ލުބްނާން، ބެއިރޫތް (ޖޫން 28) - ސީރިއާ އާއި އިރާގުގެ ބޯޑަރު ސަރަހައްދަށް އެމެރިކާއިން ރޭ ދިން ވައިގެ ހަމަލާތަކުގައި މަރުވީ އިރާނުން އެހީވާ ހަނގުރާމަވެރި ގްރޫޕުތަކުގެ ހަތް މެމްބަރުން ކަމަށް ރިޕޯޓުތައް ބުނެފި އެވެ.
މިއީ އެމެރިކާގެ ރައީސް ޖޯ ބައިޑެން މަގާމުގެ ހުވާ ކުރެއްވި ފަހުން އިރާނުން އެހީވާ ޓާގެޓުތަކަށް އެމެރިކާއިން ދިން ދެ ވަނަ ހަމަލާ އެވެ. ހަމަލާ ދެނީ "ރައްދުގައި" ކަމަށް ޕެންޓަގަން އިން ބުނާއިރު، އިރާނުގެ ނިއުކްލިއާ އެއްބަސްވުމުގެ މަޝްވަރާތައް މި ވަގުތު ދަނީ ކުރިއަށެވެ.
އެމެރިކާގެ ޑިފެންސް ތަރުޖަމާން ޖޯން ކާބީ ވިދާޅުވީ އިރާނުން އެހީވާ އަސްކަރީ ގްރޫޕުތަކުން ބޭނުން ކުރާ ތިން އަސްކަރީ ފެސިލިޓީއަށް ރޭ ހަމަލާ ދިން ކަމަށެވެ. އެއީ ސީރިއާގައި ހިންގާ ދެ ތަނާއި އިރާގުގައި ހިންގާ ތަނެކެވެ.
ކާބީ ވިދާޅުވީ އެ ތިން ޓާގެޓަކީ ވެސް އިރާގުގައި ހިންގާ އެމެރިކާގެ ފެސިލިޓީތަކާއި އެ ގައުމުގައި އުޅޭ އެމެރިކާ ސިފައިންނާ ދެކޮޅަށް "އަންމޭންޑް އެއިރިއަލް ވެހިކަލް" ހަމަލާ ދިނުމަށް ބޭނުން ކުރި ޓާގެޓުތަކެއް ކަމަށެވެ.
އެ ފެސިލިޓީތައް ބޭނުން ކުރާ ހަނގުރާމަވެރި ގްރޫޕުތަކުގެ ތެރޭގައި ކާތިބް ހިޒްބުﷲ އާއި ކާތިބް އަލް ޝުހަދާ ހިމެނެ އެވެ. އެއީ އިރާނާ ގާތް ގުޅުމެއް އޮންނަ ހަނގުރާމަވެރި ދެ ޖަމާއަތެވެ.
އެމެރިކާގެ 2،500 ސިފައިން އިރާގުގައި އުޅެނީ އިސްލާމިކް ސްޓޭޓް (އައިއެސް) އާ ދެކޮޅަށް ހަނގުރާމަ ކުރުމަށެވެ. މި އަހަރު އެކަނިވެސް އެމެރިކާ ސިފައިންނަށް އަމާޒުކޮށް އިރާގުގައި 40 އަށް ވުރެ ގިނަ ހަމަލާ ދިނެވެ.
އޭގެ ތެރެއިން ގިނަ ހަމަލާތަކަކީ އެއްގަމު އުޅަނދު ދަތުރު ކުރާއިރު ދޭ ބޮމުގެ ހަމަލާ އެވެ. އޭގެ އިތުރުން 14 ރޮކެޓު ހަމަލާ ވެސް ދީފައި ވެ އެވެ. ހަމަލާތައް ދެނީ އިރާގުން އެމެރިކާ ސިފައިން ފޮނުވާލުމަށް ބާރު އެޅުމުގެ ބޭނުމުގަ އެވެ.
