އިންޑިއާ ހައިކޮމިޝަންގެ ޑެޕިއުޓީ ހައިކޮމިޝަނަރާ ރޯހިތުއާ ގުޅޭ ގޮތުން "ދިޔަރެސް" ނޫޙުގައި ލިޔުނު ރިޕޯޓެއްގެ މައްސަލަ ބަލަން، މޯލްޑިވްސް މީޑިއާ ކައުންސިލް (އެމްއެމްސީ) އަށް އެންގީ ވަކި ގައުމެއްގެ މީހަކަށް ވެގެން ނޫން ކަމަށް މިނިވަން މުއައްސަސާތަކުގެ ކޮމެޓީން މިއަދު ބުނެފި އެވެ.
އިންޑިއާ ހައިކޮމިޝަނުން ވަނީ ދިޔަރެސް ނޫހުގެ މައްސަލަ ބަލައިދިނުމަށް ފޮރިން މިނިސްޓްރީގައި އެދިފަ އެވެ. އޭގެފަހުން، އެ މައްސަލަ ވަނީ ރައްޔިތުންގެ މަޖިލީހުގެ ފަރާތުން މީޑިއާ ކައުންސިލަށް ހުށަހަޅާފަ އެވެ.
އެމްއެމްސީގެ މެމްބަރުން ހާޒިރުކޮށް މިއަދު ބޭއްވި މިނިވަން މުއައްސަސާތަކުގެ ކޮމެޓީގައި އެ މައްސަލަ ކޮމެޓީއަށް ހުށަހެޅި ހެންވޭރު ދެކުނު ދާއިރާގެ އެމްޑީޕީގެ މެމްބަރު ހުސައިން ޝަހީމް (އަނދުން ހުސައިން) ވިދާޅުވީ ކޮމެޓީގައި އެކަމާ މެދު މަޝްވަރާ ކުރުމުގެ ބަދަލުގައި ޖަވާބު ބޭނުންވަނީ ލިޔުމަކުން ކަމަށެވެ.
އެހެންކަމުން ކޮމެޓީގެ މުގައްރިރު ރޮޒައިނާ އާދަމް، އެމްއެމްސީއަށް އެންގީ ރޯހިތުގެ ޝަކުވާއާ ގުޅިގެން އެ ކޮމިޝަނުން އަމަލު ކުރިގޮތް ލިޔުމުން ހުށަހެޅުމަށެވެ.
ރޮޒައިނާ ވިދާޅުވީ އިންޑިއާ ޑެޕިއުޓީ ހައި ކޮމިޝަނާ އެ މައްސަލަ ބަލައި ދޭން އޭނާގެ ގާތުގައި ނޭދޭ ކަމަށާއި އޭނާ ހިއްސާ ކުރީ ކަންބޮޑުވުންތަކެއް ކަމަށެވެ. ރޮޒައިނާ ގަބޫލު ކުރާ ގޮތުގައި މީހެއްގެ އަބުރު ކަތިލައި އެފަދަ ހަބަރެއް މީޑިއާއިން ގެނެސްފިނަމަ އެމްއެމްސީން އެކަން ބަލަން ވާނެ ކަމަށް އޭނާ ވިދާޅުވި އެވެ.
"އަޅުގަނޑުމެންނަކީ ވަކި ބޭފުޅަކު ނުވަތަ ވަކި ގައުމެއްގެ ބޭފުޅަކު ވެގެން މިކޮމެޓީން ބަލަމުން ދާ ބައެއް ނޫން. މީޑިއާ ތަކުން ޒިންމާދާރުކަމާއެކު މަސައްކަތް ކުރުމަށްޓަކައި އަޅުގަނޑުމެން ކުރަން ޖެހޭ މަސައްކަތްތަކެއް މީޑިއާ ކައުންސިލާ ގުޅިގެން އަޅުގަނޑުމެން މިހާތަނަވަސް ވެސް ކުރަމުން ދަނީ،" ރޮޒައިނާ ވިދާޅުވި އެވެ.
ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވީ މަޖިލީހުން އެމްއެމްސީއަށް ފޮނުވި ސިޓީގައި އޮތީ ރޯހިތު ނުރަސްމީކޮށް އެކޮމެޓީއަށް މައްސަލައެއް ހުށަހެޅުމާ ގުޅިގެން އެކަން ބަލައި ދިނުމަށް ކަމަށެވެ. ހާރިޖީ ކަންކަމުގައި ތިއްބަވާ ބޭފުޅުންނަކީ ވަކި ގޮތަކަށް އަމަލު ކުރަން ޖެހޭ ބަޔަކަށް ވާއިރު ޑިޕްލޮމެޓިކް ޗެނަލް ނޫން ގޮތަކަށް އަންނަ ޝަކުވާތައް ރައްޔިތުން މަޖިލީހުގެ ކޮމެޓީތަކުން ބަލާ ކަމަށްވާނަމަ އެއީ ސީރިއަސް މައްސަލައެއް ކަމަށް އުޝާމް ވިދާޅުވި އެވެ.
އެކަމަށް ރައްދު ދެއްވައި ރޮޒައިނާ ވިދާޅުވީ އެ ކޮމެޓީން މައްސަލަ ބަލަނީ ވަކި ގައުމެއްގެ މީހެއްގެ މައްސަލަ ނޫން ކަމަށެވެ.
