ކަރަންޓީނުގައި މިހާރު ތިބި މީހުންގެ ތެރެއިން ވެކްސިންގެ ދެ ޑޯޒް ފުރިހަމަކޮށްފައިވާ މީހުންގެ ޕީސީއާރް ޓެސްޓް ނަތީޖާ ނެގެޓިވް ވުމުން ކަރަންޓީނުން ދޫވާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
ވެކްސިންގެ ޑޯޒްތައް ފުރިހަމަކޮށްފައިވާ މީހުންނަށް އެޗްޕީއޭއިން ދިން ލުއިތައް މުރާޖާކުރަމުން އަންނަ އިރު، މިހާރު ކަރަންޓީނުގައި ތިބި މީހުންނާ މެދު އަމަލުކުރާނެ ގޮތެއް ކުރިން ހާމަކޮށްފައެއް ނުވެ އެވެ. އަދި ކުރިން އޮތް އުސޫލުގެ ތެރެއިން އެ މީހުން ކަރަންޓީނު މުއްދަތު ފުރިހަމަކުރަން ޖެހޭތީ ބަޔެއް މީހުން ވަނީ ލުއި ދިނުމުގައި ހަމަހަމަ ކަމެއް ނެތް ކަމަށް ބުނެ ޝަކުވާކޮށްފަ އެވެ.
އެޗްޕީއޭއިން ކަރަންޓީނުގައި ތިބި މީހުންނަށް ދިން ލުއިތަކުގެ ތެރެއިން މިހާރު ރަށްރަށަށް ދަތުރުކުރުމަށް ފަހު ކަރަންޓީނުގައި ތިބި މީހުންނާ އެކުގައި ދަތުރުކުރި ވެކްސިން ނުޖެހޭ އުމުރުފުރާގެ ކުދިންނާއި އަދި ރާއްޖެއިން ބޭރުން އައިސް ތިބި މީހުންނަށް ވެސް ޕީސީއާރް ޓެސްޓް ހުށައެޅުމުން ކަރަންޓީނުން ދޫކޮށްލާނެ އެވެ. އެކަމަކު ބޭރު ގައުމުތަކުން އަންނަ މީހުންގެ ޓެސްޓު ބަލައިގަންނަނީ ކަރަންޓީނުގައި ހަތް ދުވަސް ވުމުންނެވެ.
ބޭރު ގައުމުތަކުން އަންނަ މީހުންނާ މެދު އަމަލުކުރާ އުސޫލު ތަފާތުކުރި ސަބަބާއި ގުޅިގެން އެޗްޕީއޭއިން ބުނީ މިހާރު ދުނިޔޭގެ އެކި ގައުމުތަކުގައި ތަފާތު އެކި ވޭރިއަންޓްތައް ފެތުރެމުން ދާތީ، މި ނިންމުމަކީ އެކަމަށް ރިއާޔަތްކޮށް ކަނޑައަޅާފައިވާ އުސޫލެއް ކަމަށެވެ. އަދި މަގުސަދަކީ ލުއި ދިން ނަމަވެސް، ބަލި ފެތުރުން ވީހާ ވެސް ބޮޑަކަށް ކޮންޓްރޯލް ކުރުން ކަމަށް ބުންޏެވެ.
ކޮވިޑާ ގުޅިގެން ދަތުރުފަތުރު ކުރުމުގައި އަޅާފައިވާ ފިޔަވަޅުތަކަށް ދިން ލުއިތަކުގެ ތެރެއިން ވެކްސިން ޑޯޒް ފުރިހަމަކޮށްފައިވާ މީހުންނަށާއި ބަލި ޖެހުނު ފަހުން 60 ދުވަސް ނުވާ މީހުންނަށް ކަރަންޓީނު ނުވެ ދަތުރުކުރެވެ އެވެ. އެކަމަކު 72 ގަޑިއިރު ނުވާ ޕީސީއާރް ނެގެޓިވް ނަތީޖާއެއް ހުށައަޅަން ޖެހެ އެވެ. އަދި އެ މީހުންނާ އެކީ ދަތުރުކުރާ ކުޑަކުދިންނަށް ވެސް ހަމަ މި އުސޫލުގެ ތެރެއިން ކަރަންޓީނު ލުއި ލިބެ އެވެ.
ކަރަންޓީނު ނުވެ ދަތުރުކުރަން ލިބެނީ މޮނިޓަރިންގައި ނެތް ރަށްރަށަށް އެކަންޏެވެ. އަދި ކަރަންޓީނު ލުއި ލިބެނީ އެ މީހަކު ދަތުރުކުރާ ރަށެއްގެ ކޮވިޑް ހާލަތަށް ބަލާފަ އެވެ. އެގޮތުން ރަށުން ނަގާ ސާމްޕަލްތަކުގެ ތެރެއިން 5 ޕަސެންޓަށް ވުރެ މަތީގައި ޕޮޒިޓިވިޓީ ރޭޓް ހުރެއްޖެ ނަމަ، ވެކްސިން ފުރިހަމަ ކުރިޔަސް ކަރަންޓީނު ވާން ޖެހެ އެވެ.
