ރިއޯ ޑި ޖަނެއިރޯ (ޖުލައި 3) - ކޮޕަ އެމެރިކާ ފުޓްބޯޅަ މުބާރާތުގައި ރޭ ދެ ވަނަ ހާފުގައި ކުޅުންތެރިއަކު މަދު ކުޅެ، ބްރެޒިލުން 1-0 އިން ޗިލީ ބަލިކޮށް ސެމީގައި ޕެރޫއާ ދެކޮޅަށް ކުޅެން ފުރުސަތު ހޯދައިފި އެވެ.
ބްރެޒިލް ވަނީ މި ފަހަރުގެ މުބާރާތުގެ ގްރޫޕް ސްޓޭޖުގައި 4-0 އިން ޕެރޫ ބަލިކޮށްފަ އެވެ. ސެމީގައި އެންމެ ފަހުގެ ޗެމްޕިއަން ބްރެޒިލާއި ޕެރޫ ކުޅޭ މެޗު އޮންނާނީ ހޯމަ ދުވަހުގެރޭ އެވެ.
މެޗު ފަށައިގެން ވެސް ޗިލީގެ ބޮޑު ފޯކަސް އެއް އޮތީ ޑިފެންސް ކުރުމަށް ފަހު ކައުންޓަ އެޓޭކުގައި ބްރެޒިލް ކޮޅަށް ގޯލެއް ޖެހޭތޯ ބެލުމެެވެ. އެހެން ލިބޭ ބޯޅަތަކުގައި ބްރެޒިލްގެ ޑިފެންސަށް ބާރު ބޮޑުކޮށްދަނީ ޗިލީގެ އަލެކްސިސް ސަންޗޭޒާއި އާޓޫރޯ ވިޑާލަށް ލިބޭ ބޯޅަތަކުގަ އެވެ.
ގޯލެއް ޖަހަން ބްރެޒިލަށް މެޗުގައި ފުރަތަމަ ހުސް ފުރުސަތު ލިބުނީ 22 ވަނަ މިނިޓްގަ އެވެ. ބްރެޒިލްގެ ރޮބާޓޯ ފިރްމީނޯ ފޮނުވާލި ބޯޅަ ދިޔައީ އަރިމަތިން ބޭރުންނެވެ. އޭގެ އިރުކޮޅެއް ފަހުން ހިލޭ ޖެހުމަކުން ނޭމާ ނަގައިދިން ބޯޅަ މާކުއީނިއޯސް ބޮލުން ފޮނުވާލި ނަމަވެސް ޗިލީގެ ކީީޕަރު ކްލައުޑިއޯ ބްރާވޯ ވަނީ ބޯޅަ އަތަށް ނަގައިފަ އެެވެ. ފުރަތަމަ ހާފު ނިމުމުގެ ކުރިން ބްރެޒިލަށް ލީޑުނަގައިދޭން ގަބްރިއެލް ޖީސޫސް ޖެހި ބޯޅަ ކީޕަރު ބްރާވޯ ވަނީ މަތަކޮށްފަ އެވެ.
ބްރެޒިލްގެ ޖީސޫސް (ވ) އަށް ރަތް ކާޑެއް ދައްކަނީ.
ދެ ވަނަ ހާފަށް ބްރެޒިލް އިން ނުކުތީ ފިރްމީނޯގެ ބަދަލުގައި ލޫކަސް ޕަކޭޓާ ކުޅެން އަރުވައިގެންނެވެ. ކުޅެން އެރިތާ ދެ މިނިޓް ތެރޭ އޭނާ ވަނީ ގޯލެއް ޖަހައިފަ އެވެ. ނޭމާއާ އެކު ޕަކޭޓާގެ ކޮމްބިނޭޝަން ރަނގަޅަށް ފެނުނުއިރު، ޕަކޭޓާ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
ލަނޑު ޖެހިތާ ދެ މިނިޓް ވެސް ނުވަނިސް ޗިލީގެ ފުލްބެކް މެނިއާ އަށް ކުރި ނުރައްކާތެރި ފައުލަކަށް ބްރެޒިލްގެ ޖީސޫސް އަށް ވަނީ ސީދާ ރަތް ކާޑެއް ދައްކައިފަ އެވެ. ކުޅުންތެރިއަކު މަދުކޮށް ކުޅެ ވެސް ބްރެޒިލް ވަނީ ނަތީޖާ ދަމަހައްޓައިފަ އެވެ. ޗިލީން ފޮނުވާލި ހަމަލާތައް ބްރެޒިލްގެ ގޯލުގައި ހުރި ކީޕަރު އެޑަސަން މޮރާއެސް ވަނީ މަތަކޮށްފަ އެވެ.
ބްރެޒިލަށް އިތުރު ގޯލެއް ޖަހައިދޭން ނޭމާ ފޮނުވާލި ބޯޅަ ކީޕަރު ބްރާވޯ މަތަކުރި އެވެ. އަދި ރިޗާލިސަން އަށް ލިބުނު ބޯޅަތަކުގައި ރަނގަޅަށް ބޭނުންނުކުރެވުނެވެ.
ޕެރޫ އިން ސެމީގެ ފުރުސަތު ހޯދީ ރޭ ކުއާޓާގައި ފުރިހަމަ ވަގުތާއި އިތުރު ވަގުތުގެ ދެ ހާފްގެ ކުޅުން ނިމުނުއިރު، 3-3 އިން އެއްވަރުވުމުން ޕެނަލްޓީ ޖަހައިގެން 4-3 އިން މޮޅުވެގެންނެވެ. ޕެނަލްޓީގައި ޕެރޫ ފޮނުވާލި ހަ ޕެނަލްޓީން ހަތަރު ޕެނަލްޓީ ކާމިޔާބުކުރިއިރު، ޕެރަގުއޭ އިން ޖެހި ހަ ޕެނަލްޓީގެ ތެރެއިން ކާމިޔާބުވީ ތިން ޕެނަލްޓީ އެވެ.
