ލަންޑަން، އިނގިރޭސި ވިލާތް (ޖުލައި 4) - ކޮރޯނާވައިރަސް ބަލިމަޑުކަން ފެށުނުތާ 18 މަސް ފަހުން ކޮންޓެއިނަރު ޝިޕްކުރާ އަގު ރިކޯޑް މިންވަރަށް މައްޗަށް ހިނގައްޖެ އެވެ.
"އަޅުގަނޑުމެންނަށް ދަނީ މުދާ އުފުލާ ކަނޑު އުޅަނދާއި ކޮންޓެއިނަރު ލިބުމުގެ ދަތިކަމާ ދިމާވަމުން،" ޑިމާންޑް އުފުލިފައިވާކަން ފާހަގަކޮށް ސީ އިންޓެލިޖެންސް ކޮންޒަލްޓެންސީ ކުންފުނީގެ އެލެން މާފީ އޭއެފްޕީއަށް ބުންޏެވެ.
"ހުސް ކޮންޓެއިނަރު ހޯދުމުގެ ދަތިކަން އިންތިހާއަށް ދަނީ ކުރިމަތިވަމުން،"
ބޮޑެތި ޝިޕިން ރޫޓްތައް ބެންޗުމާކް ކުރާ ފްރެއިޓޯޒް ބޯލްޓިކް އިންޑެކްސްއިން ދައްކާ ގޮތުގައި ޗައިނާއިން އެމެރިކާގެ ހުޅަނގު އައްސޭރިއަށް މުދާ އުފުލާ ދަތުރެއްގެ އަގު އެއް އަހަރު ތެރޭ ވަނީ ތިން ގުނަ މައްޗަށް ޖެހި ގާތްގަނޑަކަށް 7000 ޑޮލަރަށް އަރާފަ އެވެ.
ޔޫރަޕަށް ކުރާ ދަތުރެއްގެ އަގު މިދިޔަ އަހަރުގެ ޖުލައި މަހު 1،600 ޑޮލަރުގައި ހުރިއިރު، މި އަހަރުގެ ޖުލައި މަހު އުޅެނީ 10،000 ޑޮލަރުގަ އެވެ.
ލޮމްބާޑް އޮޑިއާ އިންވެސްޓްމެންޓްސް މެނޭޖާޒްގެ ޑިޑިއޭ ރަބައްޓޫ ބުނީ ބަލިމަޑުކަމާއެކު އެންމެ ފުރަތަމަ ޝިޕިން އިންޑަސްޓްރީ ހުއްޓުމަކަށް އައި ނަމަވެސް ފަހުން ޑިމާންޑް އުފުލުނު ކަމަށެވެ.
އެގޮތުން އެމެރިކާ އާއި ޔޫރަޕްގެ މީހުން ރެސްޓޯރެންޓުތަކާއި ތިއޭޓަރުތަކާއި ޗުއްޓީއަށް ހޭދަކުރުން ހުއްޓި، އޭޝިއާއިން އިމްޕޯޓް ކުރާ މުދާ ގަތުމަށް ހޭދަކުރަން ފެށި އެވެ.
ބައެއް ކުންފުނިތަކަށް ބަލާއިރު، ފްރާންސްގެ ސީއެމްއޭ ސީޖީއެމް ކޮންޓެއިނަރު އަދި ޝިޕިން ކުންފުންޏަށް ވަނީ މި އަހަރުގެ ފުރަތަމަ ކުއާޓަރުގައި ދެ ބިލިއަން ޑޮލަރުގެ ސާފު ފައިދާ ލިބިފަ އެވެ. މިއީ މިދިޔަ އަހަރުގެ އެ މުއްދަތާ އަޅާ ބަލާއިރު 40 ގުނަ އިތުރު އަދަދެކެވެ.
ޑެންމާކުގެ އޭޕީ މޮލާ މައެސްކް އަށް މި އަހަރުގެ ފުރަތަމަ ތިން މަހު ލިބުނީ 2.7 ބިލިއަން ޑޮލަރުގެ ސާފު ފައިދާ އެވެ. އެއީ މިދިޔަ އަހަރާ އަޅާ ބަލާއިރު 13 ގުނަ އިތުރު އަދަދެކެވެ.
ފްރާންސްގެ މެރިޓައިމް ސާވިސް ޕްރޮފެޝަނަލްސް، އާމެޗާޒް ޑެ ފްރާންސުގެ ޖޯން މާކް ލަކާވް ބުނީ ބަލިމަޑުކަމުގެ ކުރިން އޮތް ގޮތަށް ހާލަތު ބަދަލު ވާނީ 2022 ވަނަ އަހަރުގެ ފުރަތަމަ ކުއާޓަރުގައި ކަމަށް ބެލެވޭ ކަމަށެވެ.
