ލަންޑަން (ޖުލައި 7) - އިނގިރޭސި ޓީމުގެ ކެޕްޓަން ހެރީ ކޭން އަކީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކަހަލަ ނުރައްކާ ކުޅުންތެރިއެއް ކަމަށް ޑެންމާކްގެ ކުރީގެ ކޯޗު އާގާ ހެރައިޑް ބުނެފި އެވެ.
ޔޫރޯގެ ސެމީ ފައިނަލްގައި މިރޭ ޑެންމާކާއި އިންގްލެންޑް ބަައްދަލުކުރާނެ އެވެ. މި މެޗުން މޮޅުވާ ޓީމެއް ފައިނަލުގައި ކުޅޭނީ އިޓަލީއާ އެވެ. އިޓަލީ ފައިނަލުން ފުރުސަތު ހޯދީ ރޭ ޕެނަލްޓީ ޖަަހައިގެން ސްޕެއިން ބަލިކުރުމަށް ފަހު އެވެ.
މި ފަހަރުގެ ޔޫރޯގައި އިންގްލެންޑް ކުޅުނު ފުރަތަމަ ތިން މެޗުގައި ކޭން އަށް ގޯލެއް ނުޖެހުނު ކަމުގައި ވިޔަސް ކޭން ވަނީ ނޮކައުޓް ފުރަތަމަ ބުރުގައި ޖަރުމަނު ކޮޅަށް އެއް ގޯލު އަދި ކުއާޓާ ފައިނަލުގައި ޔޫކްރެއިން ކޮޅަށް ދެ ގޯލު ޖަހައިފަ އެވެ.
ހެރައިޑް ގަބޫލުކުރާގޮތުގައި މިރޭގެ މެޗުން އިންގްލެންޑް މޮޅުވާނަމަ ތަފާތަކަށްވާނީ ކޭން އެވެ.
"ކޭން އަކީ ރޮނާލްޑޯ ކަހަލަ ނުރައްކާ ކުޅުންތެރިއެއް. އޭނަ އަށް ފުރުސަތެއް ދީފިއްޔާ ގޯލު ޖަހާނެ،" ހެރައިޑް ބުންޏެވެ.
އޭނާ ބުނީ ކޭން އަށް ފުރަތަމަ މެޗުތަކުގައި ގޯލު ނުޖެހުނަސް އެއީ މާ ބޮޑަށް ކަންބޮޑުވާން ޖެހޭ ކަމެއް ނޫންކަން އޭނާގެ މަސައްކަތުގެ ރޭޓް ހުރި މިންވަރުން އެނގުނު ކަމަށެވެ.
"ފުރަތަމަ މެޗުތަކުގައި ކޭންގެ ނަސީބު ވެސް ނެތީ. ބައެއް ފަހަރު އެންމެ މޮޅު ކުޅުންތެރިޔާ އަށް ވެސް ނުކުޅެވޭ ފަހަރު އަންނާނެ. އެ ގޮތަށް ވިސްނާއިރު ކޭން އަށް ފުރަަތަމަ މެޗުތަކުގައި ނަސީބު ދެރަކޮށް ދިޔައީ. އެކަމަކު، އޭރު ވެސް ފެނުނު އެއް ޕާސް ނޫނީ ދެ ޕާސް ލަސްވެގެން ކޭން އަށް ރަނގަޅު ވަގުތު ބޯޅަ ނުދެވި ކަހަލަ ގޮތަކަށް އެ މެޗުތަކުގައި ދިޔައީ،" ހެރައިޑް ބުންޏެވެ.
ޑެންމާކުން މިރޭގެ ސެމީ ފައިނަލުގައި ނަތީޖާއެއް ނެރޭނަމަ ކޭން ހިފަހައްޓަން ޖެހޭނެ ކަމަށް ހެރައިޑް ބުނެފައިވެ އެވެ.
މި ފަހަރުގެ ޔޫރޯ އަކީ މިދިޔަ އަހަރު ބާއްވަން ފުރަތަމަ ތާވަލުކުރި މުބާރާތެކެވެ. އެކަމަކު ކޮވިޑާ ހެދި ފަސްުކުރަން ޖެހުނީ އެވެ.
މިދިޔަ އަހަރު ޔޫރޯ ބޭއްވި ނަމަ ޑެންމާކަށް ކޯޗުކޮށްދޭނީ ހެރައިޑް އެވެ. ޔޫރޯ ކޮލިފައިންގައި ޑެންމާކަށް ކޯޗުކޮށްދިނީ ހެރައިޑް އެވެ. އެކަމަކު، މިދިޔަ އަހަރު ޖުލައި އަށް ހެރައިޑްގެ ކޮންޓްރެކްޓް ހަމަވެ، އޭނާ އެ ޓީމު ދޫކޮށްލަން ޖެހުނީ އެވެ. ހެރައިޑްގެ ކޯޗުކަމުގައި ޑެންމާކް އެންމެ ފަހުން ކުޅުނު 34 މެޗުގައި ބަލިނުވެ އެވެ.
ހެރައިޑް ވަނީ މިހާރު ޑެންމާކުގައި ހުރި ކޯޗު ކެޝްޕާ ހިއުލްމަންޑް ކުރަމުން އަންނަ މަސައްކަތަށް ތައުރީފުކޮށްފަ އެވެ. މިރޭގެ މެޗަށް ނުކުންނައިރު، އިންގްލެންޑަކީ ފޭވަރިޓުން ކަމުގައި ވިޔަސް ނަތީޖާއެއް ނެރެވޭ ފެންވަރު ޑެންމާކް ޓީމުގެ އެބަހުރި ކަމަށް ހެރައިޑް ގަބޫލުކުރެ އެވެ.
