މިއަހަރުގެ ފުރަތަމަ ހަތަރު މަސް ދުވަހުގެ ތެރޭގައި ކުޑަކުދިންނަށް ޖިންސީ އަނިޔާ ކުރުމުގެ 98 މައްސަލައެއް ޖެންޑާ މިނިސްޓްރީއަށް ހުށަހަޅާފައިވާކަން އެ މިނިސްޓްރީގެ ހިސާބުތަކުން ދައްކައިފި އެވެ.
ހިސާބުތަކުން ދައްކާ ގޮތުގައި ކުޑަކުދިންނަށް އެކި ވައްތަރުގެ އަނިޔާ އާއި ގެއްލުންތައް ކުރުމުގެ 373 މައްސަލައެއް ޖެންޑާ މިނިސްޓްރީން ބެލި އެވެ. އޭގެ ތެރޭގައި ކުޑަކުދިންނަށް ޖިންސީ އަނިޔާ ކުރުމުގެ 98 މައްސަލައެއް ހިމެނޭކަން ހިސާބުތަކުން ފެނެ އެވެ.
ޖިންސީ އަނިޔާ ކުރުމުގެ އިތުރުން ޖިސްމާނީ އަނިޔާ އަދި ނަފްސާނީ އަނިޔާ ކުރުމުގެ ވަރަށް ގިނަ މައްސަލަތަށް ވެސް އެ މިނިސްޓްރީން ބަލާފައިވާކަން ހިސާބުތަކުން އެނގެ އެވެ.
އެގޮތުން ކުޑަކުދިން ގައިގައި ތަޅައި އަނިޔާ ކުރި 62 މައްސަލައެއް މިއަހަރުގެ ފުރަތަމަ ހަތަރު އަހަރު ޖެންޑާ މިނިސްޓްރީއަށް ހުށަހަޅާފައިވެ އެވެ. އަދި ނަފްސާނީ ގޮތުން އެކި ކަހަލަ ގެއްލުން ދީގެން 27 މަައްސަލައެއް ވެސް އެ މިނިސްޓްރީން ބަލާފައިވެ އެވެ.
އޭގެ އިތުރުން ކުޑަކުދިންނާމެދު އިހުމާލުވުމުގެ ވަރަށް ގިނަ މައްސަލަތަކަކާއި ކުޑަކުދިންގެ ނާޖާއިޒު ފައިދާ ނެގުމުގެ މައްސަލަތަކާއި އިންޓަނެޓުން ފުރައްސާރަ ކުރުމުގެ މައްސަލަތަކާއި ހަނގާ ކުރުމުގެ މައްސަލަތައް ހިމެނެ އެވެ.
ކުޑަކުދިންނަށް އެކި ކަހަލަ އަނިޔާ ކުރުމުގެ މައްސަލަތައް ގިނަވެ، ހައްލު ނުލިބެ ދިގުދެމިގެންދާތީ ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. އެގޮތުން މި މަހު އަނިޔާވެރި ގޮތަކަށް މަރާލި 13 އަހަރުގެ ކުޑަކުއްޖާގެ މައްސަލައިގައި ދައުލަތުގެ އިހުމާލެ ވަރަށް ބޮޑު ކަމަށް ބައެއް ފަރާތްތަކުން ތުހުމަތު ކުރެ އެވެ.
