ހުޅުމާލެ ދެވަނަ ފިޔަވަހީގައި އަޅަން ނިންމާފައިވާ 2400 ދަރިވަރުންގެ ޖާގައިގެ ދެ ސްކޫލް ނިމޭނީ އަންނަ އަހަރުގެ ފަހުކޮޅަށް ކަަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.
ހިޔާ ފްލެޓްތަކުގެ ދެ ވަނަ ފިޔަވައްސަށް ގިނަ ބަޔަކު މި އަހަރު އާބާދުވާއިރު އެތަނުގައި ހަތަރު ސްކޫލް އަޅަން ނިންމާފައިވެ އެވެ. އެޑިއުކޭޝަން މިނިސްޓްރީން ބުނެފައި ވަނީ އާ ސްކޫލު ޑިޒައިންކުރަނީ ވަށާޖެހޭ ތައުލީމީ ސިޔާސަތާ އެއްގޮތަށް ދަރިވަރުންނަށް އެފަދަ ތައުލީމެއް ދެވޭފަދަ ގޮތަކަށެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ރިޔާޒް "އަދަދު" އަށް ވިދާޅުވީ ހުޅުމާލެ ދެވަނަ ފިޔަވަހީގައި އެޅުމަށް ނިންމާފައިވާ ދެ ސްކޫލުން ކޮންމެ ސްކޫލެއްގެ ޖާގައަކީ 1200 ދަރިވަރުން ކަމަށެވެ. މި އަހަރު ފެބްރުއަރީ މަހު ސޮއިކޮށްފައި ވަނީ ސަލާހުއްދީން ސްކޫލު އެޅުމުގެ މަސައްކަތުގަ އެވެ.
އަމީން ކޮންސްޓްރަކްޝަނާ އެ މަސައްކަތް ހަވާލުކޮށްފައި ވަނީ އަންނަ އަހަރުގެ ފަހުކޮޅުގައި އެ ސްކޫލުގެ މަސައްކަތް އެއްކޮށް ނިންމާލުމަށެވެ. އަމީން ކޮންސްޓްރަކްޝަނާ މަޝްރޫއު ހަވާލުކޮށްފައި ވަނީ 118،336،879 ރުފިޔާގެ އަގަކަށް، 390 ދުވަހުގެ ތެރޭގައި މަސައްކަތް ނިންމާ ގޮތަށެވެ.
ހުޅުމާލެ ދެވަނަ ފިޔަވަހީގައި އެޅުމަށް ނިންމާފައިވާ ސަލާހުއްދީން ސްކޫލު އެޅުމަށް ނިންމާފައިވާ ހުސް ބިމުގެ ކުރެހުމެއް
ދެވަނަ ފިޔަވަހީގައި އަޅާ ހުރިހާ ސްކޫލެއް އެޅުމަށް ވެސް ހަމަޖެހިފައި ވަނީ ދަރިވަރުންނަށް ކައިރި ހިސާބިތަކުގައި ކަމަށް އެޑިއުކޭޝަނުން ބުނެ އެވެ.
އެގޮތުން ސަލާހުއްދީން ސްކޫލު އެޅުމަށް ނިންމާފައި ވަނީ އެޗް2 ފްލެޓްއާ އިންވެގެން އޮންނަ ހުސް ބިމުގަ އެވެ.
ފޭސްޓޫގައި އެޅުމަށް ނިންމާފައިވާ ދެވަނަ ސްކޫލު އަޅާނެ ބިން ފެންނަ ކުރެހުމެއް
ކޮންޓްރެކްޓާ ފައިނޭންސްގެ ދަށުން އީޕީސީ ޓާންކީ އުސޫލުން ހުޅުމާލެ ދެވަނަ ފިޔަވަހީ ގައި އިމާރާތްކުރާ ސްކޫލްގެ ޑިޒައިން އަދި އިމާރާތް ކުރުމުގެ މަސައްކަތް ހަވާލުކުރުމުގެ އެގްރިމަންޓްގައި ސޮއި ކޮށްފައި ވަނީ މިދިޔަ އާދިއްތަ ދުވަހެވެ.
އެއް އަހަރާއި ހަ މަސްދުވަހުން ނިންމުނަށް އެ މަސައްކަތް ހަވާލު ކުރީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްއާ އެވެ. އެ މަސައްކަތަކީ 2.43 މިލިއަން ރުފިޔާގެ މަޝްރޫއެކެވެ.
އެ މަސައްކަތަކީ ކޮންޓްރެކްޓަ ފައިނޭންސްގެ އުސޫލުން ފަސް އަހަރަށް ބަހާލައިގެން ރިފައިނޭންސް ކުރެވޭގޮތަށް ހަވާލުކުރާ މަޝްރޫއެކެވެ. އެ ސްކޫލު އެޅުމަށް އެޑިއުކޭޝަނުން ނިންމާފައި ވަނީ ސޯޝަލް ހައުސިން ސަރަހައްދުގަ އެވެ.
މީގެ އިތުރުން ރިޔާޒް ވިދާޅުވީ ފޭސް2އަށް ސްކޫލަށް ދިއުމަށް ބަހުގެ ހިދުމަތް ދިނުމާ މެދު މަޝްވަރާ ކުރަމުން އަންނަ ކަމަށެވެ.
