ޑުބާއީ، ޔޫއޭއީ (ޖުލައި 8) - ޑުބާއީގެ މައި ބަނދަރު، ޖެބެލް އަލީ ޕޯޓުގައި ރޭ ބާރުގަދަ ގޮވުމަކާއެކު ރޯވި އަލިފާންގަނޑު ކޮންޓްރޯލްކޮށްފައިވާ ކަމަށް ޑުބާއީގެ މީޑިއާ އޮފީހުން ބުނެފި އެވެ.
އެ ހާދިސާގައި އެއްވެސް މީހަކު މަރުވެފައެއް ނުވެ އެވެ. ބަނދަރާ ކައިރި ހިސާބުގައި ހުރި ގެތަކަށް ވެސް ގޮވުމުގެ އަސަރު ކުރި ކަމަށް ރިޕޯޓުތައް ބުނެ އެވެ. ގޮވުން ދިމާވި ސަބަބު އަދި ޔަގީނެއް ނުވެ އެވެ.
ޑުބާއީ މީޑިއާ އޮފީހުން ބުނީ ގޮވުން ގޮވި ވަގުތު މުދާ އުފުލާ ބޯޓުން ދިޔެއީ ބަނދަރު ކުރަން ތައްޔާރުވަމުން ކަމަށެވެ.
ޑުބާއީގެ ފުލުހުން ބުނީ ބޯޓުގައި ހުރި 130 ކޮންޓެއިނަރުގެ ތެރެއިން ތިން ކޮންޓެއިނަރުގައި ހުރީ އަލިފާން ރޯވާ ޒާތުގެ ތަކެތި ކަމަށެވެ. ބޯޓުގައި 14 ކްރޫ މެމްބަރުން ތިއްބެވެ.
މިފަދަ ހާދިސާތަކަކީ ޑުބާއީގައި މަދު ހާދިސާތަކެކެވެ. ކުރިން ހަމައެކަނި ބަނދަރު ކުރާ މަރުކަޒެއްގެ ގޮތުގައި އޮތް ޑުބާއީއަކީ މިހާރު ދުނިޔޭގެ ދަތުރުފަތުރާއި ވިޔަފާރި އަދި މާލީ ކަންކަމުގެ ވެސް މައި މަރުކަޒެކެވެ.
