނެ ކަމެއް ނޫން،" ބަޔާނުގައިވެ އެވެ.
އެމްއެމްސީން ބުނީ ނޫސްވެރިކަމުގެ މިނިވަން ކަމުގެ ހަމަތަކާއި ގަވައިދުތަކާ އެއްގޮތަށް ހަބަރު ފެތުރުމަށް އިލްތިމާސް ކުރާ ކަމަށެވެ. އަދި ރާއްޖެއިން ބައިވެރިވެފައިވާ ހުރިހާ ބައިނަލް އަގުވާމީ މުއާހަދާތަކަށްވެސް އިހުތިރާމްކުރުމާއެކު، ހަބަރާއި މައުލޫމާތު ފެތުރުމުގައި އަންގައިފައިވެ އެވެ.
އެމްއެމްސީން ބަޔާން ނެރެފައިވާއިރު ރޯހިތުގެ މައްސަލާގައި އެ ކޮމިޝަނުން އަމަލު ކުރި ގޮތެއް ލިޔުމުން މަޖިލީހަށް ހުށަހަޅަން މިނިވަން މުއައްސަސާތަކުގެ ކޮމެޓީން ވަނީ އަންގައިފަ އެވެ.
