ލަންޑަން (ޖޫން 28) - ޔޫރޯ ފުޓްބޯޅަ މުބާރާތުގައި މާދަމާރޭ އިންގްލެންޑާ ދެކޮޅަށް ޖަރުމަނު ކުޅޭ މެޗުގެ ކުރިން އެ މެޗު ކުރިއަށްދާ އިނގިރޭސި ރަސްމީ ސްޓޭޑިއަމް ވެމްބްލީގައި ފަރިތަކުރުމުގެ ފުރުސަތު ޖަރުމަނަށް ނުލިބޭތީ އެ ޓީމުން އެކަމާ ވަރަށް ބޮޑަށް ހިތްހަމަނުޖެހުން ފާޅުކޮށްފި އެވެ.
އާންމު އުސޫލުން ނަމަ މުބާރާތުގެ މެޗު ކުޅޭ ދަނޑުގައި ކޮންމެ ޓީމަކަށް ވެސް މެޗުގެ ކުރިން ފަރިތަކުރުމުގެ ފުރުސަތު ލިބޭނެ އެވެ. އެކަމަކު ޖަރުމަނާއި އިންގްލެންޑް މެޗުގެ ކުރިން ދެ ޓީމަށް ވެސް ދަނޑުގައި ޕްރެކްޓިސް ކުރަން ނުދޭން ނިންމީ ލަންޑަނަށް މިހާރު ކުރަމުންދާ ވިއްސާރައިގެ ސަބަބުން ދަނޑު ހަލާކުވެދާނެ ކަމަށް ބުނެ އެވެ.
ޔުއެފާ އިން ވެމްބްލީ ސްޓޭޑިއަމް މެޗުގެ ކުރިން ޕްރެކްޓިސް ކުރަން ނުދޭން ނިންމުމުން އޭގެ ގެެއްލުން ބޮޑީ ޖަރުމަނަށެވެ. އެއީ ވެމްބްލީ އަކީ އިނގިރޭސި ރަސްމީ ސްޓޭޑިއަމް ކަމަށްވާއިރު، އިންގްލެންޑުން އެ ދަނޑުގައި ޕްރެކްޓިސް ނުކުރިއަސް ހުންނާނީ އެ ދަނޑަށް ހޭނިފަ އެވެ. އަދި މި ފަހަރުގެ ގްރޫޕް ސްޓޭޖުގައި އިންގްލެންޑުން ތިން މެޗު ވެސް ކުޅުނީ ވެމްބްލީގަ އެވެ. އެ ތިން މެޗުގެ ކުރިން ވެސް ވަނީ އެ ދަނޑުގައި ޕްރެކްޓިސް ކޮށްފަ އެވެ.
މިހާރު އޮތްގޮތުން ޖަރުމަނުން ވެމްބްލީ އަށް އަރާނީ ސީދާ މެޗަށެވެ. އެ ދަނޑުގައި ޕްރެކްޓިހެއް ނުކުރެވުމަކީ ޖަރުމަނު ކޯޗު ޔަކީމް ލޯ އަށް ލިބުނު ވަރަށް ބޮޑު ދެރައެކެވެ. އޭނާ ހުރީ އެކަމާ ވަރަށް ބޮޑަށް ހިތްހަމަނުޖެހިފައި ކަމަށް ޖަރުމަނު މީޑިއާތަކުން ވަނީ ރިޕޯޓްކޮށްފަ އެވެ.
ވެމްބްލީގައި މެޗުގެ ކުރިން ފަރިތަކޮށްލަން ނުލިބޭތީ ޖަރުމަނުން ވަނީ މެޗު ކުޅެން ލަންޑަނަށް ދިއުން ވެސް ފަސްކޮށްފަ އެވެ. މިިހާރު އޮތްގޮތުން ޖަރުމަނުން މެޗު ކުޅެން ލަންޑަނަށް ދާނީ މާދަމާ އެވެ. ފުރުން ލަސްކޮށްލުމުން ޖަރުމަނުން އިތުރު ޕީސީއާރް ޓެސްޓެއް ހަދައި މުޅި ސްކޮޑު އެއްކޮށް ކޮވިޑަށް ޓެސްޓްކުރަން ޖެހޭނެ ކަމަށް ޖަރުމަނުގެ ނޫސްތަކުން ރިޕޯޓްކޮށްފައިވެ އެވެ.
