ބްރުސެލްސް (ޖުލައި 5) - ބެލްޖިއަމްގެ ކޯޗު ކަމުން ރޮބާޓޯ މާޓީނޭޒް ވަކިކުރުމުގެ ވިސްނުމެއް ނެތްކަމަށާއި އެއްބަސްވުމާ އެއްގޮތަށް އޭނާ ދެމިހުންނާނެ ކަމަށް ބެލްޖިއަމް ފުޓްބޯޅަ އެސޯސިއޭޝަނުން ބުނެފި އެވެ.
މާކް ވިލްމޮޓްސްގެ ކޯޗުކަމުގައި 2016 ވަނަ އަހަރުގެ ޔޫރޯ އިން ބެލްޖިއަމް ކެޓީ ކުއާޓާ ފައިނަލްގައި ވޭލްސް އަތުންނެވެ. ބެލްޖިއަމްގެ ކޯޗުކަމާ މާޓީނޭޒް ހަވާލުވީ 2016 ވަނަ އަހަރުގެ ޔޫރޯ އަށް ފަހު އެވެ. މާޓީނޭޒްގެ ކޯޗުކަމުގައި ބެލްޖިއަމުން ވަނީ 2018 ވަނަ އަހަރުގެ ވޯލްޑް ކަޕްގެ ތިން ވަނަ ހޯދައިފަ އެވެ. އެކަމަކު، މި ފަހަރުގެ ޔޫރޯގައި ވެސް ސެމީ ފައިނަލުގެ ކުރިން ބެލްޖިއަމް ވަނީ ކަޓައިފަ އެެވެ. އެއީ ކުއާޓާ ފައިނަލުގައި އިޓަލީ އަތުން ބަލިވުމުންނެވެ.
ބެލްޖިއަމާ އެކު މާޓީނޭޒް ހަދާފައިވާ އެއްބަސްވުން އަންނަ އަހަރުގެ ވޯލްޑް ކަޕްގެ ނިޔަލަށް ހަމަވާނެ އެވެ. އެކަމަކު އޭގެ ކުރިން މާޓީނޭޒް، ބެލްޖިއަމް ކޯޗުގެ މަގާމުން ވަކިކުރަން އުޅޭ ވާހަަކަތައް މީޑިއާގައި ދެކެވި، އެ ކަމާ ބެހޭގޮތުން ދެކޭ ގޮތެއް އޮޅުންފިލުވަން މީޑިއާ އިންކުރި ސުވާލުތަކަށް މާޓީނޭޒް ޖަވާބެއް ނުދެ އެވެ. އެ ސުވާލުތަކަށް ޖަވާބު ދިނީ ބެލްޖިއަމްގެ ފުޓްބޯޅަ އެސޯސިއޭޝަނުންނެވެ.
އެ އެސޯސިއޭޝަންގެ ޗީފް އެގްޒެކްޓިވް އޮފިސަރު ޕީޓާ ބޯސާޓް ވިދާޅުވީ މިހާރު ތައްޔާރު ސެޕްޓެމްބަރާއި އޮކްޓޫބަރު މަހު އޮތް މެޗުތަކަށް ކަމަށާއި ކޯޗު ބަދަލުކުރަން ޖެހޭ ކަމުގެ ވާހަކައެއް ރަސްމީ ސިފައެއްގައި ދައްކަން ޖެހޭ ސަބަބެއް ނެތް ކަމަށެވެ.
"އެ މެޗުތަކުގައި ވެސް (ކޯޗަކަށް) ހުންނާނީ މާޓީނޭޒް. އެ ނޫން ރަސްމީ ވާހަަކައެއް ދައްކަން ޖެހޭ ސަބަބެއް ނެތް. މާޓީނޭޒްގެ ކޮންޓްރެކްޓެއް އެބައޮތް. އޭގެއާ އެއްގޮތަށް ކުރިއަށްދާނެ،" ބޯސާޓް ވިދާޅުވި އެވެ.
މާޓީނޭޒް ވަނީ އިނގިރޭސި ޕްރިމިއާ ލީގުގެ ސްވަންސީ ސިޓީ އާއި ވިގަން އެތުލެޓިކް އަދި އެވަޓަން އަށް ކޯޗުކޮށްދީފަ އެވެ. ބެލްޖިއަމް އިން ވަކިވުމަށް ފަހު ކައިރި މުސްތަގުބަލެއްގައި ކްލަބް ފުޓްބޯޅަ އަށް އެނބުރި ދާން ޝައުގުވެރިކަން ހުރި ކަމަށް މާޓީނޭޒް ވަނީ މިދިޔަ އަހަރު ބުނެފަ އެވެ. ދާދި ފަހުން ޓޮޓެންހަމް ހޮޓްސްޕާސް އިން އާ ކޯޗެއް ހޯދުމުގެ މަސައްކަތުގައި އުޅުނުއިރު، މާޓީނޭޒާ ވެސް މަޝްވަރާކުރި އެވެ.
ބޯސާޓް ވިދާޅުވީ ބެލްޖިއަމް ދުނިޔޭގެ ރޭންކިންގެ އެއް ވަނައިގައި އޮންނަނީ މާޓީނޭޒްގެ ރަނގަޅު މަސައްކަތުން ކަމަށެވެ. އަދި މި ޓީމާ އެކު އޭނާ ހާސިލްކުރަން ބޭނުންވާ އެހެން ކަންކަން ވެސް އެބަހުރި ކަމަށް ބޯސާޓް ވިދާޅުވި އެވެ.
"އަހަންނަށް ހިއެއްނުވޭ އޭނަ މި ޓީމުން ވަކިވާނެހެން. އެއީ މި ވަގުތު މައްސަލައެއް ވެސް ނެތީމަ. ދެން އޭނަ ކުރަން ބޭނުންވާ މަސައްކަތެއް މި ޓިމަށް ކާމިޔާބެއް ހޯދައިދިނުމަކީ. އަދި ފުރުސަތު އެބައޮތް އެކަން ކުރަން،" ބޯސާޓް ވިދާޅުވި އެވެ.
ބެލްޖިއަމްގައި މިހާރު އޮތް އެ ގައުމުގެ ފުޓްބޯޅައިގެ ރަން ޖީލުގެ ކުޅުންތެރިންގެ ތެރެއިން ގިނަ ކުޅުންތެރިންތަކެއް އަންނަ އަހަރުގެ ވޯލްޑް ކަޕަށް ފަހު ގައުމީ ޓީމަށް ކުޅުން ހުއްޓާލާނެ އެވެ. އަންނަ އަހަރުގެ ވޯލްޑް ކަޕަކީ ބޮޑު މުބާރާތެއް ކާމިޔާބުު ކުރަން ބެލްޖިއަމަށް ލިބޭ ފަހު ފުރުސަތެވެ. އެ މުބާރާތަށް ތައްޔާރުވާން ބެލްޖިއަމްގެ ފުޓްބޯޅަ އެސޯސިއޭޝަނުން ހާއްސަ ޕްލޭންތަކެއް ގެންގުޅެ އެވެ. އެކަން ރޭވުމުގައި އެންމެ އިސްކޮށް ހަރަކާތްތެރިވާ އެކަކަކީ ކޯޗު މާޓީނޭޒް އެވެ.
