އިންފޮމޭޝަން ކޮމިޝަނަރުގެ މަގާމަށް ކުރިމަތިލުމުގެ ފުރުސަތު ރައީސް އޮފީހުން މިއަދު އަނެއްކާ ވެސް ހުޅުވާލައިފި އެވެ.
ރައީސް އޮފީހުން މިއަދު ކުރި އިއުލާނުގައި ބުނީ މިދިޔަ މަހުގެ ދެވަނަ ދުވަހު އިންފޮމޭޝަން ކޮމިޝަނަރުގެ މަގާމަށް ހުޅުވައިލާފައި ވީނަމަވެސް، އެކަށީގެންވާ އަދަދަކަށް އެ މަގާމަށް ބޭފުޅުން ކުރިމަތިލައްވާފައި ނުވާތީ، އަލުން ހުޅުވާލީ ކަމަށެވެ.
އިންފޮމޭޝަން ކޮމިޝަނަރުގެ މަގާމަށް ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، މިމަހުގެ 12 އަދި 13 ވަނަ ދުވަހު ހެނދުނު 10:30 އިން މެންދުރު 12:30 އަށް ރައީސް އޮފީހުންނެވެ.
މިއީ އެ މަގާމަށް މީހަކު ހޯދަން ރައީސް އޮފީހުން ހުޅުވައިލި ތިން ވަނަ ފަހަރެވެ.
ކުރިން އިންފޮމޭޝަން ކޮމިޝަނަރުގެ މަގާމުގައި ހުންނެވި ހުސައިން ފިޔާޒު މޫސާ އިސްތިއުފާ ދެއްވުމުން، އެ މަގާމަށް މީހަކު ހޯދަން ހުޅުވާލުމަށްފަހު، މަޖިލީހުގެ ރުހުމަށް ރައީސް އިބްރާހިމް މުހައްމަދު ސޯލިހް ފޮނުއްވި ތިން ބޭފުޅުންގެ ތެރެއިން އެއްވެސް ނަމެއް ކޮމެޓީން ފާހެއް ނުވި އެވެ. ފާސް ނުވީ، ކޮމިޓީގައި ވޯޓު ނެގިއިރު މަޖިލީހުގެ ގަވާއިދުގައި ބުނާ މިންވަރަށް މެމްބަރުންގެ ތާއިދު ނުލިބުމުންނެވެ.
އިންފޮމޭޝަން ކޮމިޝަނަރުގެ މަގާމަށް އައްޔަން ކުރެއްވުމަށްޓަކައި ރުހުން ހޯދަން ރައީސް ސޯލިހް ފޮނުއްވީ ޝިހާމް މުހައްމަދު ވަހީދު، އާހިދު ރަޝީދު އަދި މަރިޔަމް އަލީމްގެ ނަމެވެ. ނަމަވެސް އޭގެން އެއްވެސް ބޭފުޅަކަށް ރުހުން ނުދޭން ކޮމެޓީން ނިންމި އެވެ.
މައުލޫމާތު ހޯދައި ލިބިގަތުމުގެ ގާނޫނުގައި ބުނެފައިވާ ގޮތުން، އިންފޮމޭޝަން ކޮމިޝަނަރުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މީހަކު އައްޔަން ކުރަންޖެހޭނެ އެވެ.
އިންފޮމޭޝަން ކޮމިޝަނަރުގެ މަގާމުން، 21 މާޗްގައި ފިޔާޒު އިސްތިއުފާ ދެއްވާފައިވާއިރު، އެ މަގާމު ހުސްކޮށް އޮންނަތާ 100 އަށް ވުރެ ގިނަ ދުވަސް މިހާރު ވެސް ވަނީ ވެފަ އެވެ.
އަންނަ ބުރާސްފަތި ދުވަހު މަޖިލީހުގެ މި ހިނގާ ދެވަނަ ދައުރު ނިންމައި، މަޖިލިސް ޗުއްޓީއަށް ދާއިރު، ތިން ވަނަ ދައުރު ފެށޭނީ އަންނަ މަހުގެ 16 ވަނަ ދުވަހެވެ. އޭގެ މާނައަކީ އެހާ ތަނަށް އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަނުކުރެވުނަސް، މަޖިލީހަށް ރުހުން ނުދެވޭނެ އެވެ.
ކޮމިޝަނަރު ނެތި އައިކޮމް ހުއްޓިފައި
މައުލޫމާތު ހޯދައި ލިބިގަތުމުގެ ހައްގުގެ ގާނޫނު އޮންނަ ގޮތުން އައިކޮމް ދައުލަތުގެ އެފަދަ އެހެން މުއައްސަސާތަކާ ތަފާތެވެ.
އެ ގާނޫނުގެ ހަތް ވަނަ މާއްދާ ބުނާ ގޮތުން، ގާނޫނުގެ ދަށުން ދޭންޖެހޭ މައުލޫމާތެއް އާއްމުކޮށް ގިނަ ވެގެން 21 ދުވަހުގެ ތެރޭގައި އެ މައުލޫމާތެއް ހޯދަން އެދުނު ފަރާތަކަށް ފޯރުކޮށްދޭންޖެހެ އެވެ.
އެކަމަކު އެފަދަ މައުލޫމާތެއް ދޫނުކުރެވޭ ކަމަށް ބުނެ އުފެދޭ ހިލާފަކާ މެދު ގޮތް ނިންމާނީ ސީދާ އިންފޮމޭޝަން ކޮމިޝަނަރު ކަމަށް ގާނޫނުގައި ބަޔާންކޮށްފައި އޮތުމަކީ އެ މަގާމުގައި މީހަކު ނެތުމުން މުޅި ގާނޫނު ހުއްޓޭ ސަބަބެވެ.
އައިކޮމްއިން ހޯދި މައުލޫމާތުތަކަށް ބަލާއިރު، ކޮމިޝަނަރުކަމުގައި ފިޔާޒު ހުންނެވިއިރު ނުނިމި އޮތް ހަ މައްސަލައަކާއެކު ގޮތެއް ނުނިންމި ޖުމްލަ 11 މައްސަލަ މިހާރު ވެސް އެބައޮތެވެ.
