ނިއު ދިއްލީ (ޖުލައި 6) - މިދިޔަ ތިން އަހަރު ރާއްޖެ ހިމެނޭ ގޮތަށް އިންޑިއަން ސަބް ކޮންޓިނެންޓަށް ސްޕެނިޝް ލީގު (ލަލީގާ) ވަގުތުން ދައްކާފައިވަނީ ސޯޝަލް މީޑިއާ ޕްލެޓްފޯމް ފޭސްބުކް އިން ނަމަވެސް އަންނަ ސީޒަނުން ފެށިގެން ޓީވީން ލަލީގާ މެޗުތައް ދައްކަން ނިންމާފައިވާ ކަމަށެވެ.
އަންނަ ސީޒަނުން ފެށިގެން ތިން އަހަރަށް އިންޑިއަން ސަބް ކޮންޓިނެންޓްގައި ސްޕެނިޝް ލީގު (ލަލީގާ) ދެއްކުމުގެ ރައިޓްސް ގަނެފައިވަނީ ވަޔަކޮމް18 ޔޫތު ޗެނަލެއް ކަމަށްވާ އެމްޓީވީންނެވެ. އަދި މި އެއްބަސްވުމުގެ ތެރެއިން ޖިއޯ އާއި ވޫޓް ޕްލެޓްފޯމްތަކުން ލަލީގާ މެޗުތައް ފެންނާނެ ކަމަށް އިންޑިއާގެ ރިޕޯޓްތައް ބުނެ އެވެ.
ލަލީގާ އިން އިންޑިއާ އަށް ހަމަޖައްސާފައިވާ ޑިރެކްޓަރު ހޯސޭ އެންޓޯނިއޯ ވިދާޅުވީ މީގެ ތިން އަހަރު ކުރިން ފޭސްބުކަށް ލަލީގާގެ ރައިޓްސް ދިން އެންމެ ބޮޑު ސަބަބަކީ ތަފާތު ތަޖުރިބާއެއް ކުރުމުގެ ގޮތުން ކަމަށާއި އަލުން ޓީވީން ދައްކާ ގޮތަށް ހަމަޖެއްސީ ރަނގަޅަށް ހުރިހާ ކަމެއް ދިރާސާ ކުރުމަށް ފަހު ކަމަށެވެ.
"ފޭސްބުކް މެދުވެރިކޮށް ދެއްކިއިރު ކުރެވުނު ދިރާސާތަކުން ތަފާތު ހިޔާލުތަކެއް ލިބުނު. ދެން އެ ވިސްނުންތައް ހިފައިގެން އަލުން ޓީވީ އަށް އެނބުރި މިއައީ. އިންޑިއަން ސަބް ކޮންޓިނެންޓަކީ ލަލީގާގެ ވަރަށް ބޮޑު ފޭންބޭސް އެއް އޮތް ސަރަހައްދެއް،" އެންޓޯނިއޯ ވިދާޅުވި އެވެ.
އިންޑިއަން ސަބް ކޮންޓިނެންޓަކީ 1.3 ބިލިއަން މީހުންނަށް ވުރެ ބޮޑު އާބާދީއެއް ކަމަށާއި ލަލީގާ އަށް އަހަރެއްގެ މައްޗަށް ބަލާއިރު މި ސަރަހައްދުން ބޮޑު މާލީ މަންފާއެއް ކުރާ ކަމަށް އެންޓޯނިއޯ ވަނީ ފާހަގަކޮށްފަ އެވެ.
އެންމެ ކުރިން ސޮނީ ޕިކްޗާ ނެޓްވޯކުން ލަލީގާގެ ރައިޓްސް ގަތީ ސީޒަނަކަށް 32 މިލިއަން ޑޮލަރަށެވެ. ރިޕޯޓްތައް ބުނާގޮތުން ތިން އަހަރު ކުރިން ފޭސްބުކް އިން އެ ރައިޓްސް ހޯދީ ސީޒަނަކަށް ބަލާއިރު، 50 މިލިއަން ޑޮލަރަށް ވުރެ އިތުރަށް ލަލީގާ އަށް ފައިސާ ލިބޭ ޑީލެއްގެ ތެރެއިންނެވެ. މި ފަހަރު އަލުން ވަޔަކޮމް18 އަށް ލަލީގާގެ ރައިޓްސް ވިއްކި އަގެއް އަދި ހާމަކޮށްފައެއް ނުވެ އެވެ.
