އއ. މާޅޮހުގެ އާބާދީ އިތުރު ކުރަން ހިތްވަރު ދިނުމުގެ ގޮތުން އަލަށް އުފަންވާ ކުދިންގެ ތެރެއިން އެރަށުގެ ރަޖިސްޓްރީގައި ޖައްސާ ކޮންމެ ކުއްޖަކަށް ހަދިޔާ ފޮއްޓެއް ދޭން އެ ރަށު ކައުންސިލުން ނިންމައިފި އެވެ.
އެ ރަށު ކައުންސިލުން މިއަދު އާއްމު ކުރި އުސޫލުގައި ބުނަނީ އެ ރަށުގައި ރަޖިސްޓްރީ ކުރާ އެއް އަހަރުން ދަށުގެ ކުދިންނަށް ހަދިޔާ ފޮށި ދޭނެ ކަމަށެވެ. އެ ހަދިޔާ ފޮށީގައި ހިމެނެނީ 350 ރުފިޔާ އާއި 500 ރުފިޔާއާ ދެމެދުގެ އަގުގެ އެންމެ ތުއްތު ކުދިންނަށް ބޭނުންވާ ސާމާނެވެ.
ހަދިޔާ ހުންނަން ވާނީ ޕާރުސަލް ކޮށްފައި ކަމަށް ވެސް އުސޫލުގައި ބުނެ އެވެ.
އުސޫލުގައި ބުނާގޮތުން އެ ރަށުގައި އުފަންވި ނަމަވެސް ރަށު ރަޖިސްޓްރީގައި ނުޖައްސާ ކުދިންނަށް ހަދިޔާއެއް ނުލިބޭނެ އެވެ.
އެކަން ކުރާ ސަބަބާ ގުޅޭގޮތުން، އާބާދީގައި 756 މީހުން ހިމެނޭ މާޅޮހު ކައުންސިލްގެ ރައީސް އިސްމާއިލް ނަސީރު މިރޭ "އަދަދު" އަށް ވިދާޅުވީ އެހެން ރަށްރަށު މީހުންނާ އިނދެގެން އުޅޭ އެ ރަށު މީހުންނަށް ލިބޭ ކުދިން އެހެން ރަށްރަށުގައި ރަޖިސްޓްރީ ކުރާތީ އެކަން މަދު ކުރުމަށް ކައުންސިލުން ބޭނުންވާ ކަމަށެވެ.
"ރަށުގެ އާބާދީ އިތުރު ކުރަން ހިތްވަރު ދިނުން މީގެ އެއް މަގުސަދަކީ،" އިސްމާއިލް ވިދާޅުވި އެވެ.
އެމްޑީޕީގެ ފަސް ކައުންސިލަރުން ތިބޭ މާޅޮހުގެ ކައުންސިލް މެމްބަރުން ކެމްޕެއިންގެ ވައުދުގެ ތެރޭގައި އެރަށު ރަޖިސްޓްރީގައި ޖައްސާ ކޮންމެ ކުއްޖަކަށް ހަދިޔާ ދިނުން ހިމެނެ އެވެ.
އެ ވައުދުވީ އެއީ މިސަރުކާރުގެ ވައުދަކަށް ވާތީ ކަމަށް އިސްމާއިލް ވިދާޅުވި އެވެ. އެ ހަދިޔާ ދޭނީ ކައުންސިލް ބަޖެޓުން ކަމަށް ވެސް އޭނާ ވިދާޅުވި އެވެ.
އުފަންވާ ކޮންމެ ކުއްޖަކަށް ހަދިޔާއެއް ދިނުމަކީ މިސަރުކާރުގެ ވައުދަކަށް ވީނަމަވެސް މިހާތަނަށް އެ ވައުދު ފުއްދާފައެއް ނުވެ އެވެ.
