މާލޭގެ ދަފްތަރުގައި ޖެހިފައި ތިބި މީހުންގެ ތެރެއިން ސަރުކާރުގެ ގެދޮރުވެރިކަމުގެ މަޝްރޫއަކުން ފްލެޓް ނުވަތަ ގޯތި ލިބިފައި ތިބި މީހުން ދަފްތަރުން އުނިކުރުމަށް މާލެ ސިޓީ ކައުންސިލުން ނިންމައިފި އެވެ.
އެ ނިންމުން ނިންމާފައި ވަނީ، މިދިޔަ ބުދަ ދުވަހު ބޭއްވުނު މާލޭ ސިޓީ ކައުންސިލްގެ ޖަލްސާގަ އެވެ. އެ ގޮތަށް ނިންމާފައިވަނީ 16 މެމްބަރުންގެ އަގުލަބިއްޔަތުންނެވެ.
މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ ސަރުކާރުގެ މަޝްރޫއުތަކުން ފްލެޓް އަދި ގޯތި ލިބުނު ފަރާތްތައް ދަފްތަރުން އުނިކުރަން ނިންމައި އަދި މައިމުޅަވެފައިވާ މީހުން ދެނެގަތުމަށް އެމީހުންގެ ފަރާތުން މައުލޫމާތު ހިއްސާކުރުމަށް ހުޅުވާލަން ނިންމާފައިވާ ކަމަށެވެ.
ސަރުކާރުގެ މަޝްރޫއަކުން ބޯހިޔާވަހިކަން ލިބުނު ފަރާތްތައް މާލޭގެ ދަފްތަރުން އުނިކުރުމަށް ނިންމާފައި ވާއިރު، މާލޭ ދަފްތަރުގައި ޖެހުމުގެ ފުރުސަތު ސަރުކާރުން ހުޅުވާލާފައި ވަނީ 1994 އަހަރު އެވެ. ނަމަވެސް މިހާރު އެކަން ވަނީ މެދުކަނޑާލާފަ އެވެ.
މީގެ ކުރިން ބޭއްވި ބައްދަލުވުމެއްގައި ޑރ. މުއިއްޒު ވިދާޅުވެފައި ވަނީ މާލޭގެ ދަފްތަރުގައި ޖެހިފައިވާ ރައްޔިތުންނަށް ގެދޮރު މައްސަލަ ހައްލު ކުރާނެ ގޮތުގެ މަގު ޗާޓެއް އެކުލަވާލުމަށް ސަރުކާރާއެކު މަސައްކަތް ކުރައްވާނެ ކަމަށެވެ.
އަދި އެކަން ހައްލުކުރުމުގައި ގެންގުޅޭ އުސޫލު ހަރުދަނާކޮށް، އެކަން ކުރެވޭނެ ގޮތެއް ދެނެގަނެ، ގާނޫނަކަށް ބަދަލު ގެންނަން ޖެހޭނަމަ އެކަންވެސް ކުރައްވާނެ ކަމަށް ވެސް މޭޔަރު ވަނީ ވިދާޅުވެފަ އެވެ.
