ދޮންދަރިއަށް ޖިންސީ ގޯނާކުރި މީހަކު 32 އަހަރަށް ޖަލަށްލާން ފުވައްމުލަކު މެޖިސްޓްރޭޓް ކޯޓުން ހުކުމްކޮށްފި އެވެ.
ދޮންދަރިއަށް ޖިންސީ ގޯނާކުރުމުގެ ކުށް ސާބިތުވެފައިވަނީ ފުވައްމުލައް ޑައިމަންޑް، އަލީ މޫސާ އަހުމަދުގެ މައްޗަށެވެ.
އޭނާ ނުވަ އަހަރުގެ ކުއްޖާއަށް ޖިންސީ ގޯނާކުރީ އެ ކުއްޖާ ފާހަނާގައި އުޅެނިކޮށް، އޭނާގެ ޖިންސީ ގުނަވަން ދައްކައިގެންނެވެ.
މައްސަލާގައި ދައުލަތުން އަލީ މޫސާގެ މައްޗަށް އުފުލީ މީހަކު، ކުޑަކުއްޖަކަށް އެމީހެއްގެ ޖިންސީ ގުނަވަނެއްކަމަށް ބެލެވޭ އެއްވެސް ތަނެއް ދެއްކުމުގެ ކުށުގެ ދައުވާ އާއި ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، ޖިންސީ އަމަލެއް ބަޔަކު ހިންގާ މަންޒަރު އެ ކުޑަކުއްޖާއަށް ދެއްކުމުގެ ކުށުގެ ދައުވާ އެވެ.
އަދި، އޮރިޔާންކާޑު ގެންގުޅުމުގެ ކުށުގެ ދައުވާ އާއި ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާ އެކު ޖިންސީ އަމަލެއް ހިންގުމުގެ ކުށުގެ ދައުވާ ވެސް އޭނާގެ މައްޗަށް ކުރި އެވެ.
ޝަރީީއަތުގައި އަލީ މޫސާ ވަނީ ދައުވާތަކަށް އިންކާރުކޮށް، އެއީ އޭނާ ކުރި ކަމެއް ނޫން ކަމަށް ބުނެފަ އެވެ.
ނަމަވެސް، މިއަދު ފުވައްމުލައް ކޯޓުން ނިންމާފައިވަނީ ކުއްޖާގެ ބަޔާނާއި ދައުލަތުން ހުށަހަޅާފައިވާ ހެކިތަކުގެ މައްޗަށް ރިއާޔަތްކުރާއިރު އޭނާގެ މައްޗަށް ހަތަރު ދައުވާ ވެސް ސާބިތުވާ ކަމަށެވެ.
ގާޒީ ހަދީޖާ ލީނާ ކުރެއްވި ހުކުމްގައިވާ ގޮތުން، ކަންވީ ގޮތް ކަމަށް ބުނެ ކުއްޖާ ދީފައިވާ ބަޔާނާއި ކުއްޖާ އެކި ފަރާތްތަކަށް ކިޔާދީފައިވާ ކިޔައިދިނުމުގައި އެއްވެސް މިންވަރެއްގެ ފުށުއެރުމެއް ނެތެވެ. އަދި، ކުއްޖާގެ ހާލަތާ ގުޅޭ ގޮތުން ހެދި ރިޕޯޓްގައި ކުއްޖާއަށް ނަފްސާނީ އަނިޔާ އާއި ޖިންސީ ގޯނާގެ އަނިޔާ އެންމެ މަތީ މިންވަރަށް ލިބިފައިވާ ކަމަށް ބުނެފައިވެ އެވެ.
މި ހުކުމާ ގުޅިގެން ޕްރޮސިކިއުޓާ ޖެނަރަލް ހުސެއިން ޝަމީމް ވަނީ އެ މައްސަލާގައި ދައުލަތުގެ ފަރާތުން މަސައްކަތް ކުރެއްވި ވަކީލުންނަށް ޝުކުރު އަދާކުރައްވާފަ އެވެ.
ޝަމީމް ވިދާޅުވި ގޮތުގައި، މި މައްސަލާގައި ކުރެވުނީ ރަނގަޅު މަސައްކަތްތަކެއް ކަމާއި މިކަން ދެމެހެއްޓުމަށް ގިނަ މަސައްކަތްތަކެއް ކުރަން ޖެހެ އެވެ.
