ހައިކޯޓުގެ ރަޖިސްޓްރާގެ ނިންމުމެއް ގޯސްކޮށް އޮތުމުން، އެ ކޯޓަށް އިސްތިއުނާފަށް ހުށަހެޅި މައްސަލައެއް ބޭރުކޮށްލައިފި އެވެ.
ރަޖިސްޓްރާގެ ނިންމުން ގޯސްވެގެން ހައިކޯޓުން މިއަދު ބޭރުކޮށްލާފައިވަނީ ހޮނާސް ކްލަބު މޯލްޑިވްސްގެ ފަރާތުން ޓެރަފާމާ މޯލްޑިވްސްގެ މައްޗަށް ހުށަހެޅި މައްސަލައެކެވެ.
މި މައްސަލާގައި ކަން ހިނގާފައިވާ ގޮތަކީ، ހޮނާސް ކްލަބު މޯލްޑިވްސްއާ ދެކޮޅަށް ސިވިލް ކޯޓުން މައްސަލައެއް ޣައިރު ހާޒިރުގައި ނިންމާފައި އޮތުމުން އިސްތިއުނާފަށް އޮތް މުއްދަތުގެ ތެރޭ އެ ކޯޓަށް ކޯޓަށް ހުށައެއް ނޭޅުމެވެ.
ނަމަވެސް، އެއީ ޒަރޫރީ ހާލަތެއް ކަމަށް ބަލައިގެން ހައިކޯޓުން ނިންމީ މައްސަލަ އިސްތިއުނާފުކުރުމަށް 10 ދުވަހުގެ މުއްދަތު ހަމަވެފައި އޮތަސް ހުއްދަ ދޭންށެވެ.
މުދަތުގައި އިސްތިއުނާފަށް ހުށަނޭޅޭ މައްސަލަތައް، އެ މައްސަލައެއް އިސްތިއުނާފަށް ހުށަނޭޅުނުކަމަށް ބަޔާންކުރާ ސަބަބަކީ ހައިކޯޓަށް ގަބޫލުކުރެވޭފަދަ ސަބަބެއް ކަމުގައިވާނަމަ، ހާލަތުލްޒަރޫރާގެ ދަށުން ހުއްދަ ދިނުމުގެ އިހްތިޔާރު ހައިކޯޓަށް އޮވެ އެވެ.
އެގޮތުގެ މަތިން އިސްތިއުނާފުކުރުމަށް ހުއްދަ ހައިކޯޓުން ދީފައިވަނީ 11 ފެބުރުއަރީ 2019 ވަނަ ދުވަހު އެވެ. ނަމަވެސް، އެ ހުއްދައިގެ ދަށުން މައްސަލަ ހޮނާސް ކްލަބު މޯލްޑިވްސްއިން ހައިކޯޓަށް ހުށަހަޅާފައިވަނީ އޭގެ 93 ދުވަސް ފަހުން 16 މެއި 2019 ވަނަ ދުވަހު އެވެ. ބަންދު ދުވަސްތައް ނުލައި ވެސް 64 ދުވަސް ފާއިތުވީ ފަހުންނެވެ.
އެހާ ގިނަ ދުވަސް ފަހުން މައްސަލަ ހައިކޯޓަށް ހުށަހެޅި ނަމަވެސް، ހައިކޯޓުގެ ރަޖިސްޓްރާ ވަނީ މައްސަލަ ބަލައިގަނެ، ރަޖިސްޓްރީކޮށްދީފަ އެވެ.
އެ މައްސަލާގައި ހައިކޯޓުން މިއަދު އިއްވި ހުކުމްގައި ބުނީ އިސްތިއުނާފުކުރުމަށް ހައިކޯޓުން ހުއްދަ ދިން ތާރީހާއި މައްސަލައިގެ ފޯމް ހޮނާސް ކްލަބު މޯލްޑިވްސްއިން ހުށަހެޅި ތާރީހާ ދެމެދު އެކަށީގެން ނުވާ ދިގު މުއްދަތުތަކެއް ހިނގާފައިވާ ކަމަށް ގަބޫލުކުރާ ކަމަށެވެ.
ހާއްސަ ހާލަތެއްގެ ދަށުން ހުއްދައެއް ލިބުމުން، ހައްދެއް އިމެއް، ވަގުތެއް ނެތި އިސްތިއުނާފަށް މައްސަލަ ނުވައްދައި ތިބުމުގެ ފުރުސަތު ހުޅުވިފައި އޮވެއްޖެނަމަ އެކަމަކީ ގާނޫނުއަސާސީން ކަށަވަރުކޮށްދީފައިވާ އެކަށީގެންވާ މުއްދަތެއްގެ ތެރޭގައި ޝަރީއަތް ކުރެވުމުގެ ހައްގު ގެއްލިގެން ދިއުމުގެ އިތުރަށް ޝަރީއަތުގެ ބޭނުން ނަހަމަ ގޮތުގައި ހިފުމަށް ހުޅުވާލެވޭ ދޮރެއް ކަމަށް ހުކުމްގައި ބުންޏެވެ.
އެހެންކަމުން، އިސްތިއުނާފުކުރުމުގެ ހުއްދަ ދިނުމަށްފަހު އެތައް ދުވަހެއްވީ ފަހުން މައްސަލަ ހުށަހެޅުން އެ ބަލައިގެންފައިވަނީ ގޯސްކޮށް ކަމަށް ކަނޑައެޅި އެވެ. އެފަދަ މައްސަލައެއް ބަލައި ގޮތެއް ކަނޑައަޅައި ފައިސަލާކުރުވަނިވި ހުކުމެއް އިއްވުމަކީ ޝަރުއީ އަދި ގާނޫނީ އުސޫލުތަކާ ހިލާފު ކަމެއް ކަމަށެވެ.
އެ ސަބަބާހުރެ އެ މައްސަލައަކީ ހައިކޯޓުގައި ކުރިއަށް ގެންދެވޭނެ މައްސަލައެއް ނޫން ކަމަށް ނިންމި ކަމަށް ފަނޑިޔާރު ހުސެއިން ޝަހީދާއި ފަނޑިޔާރު މުހައްމަދު ނިޔާޒު އަދި ފަނޑިޔާރު މުހައްމަދު ފައިސަލް އިއްތިފާގުން ނިންމެވި އެވެ.
އިއްތިފާގުން އިއްވެވި ހުކުމްގައި ބުނި ގޮތުގައި، ކޮންމެ ހައްގެއް ވެސް އިންތިޒާމުވެފައި އޮންނަންވާނީ ގާނޫނުން ކަނޑައަޅާ ހުދޫދެއްގެ ތެރޭގައި އެވެ. އޭގެން އިސްތިއުނާފުކުރުމުގެ ހައްގު ވެސް އިސްތިސްނާ ނުވެ އެވެ.
