ބެއިރޫތް، ލުބްނާން (ޖޫން 29) - އެމެރިކާއިން ދިން ހަމަލާތަކެއްގެ ރައްދުގައި އިރާނުން އެހީވާ ހަނގުރާމަވެރިން ސީރިއާގައި ހުންނަ އެމެރިކާގެ އަސްކަރީ މަރުކަޒަކަށް ރޮކެޓު ހަމަލާތަކެއް ދީފި އެވެ.
އެމެރިކާގެ އަސްކަރީ ކޯލިޝަނުގެ ތަރުޖަމާނު ވެއިން މަރޮޓޯ ޓްވިޓާ މެދުވެރިކޮށް ބުނީ އިރުމަތީ ސީރިއާގައި ގިނަ އަދަދެއްގެ ރޮކެޓް ހަމަލާ އަމާޒުވި ނަމަވެސް އެއްވެސް މީހަކު މަރުވެފައި ނުވާ ކަމަށެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނީ ސީރިއާގެ އަލް އުމަރް ތެޔޮ ވަޅު ސަރަހައްދުގައި ހުންނަ އެމެރިކާގެ މަރުކަޒަކަށް ހަމަލާ ދިން ކަމަށެވެ. އަދި ދެ ފަރާތުގެ މެދުގައި ގިނަ އިރުތަކެއް ވަންދެން ބަޑީގެ ހަމަލާތައް ބަދަލު ކުރި ކަމަށް ވެސް ރިޕޯޓު ކުރި އެވެ.
އެމެރިކާއިން އާދީއްތަ ދުވަހުގެ ރޭ ވަނީ އިރާގާއި ސީރިއާ ގުޅޭ ބޯޑަރު ސަރަހައްދުގައި އުޅޭ އިރާނުން އެހީވާ ހަނގުރާމަވެރިންނަށް އަމާޒުކޮށް ވައިގެ ހަމަލާތަކެއް ދީފަ އެވެ. އެ ހަމަލާތަކުގައި ހަނގުރާމަވެރި ހަތް މީހަކު މަރުވި އެވެ.
މިއީ އެމެރިކާގެ ރައީސް ޖޯ ބައިޑެން މަގާމުގެ ހުވާ ކުރެއްވި ފަހުން އިރާނުން އެހީވާ ޓާގެޓުތަކަށް އެމެރިކާއިން ދިން ދެ ވަނަ ހަމަލާ އެވެ. ހަމަލާ ދެނީ "ރައްދުގައި" ކަމަށް ޕެންޓަގަން އިން ބުނާއިރު، އިރާނުގެ ނިއުކްލިއާ އެއްބަސްވުމުގެ މަޝްވަރާތައް މި ވަގުތު ދަނީ ކުރިއަށެވެ.
އިރާގުގެ ބޮޑު ވަޒީރު މުސްތަފާ އަލް ހާދެމީ ވިދާޅުވީ އެމެރިކާގެ ހަމަލާތަކަކީ އެ ގައުމުގެ އިސްތިގްލާލަށް ބުރޫ އަރާ، އެ ގައުމުގެ ސަލާމަތަށް ނުރައްކާވާ ހަމަލާތަކެއް ކަމަށެވެ. އަދި ސީރިއާއިން ވެސް ވަނީ ހަމަލާތައް ކުށްވެރިކޮށްފަ އެވެ.
އެމެރިކާގެ 2،500 ސިފައިން އިރާގުގައި އުޅެނީ އިސްލާމިކް ސްޓޭޓް (އައިއެސް) އާ ދެކޮޅަށް ހަނގުރާމަ ކުރުމަށެވެ. މި އަހަރު އެކަނިވެސް އެމެރިކާ ސިފައިންނަށް އަމާޒުކޮށް އިރާގުގައި 40 އަށް ވުރެ ގިނަ ހަމަލާ ދިނެވެ.
އޭގެ ތެރެއިން ގިނަ ހަމަލާތަކަކީ އެއްގަމު އުޅަނދު ދަތުރު ކުރާއިރު ދޭ ބޮމުގެ ހަމަލާ އެވެ. އޭގެ އިތުރުން 14 ރޮކެޓު ހަމަލާ ވެސް ދީފައި ވެ އެވެ. ހަމަލާތައް ދެނީ އިރާގުން އެމެރިކާ ސިފައިން ފޮނުވާލުމަށް ބާރު އެޅުމުގެ ބޭނުމުގަ އެވެ.
