ލަންޑަން (ޖުލައި 1) - ޓޮޓެންހަމް ހޮޓްސްޕާސްގެ ކޯޗުކަމާ ވުލްވްސްގެ ކުރީގެ ކޯޗު ނޫނޯ އެސްޕިރީޓޯ ސަންޓޯ ހަވާލުވެއްޖެ އެވެ.
މިދިޔަ ސީޒަނަށް ފަހު ވުލްވްސްގެ ކޯޗުކަމުން ވަކިވި ނޫނޯ ވަނީ ޓޮޓެންހަމާ އެކު ދެ އަހަރުގެ އެއްބަސްވުމެއްގައި ސޮއިކޮށްފަ އެވެ.
އުމުރުން 47 އަހަރުގެ ނޫނޯއާ ޓޮޓެންހަމް ހަވާލުވުމުގެ ކުރިން އެ ކްލަބުން ވަނީ ގިނަ ކޯޗުންތަކަކާ މަޝްވަރާކޮށްފަ އެވެ. އެ ކޯޗުންގެ ތެރޭގައި އިންޓަގެ ކޯޗުކަމުން ވަކިވި އެންޓޯނިއޯ ކޮންޓޭ، ކުރި މުއްދަތެެއްގެ ތެރޭގައި ނަޕޯލީ އާއި ފިއޮރެންޓީނާގެ ކޯޗުކަން ދޫކޮށްލި ޖެނާރޯ ގަޓޫސޯ، ރޯމާ އިން ވަކިވި ޕައޮލޯ ފޮންސޭކާ، ޔުވެންޓަސްއާ ހަވާލުވި މެސިމޯ އަލެގްރީ، ބަޔާން މިއުނިކާ ގުޅުނު ހޫލިއަން ނާގަލްސްމަން، ބަޔާން ދޫކޮށް ޖަރުމަނު ގައުމީ ޓީމަށް ބަދަލުވި ހަންސީ ފްލިކް، އަޔަކްސްގެ ކޯޗު އެރިކް ޓެން ހާގް، ޕީއެސްޖީގައި ހުރި ޓޮޓެންހަމްގެ ކުރީގެ ކޯޗު މައުރީސިއޯ ޕޮޗެޓީނޯ، ސެވިއްޔާގައި ހުރި ހުލެން ލޮޕެޓެގީ، ލެސްޓާ ސިޓީގެ ބްރެންޑަން ރޮޖާސް، ބެލްޖިއަމް ގައުމީ ޓީމުގެ ކޯޗު ރޮބާޓޯ މާޓީނޭޒް އަދި ފުލަމް ދޫކޮށް ދާދި ފަހުން ބޯންމައުތާ ހަވާލުވި ސްކޮޓް ޕާކާ ހިމެނެ އެވެ.
މީގެއިން ކޮންމެ ކޯޗެއް ވެސް ޓޮޓެންހަމާ ހަވާލުވާން މަޝްވަރާތައް ބޭއްވުމަށް ފަހު އެ ޓީމާ ނުގުޅެން ނިންމި އެންމެ ބޮޑު ސަބަބަކީ އެ ކްލަބްގެ މާލީ ހާލަތު މި ވަގުތު އޮތްގޮތުން ކައިރި މުސްތަގުބަލެއްގައި ޓީމު ބިނާކުރަން ބޮޑު ހަރަދެއް ކުރެވޭނެ ގޮތެއް ނެތުމުންނެވެ. އަދި ޓޮޓެންހަމުން ހެރީ ކޭން ފަދަ އެ ޓީމުގެ ބައެއް މުހިއްމު ކުޅުންތެރިން ވިއްކާލަން ޕްރެޝަރު ބޮޑުވަމުން އަންނާތީ އެވެ.
ޓޮޓެންހަމަކީ މި ވަގުތަށް ބަލާނަމަ އިނގިރޭސި ޕްރިމިއާ ލީގުގައި އެންމެ ދަރަނި ބޮޑު ކްލަބެވެ. އެ ޓީމުން ވަނީ ކޮވިޑް-19ގެ ސަބަބުން ދިމާވެފައިވާ މާލީ ހާލަތުން އަރައިގަންނަން ދާދި ފަހުން ވެސް ލޯނެއް ނަގައިފަ އެވެ.
ކުރިން ވުލްވްސްގެ އިތުރުން ޕޯޓޯ އަށް ކޯޗުކޮށްދިން ނޫނޯ އަށް އިނގިރޭސި ޕްރިމިއާ ލީގުގެ ކްރިސްޓަލް ޕެލަސްއާ ހަވާލުވާން ވެސް ފުރުސަތު ލިބުނެވެ. އެކަމަކު އޭނާ ޓޮޓެންހަމާ ގުޅުނީ އެ ކްލަބްގެ ސްޕޯޓިން ޑިރެކްޓަރު ފަބިއޯ ޕަރަޓީޗީއާ އެކު ބޭއްވި މަޝްވަރާތަކަށް ފަހު އެވެ. ޕަރަޓީޗީ އަކީ މިދިޔަ ސީޒަނަށް ފަހު ޔުވެންޓަސްގެ ވަޒީފާ ދޫކޮށްލި ނަން މަޝްހޫރު ސްޕޯޓިން ޑިރެކްޓަރެކެވެ.
ވުލްވްސް އިނގިރޭސި ދެ ވަނަ ޑިވިޝަނުން ޕްރިމިއާ ލީގަށް ޕްރޮމޯޓްކޮށްދީ ނޫނޯ ވަނީ އެ ޓީމު ގޮވައިގެން ޔޫރޮޕާ ލީގުގައި ވެސް ވާދަކޮށްފަ އެވެ. މިދިޔަ ސީޒަނަށް ފަހު ނޫނޯ ވުލްްވްސް ދޫކޮށްލަން ނިންމީ އެ ޓީމު ލިގުގެ 13 ވަނައިގައި ނިންމާލަން ޖެހުމުންނެވެ.
ޓޮޓެންހަމުން ދާއިމީ ކޯޗަކު ހަމަޖެއްސީ އެ ޓީމުގެ ކޯޗުކަމުން ހޯސޭ މޮރީނިއޯ ވަކިކުރިތާ 73 ދުވަސް ފަހުންނެވެ. މޮރީނިއޯ ވަކިކުރުމަށް ފަހު މިދިޔަ ސީޒަންގެ ފަހު ބައިގައި ޓޮޓެންހަމަށް ކޯޗުކޮށްދިނީ ޔޫތު ކޯޗު ރަޔާން މޭސަން އެވެ.
