މާލެ ސަރަހައްދުގައި ކޮވިޝީލްޑް ވެކްސިން ޖެހުމަށް އޮންލައިންކޮށް އެޕޮއިންޓްމަންޓް ހެއްދުމަށް ހާއްސަ ޕޯޓަލްއެއް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ތައާރަފުކޮށްފި އެވެ.
އެންމެ ފުރަތަމަ އިއުލާންކުރީ ފޯނުން ގުޅައިގެން އެޕޮއިންޓްމަންޓް ދޭ މީހުންނަށް އެކަނި ކޮވިޝީލްޑުގެ ދެ ވަނަ ޑޯޒް ޖަހާށެވެ. އެކަމަކު ފަހުން ފެބުރުއަރީ 1 އިން މާޗް 15 އާ ދެމެދު ކޮވިޝީލްޑުގެ ފުރަތަމަ ޑޯޒު ޖެހި މީހުންނަށް ކިއުބީ މެދުވެރިކޮށް ޓޯކެން ދޫކުރާގޮތަށް ހަމަޖެއްސުމަށްފަހު އަނެއްކާވެސް ރޭ ވަނީ ޕޯޓަލް އެއް ތައާރަފް ކޮށްފަ އެވެ.
ޕޯޓަލް އެއް ތައާރަފް ކޮށްފައި ވަނީ ވެކްސިން ޖެހުމުގެ އިންތިޒާމު ފަސޭހަ ކޮށްދިނުމަށް ކަމަށް އެޗްޕީއޭން ބުނެ އެވެ.
އެގޮތުން ފެބްރުއަރީ މަހާއި މާޗް މަހު ކޮވިޝީލްޑްގެ ފުރަތަމަ ޑޯޒް ޖެހި މީހުން ދެވަނަ ޑޯޒު ޖެހުމަށް ޕޯޓަލް މެދުވެރިކޮށް ބޭނުން ވަގުތަކަށް އެޕޮއިންޓުމަންޓު ހެދޭނެ ކަމަށް އެޗްޕީއޭއިން ބުނެ އެވެ. އަދި މިއަދުން ފެށިގެން މާލެ ސަރަހައްދުގައި ކޮވިޝީލްޑުގެ ދެވަނަ ޑޯޒް ޖެހޭނީ ހަމައެކަނި ޕޯޓަލް މެދުވެރިކޮށް އެޕޮއިންޓްމެންޓް ހައްދައިގެން ކަމަށް ވެސް އެޗްޕީއޭ އިން ބުނެ އެެވެ.
އެޗްޕީއޭން ބުނި ގޮތުގައި އެޕޮއިންޓްމަންޓް ހެއްދުމަށްފަހު ވަގުތަށް ނާދެވިއްޖެނަމަ ބުކިންގް ކެންސަލްވާނެ އެވެ. އަލުން ވެކްސިން ޖަހަން ބޭނުން ނަމަ ޖެހޭނީ އަނެއްކާ ވެސް އެޕޮއިންޓްމަންޓް ހަދަން ކަމަށް އެޗްޕީއޭ އިން ބުނެ އެވެ.
ރާއްޖޭގެ ވެކްސިން ޕްރޮގްރާމް ފެށީ އިންޑިއާ އިން ހަދިޔާކުރީ 200،000 ޑޯޒުންނެވެ. ގިނަ ބަޔަކު ކޮވިޝީލްޑްގެ ފުރަތަމަ ޑޯޒު ޖަހައި، ދެވަނަ ޑޯޒުގެ އިންތިޒާރުގައި ތިއްބައި ވެކްސިން ނެތިގެން ދެ ވަނަ ޑޯޒު ޖެހުން މެދުކަނޑާލި އެވެ. އޭރު ގިނަ ބަޔަކު ފުރަތަމަ ޑޯޒު ޖެހިތާ އަށް ހަފުތާ އޮތީ ވެފަ އެވެ.
ރާއްޖޭގައި އެންމެ ފުރަތަމަ ކޮވިޝީލްޑް ޖަހަން ފެށުމަށް ފަހު ދެ ވަނަ ޑޯޒުގެ މުއްދަތެއްގެ ގޮތުގައި ދިނީ އަށް ހަފުތާ އެވެ. ނަމަވެސް ފަހުން އެޗްއީއޯސީން ބުނެފައި ވަނީ ފުރަތަމަ ޑޯޒު ޖެހިތާ، 12 ހަފުތާ ފަހުން ދެ ވަނަ ޑޯޒު ޖެހުމަކުން މައްސަލައެއް ދިމައެއް ނުވާނެ ކަމަށެވެ.
