ޖެނީވާ، ސްވިޓްޒަލޭންޑް (ޖޫން 30) - މަދިރީގެ ޒަރިއްޔާއިން ފެތުރޭ މެލޭރިއާއާ ދެކޮޅަށް ޗައިނާއިން 70 އަހަރު ވަންދެން ކުރި ބުރަ މަސައްކަތަށް ފަހު އެ ގައުމުން މެލޭރިއާ ނައްތާލާފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިއުލާންކޮށްފި އެވެ.
ނަވާރަ ސަތޭކަ ސާޅީހުގެ އަހަރުތަކުގައި ކޮންމެ އަހަރަކު ވެސް ޗައިނާގައި 30 މިލިއަން މީހުންނަށް މެލޭރިއާ ޖެހެ އެވެ. ނަމަވެސް ފާއިތުވި ހަތަރު އަހަރު އެ ގައުމުން މެލޭރިއާގެ އެއްވެސް ކޭސްއެއް ނުފެނެ އެވެ.
"މެލޭރިއާ ނައްތާލާފައި ވާތީ ޗައިނާގެ ރައްޔިތުންނަށް މަރުހަބާ ކިޔަން،" ޑަބްލިއުއެޗްއޯގެ ޑިރެކްޓާ ޖެނެރަލް ޓެޑްރޯސް އަދަނޮމް ވިދާޅުވި އެވެ.
މެލޭރިއާގެ ކޭސްއެއް ނުފެންނަތާ ތިން އަހަރުވެފައިވާ ގައުމުތަކަށް، އެ ގައުމުން މި ބަލި ނައްތާލެވިފައިވާ ކަމަށް ކަނޑައަޅަން އެދި ޑަބްލިއުއެޗްއޯއަށް ހުށަހެޅޭނެ އެވެ. ޗައިނާއަކީ މެލޭރިއާ ނައްތާލާފައިވާ ކަމުގެ ދަރަޖަ ދިން 40 ވަނަ ގައުމެވެ.
މެލޭރިއާ ނައްތާލިކަމުގެ ދަރަޖަ ގައުމުތަކަށް ދޭއިރު، އެއް ގޮތަކަށް ވެސް މެލޭރިއާ ނުފެންނަ އަދި ވަކި ވަކި ފިޔަވަޅުތަކެއް އެޅުމެއް ނެތި ބަލި އަމިއްލައަށް ނެތިގެން ދިޔަ 61 ގައުމެއްގެ ލިސްޓު ވެސް ޑަބްލިއުއެޗްއޯގައި އޮވެ އެވެ.
ޑަބްލިއުއެޗްއޯގެ ދުނިޔޭގެ މެލޭރިއާ ރިޕޯޓު 2020 ގައިވާ ގޮތުން މި ބަލީގެ ސަބަބުން އެންމެ ގިނަ ބަޔަކު މަރުވަނީ އެފްރިކާ ގައުމުތަކުގަ އެވެ. އެގޮތުން 2018 ގައި 411،000 މީހުން އަދި 2019 ގައި 409،000 މީހުން މުޅި ދުނިޔެއިން މެލޭރިއާ ޖެހިގެން މަރުވި އެވެ.
މެލޭރިއާ ޖެހިގެން މަރުވާ މީހުންގެ 90 ޕަސެންޓު ނިސްބަތްވަނީ އެފްރިކާ އަށެވެ. އަދި އެފްރިކާގައި ވެސް އެންމެ ގިނައިން މަރުވަނީ ކުޑަކުދިންނެވެ.
