ރ. އަލިފުށީގައި އަންހެނަކު ރޭޕްކުރި ކަމަށް ތުހުމަތުކުރާ މައްސަލައެއްގައި މީހެއްގެ މައްޗަށް މިއަދު ދައުވާ އުފުލައިފި އެވެ.
ޕްރޮސިކިއުޓާ ޖެނަރަލް އޮފީހުގެ ފަރާތުން ރޭޕް ކުރުމުގެ ދައުވާ އުފުލާފައިވަނީ އަލިފުށީ ރޯޝަނީއާގެ، ނާއިލް އަބްދުﷲގެ މައްޗަށެވެ.
އޭނާގެ މައްޗަށް ދައުވާކޮށްފައިވަނީ މިދިޔަ މާޗު މަހު އޭނާއަށް ތުހުމަތު ކުރި މައްސަލައަކާ ގުޅިގެންނެވެ.
އެގޮތުން، އެ ދުވަހު އަލިފުށީގެ ގެއަކަށް ވަދެ، ކޮޓަރިއެއްގައި ނިދާފައި އޮތް އަންހެނަކާމެދު ގަދަކަމުން ޖިންސީ ގުޅުން ހިންގި ކަމުގެ ތުހުމަތު އޭނާ ކުރެ އެވެ.
އެ މައްސަލާގެ ތަހުގީގު ނިންމައި، ޕްރޮސިކިއުޓާ ޖެނަރަލްގެ އޮފީހަށް ފޮނުވާފައިވަނީ މިދިޔަ ޖޫން މަހުގެ 24 ވަނަ ދުވަހު އެވެ.
އެނގިފައިވާ ގޮތުގައި، ނާއިލް އަބްދުﷲގެ މައްޗަށް ރޭޕްގެ ދައުވާ ކޮށްފައިވަނީ އޭނާއާ ދެކޮޅަށް ޑީއެންއޭ ހެކި ވެސް ތަހުގީގުގައި ލިބިފައިވާތީ އެވެ.
ޕްރޮސިކިއުޓާ ޖެނަރަލް ހުސެއިން ޝަމީމް މީގެކުރިން ވިދާޅުވެފައިވާ ގޮތުގައި ޖިންސީ ގޯނާގެ މައްސަލަތަކަކީ އެ އޮފީހުން ހާއްސަ އިސްކަމެއް ދީގެން ދައުވާ ކުރަމުންދާ މައްސަލަތަކެކެވެ. އެގޮތުން، އެކަމުގައި ބޮޑެތި ކުރިއެރުންތަކެއް ހޯދާފައިވާ ކަމަށް ވެސް ޝަމީމް ވިދާޅުވެފައިވެ އެވެ.
މިދިޔަ ހަފުތާ ވެސް ފުވަމުއްލައް ކޯޓުން ވަނީ ދޮންދަރިއަށް ޖިންސީ ގޯނާކުރި ކަމުގެ ކުށް މީހެއްގެ މައްޗަށް ސާބިތުވާ ކަމަށް ކަނޑައަޅައި، 32 އަހަރުގެ ޖަލު ހުކުމެއް އިއްވާފަ އެވެ.
އެ ހުކުމަކީ ވެސް ޝަމީމް ވިދާޅުވެފައިވާ ގޮތުން، ޖިންސީ ގޯނާއާ ދެކޮޅަށް އެ އޮފީހާއި ތަހުގީގީ އިދާރާތަކުން ކުރަމުންދާ މަސައްކަތަށް ލިބުނު ކާމިޔާބެއް އަދި އުއްމީދެކެވެ.
