ހައިކޯޓުގައި މައްސަލަތައް ބަލައިގަނެ، ރަޖިސްޓްރީކޮށްދޭ މުއްދަތު މާދިގުވެގެންދާތީ، ޕްރޮސިކިއުޓާ ޖެނަރަލް ހުސެއިން ޝަމީމް ކަންބޮޑުވުން ފާޅުކުރައްވައިފި އެވެ.
ޝަމީމް މި ކަންބޮޑުވުން ފާޅުކުރައްވާފައިވަނީ ކުރިމިނަލް ކޯޓުގައި ކުރީގެ ޓޫރިޒަމް މިނިސްޓަރު އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންދިޔަ ނިންމުން ހައިކޯޓުގައި އިސްތިއުނާފަށް ހުށަހެޅިތާ ހަފުތާއެއް ފަހުން ބަލައިގެންފައިވަނިކޮށެވެ.
ކުރިމިނަލް ކޯޓުގައި ކުރިއަށްދާ ޝަރީއަތް ހިނގަމުންދާ ގޮތާމެދު ކަންބޮޑުވުން އޮތް މައްސަލައެއް ކަމުން އެ މައްސަލަ ވީއެންމެ އަވަހަކަށް ހައިކޯޓުގައި ގޮތެއް ކަނޑައަޅަން ޖެހޭ ކަމަށް ޝަމީމް ގަބޫލު ކުރައްވަ އެވެ.
ޖިނާއީ އިޖުރާއަތުގެ ގާނޫނުގައި ވެސް ބުނަނީ ކޯޓަކުން ނިންމާ އަމުރެއް އިސްތިއުނާފުކުރާނަމަ، އެ ކަމަށް 48 ގަޑިއިރު ތެރޭ ހުށަހަޅަންވާނެ ކަމާއި އަދި ހަތް ދުވަސް ތެރޭ އިސްތިއުނާފު ކޯޓުން އެ މައްސަލަ ނިންމަން ޖެހޭނެ ކަމަށެވެ.
ނަމަވެސް، މައްސަލަ ބަލައިގަނެ ރަޖިސްޓްރީކުރަން ޖެހޭނެ ވަކި މުއްދަތެއް ގާނޫނުގައި ނޯވެ އެވެ. އެހެންވެ، އެކި މައްސަލަތައް ބަލައިގަނެ، ރަޖިސްޓްރީކުރަނީ އެކި މުއްދަތުތަކުގަ އެވެ.
އެހެންވެ، ކޯޓު އަމުރާ ގުޅޭ ގިނަ މައްސަލަތައް ގާނޫނުގައި ބުނާ މުއްދަތުގެ ތެރޭ ނިންމޭ ގޮތެއް ނުވެ އެވެ.
ޕްރޮސިކިއުޓާ ޖެނަރަލް ފާހަގަ ކުރައްވާ ގޮތުގައި، އެކަން އެހެން ވެގެން ދަނީ ރަޖިސްޓްރޭޝަންގައި މާގިނަ މުއްދަތު ނަގާތީ އެވެ. އެކަމުގެ ސަބަބުން ގާނޫނުން ހާސިލުކުރަން ބޭނުންވާ ނަތީޖާތައް ހާސިލުވެގެން ނުދާކަން އޭނާ ފާހަގަ ކުރެއްވި އެވެ.
