ފިޝަރީޒް މިނިސްޓަރު ކަމަށް ޑރ. ހުސެއިން ރަޝީދު ހަސަން އައްޔަނުކުރަން ރައްޔިތުންގެ މަޖިލީހުން މިއަދު ރުހުން ދީފި އެވެ.
ކެބިނެޓަށް ރައީސް އިބްރާހިމް މުހައްމަދު ސޯލިހު ގެންނެވި ބަދަލުތަކުގެ ތެރެއިން އެންވަޔަރަމަންޓް މިނިސްޓަރުގެ މަގާމުގައި ހުންނެވި ހުސެއިން، ފިޝަރީޒް މިނިސްޓަރުގެ މަގާމަށް އައްޔަނުކުރެއްވުމަށް މަޖިލީހުގެ ރުހުން ހޯދަން ފޮނުއްވީ މިދިޔަ މެއި މަހުގެ ތެރޭގަ އެވެ.
ނަމަވެސް، އަމިއްލަ ކުންފުންޏެއްގައި އޭނާގެ ހިއްސާ އޮތުމުގެ މައްސަލަ ފެންމަތިވެ، އެކަން ދިރާސާކުރަން ހަވާލުކުރި މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ މެމްބަރުން މެދުގައި ހިޔާލުތަފާތުވި އެވެ.
މެމްބަރުން ކަންބޮޑުވުން އޮތީ، ވަޒީރަކު ކޮށްގެން ނުވާނެ ކަމެއްގެ ގޮތުގައި ގާނޫނުއަސާސީގެ 136 ވަނަ މާއްދާގެ (ހ) ގައި ބުނެފައިވަނީ ވަޒީރުންގެ މަޖިލީހުގެ އެއްވެސް މެމްބަރަކު ސަރުކާރުގެ އެހެން މަގާމެއް އަދި ފައިދާއެއް ލިބޭ ފަދަ އެ ނޫން ވެސް މަގާމެއް ފުރައިގެން ނުވާނެ ކަމަށް ބުނާތީ އެވެ.
އަދި ވިޔަފާރިއެއް ހިންގުމުގައި އަމަލީ ގޮތުން ބައިވެރިވެ އާމްދަނީ ހޯދަން ފަންނީ މަސައްކަތެއްގައި ޝާމިލުވެ އާމްދަނީ ލިބޭ ފަދަ އެއްވެސް މަސައްކަތެއް ކޮށްގެން ނުވާނެ ކަމަށް ބުނެފައިވާއިރު، ޑރ. ހުސެއިން އަށް ރުހުންދެވިދާނެ ކަމާމެދު ސުވާލު އުފެދުނެވެ.
އެއާއެކު ކަމާ ގުޅޭ އިދާރާތަކުން މައުލޫމާތު ސާފުކޮށް، ކޮމިޓީން ބުނީ އަމިއްލަ ކުންފުންޏެއްގައި ހުސެއިންގެ މަސްލަހަތު އޮތީ ފައުންޑިން ޝެއާހޯލްޑަރެއްގެ ގޮތުގައި ކަމަށްވާއިރު، ކުންފުނިތައް ހިންގަނީ އެ ކުންފުންޏެއްގެ ބޯޑާއި މުވައްޒަފުންކަމަށް ގާނޫނުގައި ބަޔާންކޮށްފައިވާ ކަމަށެވެ.
އެހެންކަމުން، ގާނޫނުއަސާސީގައި ވަޒީރަކު ކޮށްގެންނުވާނެ ކަމެއްގެ ގޮތުގައި ބަޔާންކޮށްފައިވާ ވިޔަފާރިއެއް ހިންގުމުގައި އަމަލީ ގޮތުން ބައިވެރިވުން ކަމަށް ހުސެއިންގެ މައްސަލާގައި ބެލެވޭނެ އެއްވެސް ގާނޫނީ ހަމައެއް ނެތް ކަމަށް ކޮމިޓީން ނިންމީ އެވެ.
އެ މައްސަލަ ދިރާސާކޮށް ކޮމިޓީން ނިންމި ގޮތަށް ހުސެއިން އަށް ރުހުން ދިނީ ވޯޓުގައި ބައިވެރިވެވަޑައިގެންނެވި 55 މެމްބަރުންގެ އިއްތިފާގުންނެވެ.
ޑރ. ހުސެއިން ރަޝީދު ހަސަން
ފިޝަރީޒް މިނިސްޓަރު ކަމާ ހަވާލުވެވަޑައިގެންނެވި، ޑރ. ހުސެއިން ވަނީ 2008 އަހަރުން 2013 ވަނަ އަހަރާ ހަމައަށް ފިޝަރީޒް މިނިސްޓްރީގެ ސްޓޭޓް މިނިސްޓަރުގެ މަގާމު ފުރުއްވަވާފަ އެވެ.
ލޭބާ މިނިސްޓްރީގައި ވެސް ހިދުމަތް ކުރެއްވި ޑރ. ހުސެއިނަކީ ގާނޫނު އަސާސީ އިސްލާހުކުރަން އެކުލަވާލި ރައްޔިތުންގެ ހާއްސަ މަޖިލީހުގެ މެމްބަރުކަން ކުރެއްވި ބޭފުޅެކެވެ.
ޖުމްހޫރި ޕާޓީގެ ޑެޕިޔުޓީ ލީޑަރުގެ މަގާމުގައި ހުންނެވި، ޑރ، ހަސަން ވަނީ މަސްވެރިކަމުގެ ދާއިރާއިން ޕީއެޗްޑީ ހާސިލުކުރައްވާފަ އެވެ.