"އަޅުގަނޑުމެން އުއްމީދުކުރަން ހައިކޯޓުގެ ރަޖިސްޓްރޭޝަންގެ މަސައްކަތް މިހާރަށްވުރެ ކުރިއަށް އޮތްތަނުގައި އަވަސްވާނެ ކަމަށް،" ޝަމީމް ވިދާޅުވި އެވެ. "އުއްމީދު ކުރަނީ ކުރިއަށް އޮތް ތަނުގައި އެކަން ރަނގަޅުވެގެން ދާނެ ކަމަށް، އަދި މައްސަލަތައް އަވަހަށް ހިނގިގެން ދާނެ ކަމަށް،"
ޝަމީމް ވިދާޅުވި ގޮތުގައި، މައްސަލައެއް ރަޖިސްޓްރީކުރުމަށް ގިނަ މުއްދަތެއް ހޭދަވި ނަމަވެސް، ފަނޑިޔާރުންގެ އަތްޕުޅަށް މައްސަލަ ލިބޭ ހިސާބުން ވަރަށް ބާރަށް މައްސަލަ ކުރިއަށް ގެންގޮސް ގޮތެއް ނިންމާކަން ފާހަގަކުރެވެ އެވެ.
ހައިކޯޓުގެ ރަޖިސްޓްރާގެ މަގާމުގައި މިހާރު ހުންނެވީ، އެ މަގާމަށް 2018 ވަނަ އަހަރު އައްޔަން ކުރެއްވި މަރިޔަމް ހޫރުޝީދާ އެވެ. އެސިސްޓެންޓް ލީގަލް އޮފިސަރެއްގެ ގޮތުގައި ހުންނެވި ހޫރުޝީދާ، ރަޖިސްޓްރާގެ މަގާމަށް އައްޔަންކުރީ އެ މަގާމު ހުސްކޮށް އޮންނަތާ ގިނަ ދުވަސްތަކެއްވެފައިވަނިކޮށެވެ.
ރަޖިސްޓްރާއާމެދު ޕްރޮސިކިއުޓާ ޖެނަރަލް ކަންބޮޑުވުން ފާޅުކުރައްވާފައިވާއިރު، މިދިޔަ ހަފުތާ ހައިކޯޓުގެ ހުކުމެއްގައި ވެސް ރަޖިސްޓްރާގެ ނިންމުމެއް ގޯސް ކަމަށް ކަނޑައަޅާފައިވެ އެވެ.
އެއީ، މަދަނީ މައްސަލައެއްގައި ޒަރޫރީ ހާލަތެއްގެ ދަށުން މުއްދަތު ހަމަވި ފަހުން މައްސަލައެއްގައި އިސްތިއުނާފު ހުށަހެޅުމަށް ހުއްދަ ދިންތާ 93 ދުވަސް ފަހުން ކޯޓަށް މައްސަލަ ހުށަހެޅުމުން ވެސް އެ މައްސަލަ ބަލައިގަނެ، ރަޖިސްޓްރީކޮށްދީފައިވާތީ އެވެ. ހުކުމްގައި ބުނި ގޮތުގައި، ކޮންމެ ހައްގެއް ވެސް އިންތިޒާމުވެފައި އޮންނަންވާނީ ގާނޫނުން ކަނޑައަޅާ ހުދޫދެއްގެ ތެރޭގައި އެވެ. އޭގެން އިސްތިއުނާފުކުރުމުގެ ހައްގު ވެސް އިސްތިސްނާ ނުވެ އެވެ.
ހާއްސަ ހާލަތެއްގެ ދަށުން ހުއްދައެއް ލިބުމުން، ހައްދެއް އިމެއް، ވަގުތެއް ނެތި އިސްތިއުނާފަށް މައްސަލަ ނުވައްދައި ތިބުމުގެ ފުރުސަތު ހުޅުވިފައި އޮވެއްޖެނަމަ އެކަމަކީ ގާނޫނުއަސާސީން ކަށަވަރުކޮށްދީފައިވާ އެކަށީގެންވާ މުއްދަތެއްގެ ތެރޭގައި ޝަރީއަތް ކުރެވުމުގެ ހައްގު ގެއްލިގެން ދިއުމުގެ އިތުރަށް ޝަރީއަތުގެ ބޭނުން ނަހަމަ ގޮތުގައި ހިފުމަށް ހުޅުވާލެވޭ ދޮރެއް ކަމަށް ހުކުމްގައި ބުނެފައިވެ އެވެ.
